အဂတိလိုက်စားမှုကို ဆန့်ကျင်သော ဂျန်ဇီးအုံကြွမှု ဖြစ်ပေါ်ပြီးနောက် ပထမဆုံးကျင်းပမည့် ရွေးကောက်ပွဲနီးလာချိန်တွင် နီပေါနိုင်ငံ၏ ဘုရင်ဟောင်းကို ထောက်ခံသူထောင်ပေါင်းများစွာသည် ဖေဖော်ဝါရီလ ၁၃ ရက် နေ့၌ ခတ္တမန္ဒူတွင် စုဝေးကာ အားလပ်ရက်အပန်းဖြေရာမှ နေရပ်ပြန်လာသော ၎င်းတို့၏ နောက်ဆုံးဘုရင် ဂါနန်ဒရာကို ကြိုဆိုခဲ့ကြသည်။
၂၀၀၈ ခုနှစ်တွင် ယခင်မော်ဝါဒီသူပုန်ဟောင်းများ လွှမ်းမိုးသော အထူးအစည်းအဝေးတစ်ရပ်၌ နီပေါနိုင်ငံ၏ ဘုရင်စနစ်ကို ဖျက်သိမ်းခဲ့ကာ ဟိန္ဒူဘာသာဝင်အများစုနေထိုင်သော ဟိမဝန္တာတောင်တန်းနိုင်ငံကိုဘာသာရေးဖြင့်အုပ်ချုပ်ခြင်းမဟုတ်သော သမ္မတနိုင်ငံအဖြစ် ပြောင်းလဲခဲ့သည်။
ထိုအချိန်မှစ၍ နောက်ဆုံးဘုရင်ဖြစ်သော မစ္စတာဂရန်နာဒါ(၇၈ နှစ်) သည် ခတ္တမန္ဒူရှိ ၎င်း၏ နေအိမ်တွင် သာမန်လူတစ်ဦးအဖြစ်နေထိုင်ခဲ့သည်။ တစ်ချိန်တည်းမှာပင် နီပေါနိုင်ငံ၌ ပြီးခဲ့သည့် ၁၈ နှစ်တာကာလအတွင်း အစိုးရအပြောင်းအလဲ ၁၄ ကြိမ်ဖြစ်ခဲ့ကာ မတည်ငြိမ်မှုများကြောင့် ရင်းနှီးမြှုပ်နှံသူများကို စိုးရိမ်ထိန်လန့်စေပြီး တိုးတက်မှုကို နှောင့်နှေးစေခဲ့သည်။
ဖေဖော်ဝါရီလ ၁၃ ရက် နေ့ တွင် ဘုရင်စနစ်ကို ထောက်ခံသော ဆန္ဒပြသူများသည် နီပေါနိုင်ငံအရှေ့ပိုင်းတွင် သုံးလကြာ အားလပ်ရက်အပန်းဖြေပြီးနောက် လေဆိပ်မှ ၎င်း၏ နေအိမ်ရှိရာသို့ ကားဖြင့်ပြန်လာသော မစ္စတာ ဂါနန်ဒရာကို ပန်းစည်းများ ပေးအပ်ပြီး နိုင်ငံတော်အလံများ ဝှေ့ယမ်းကာ “ဘုရင်ကြီး ပြန်လာပါ၊ တိုင်းပြည်ကို ကယ်တင်ပါ” ဟု အော်ဟစ်ကြိုဆိုခဲ့ကြသည်။
“ဘုရင်ဟာ နီပေါလူမျိုးအားလုံးကို ဂရုစိုက်စောင့်ရှောက်နိုင်တဲ့ အုပ်ထိန်းသူဖြစ်တာကြောင့် ဘုရင်စနစ်ကို ကျွန်တော်တို့ ပြန်ထူထောင်ရပါမယ်။ အဂတိလိုက်စားတဲ့ နိုင်ငံရေးသမားများစွာ မလုပ်နိုင်ခဲ့တဲ့အရာပါ” ဟု ဂါနန်ဒရာကို ထောက်ခံသူ အသက် ၅၅ နှစ်အရွယ် ဆန်နာတန် ပရာဆတ် ရက်မီက ပြောဆိုခဲ့ပြီး သမ္မတနိုင်ငံသည် မိမိတို့အတွက် အသုံးမဝင်ဟု ဆိုခဲ့သည်။
နီပေါလူမျိုးအများအပြားသည် ရီပတ်ဘလီကန်အစိုးရအပေါ် စိတ်ပျက်လက်ပျက်ဖြစ်ရမှုကို ထုတ်ဖော်ဖွင့်ဟခဲ့ကြပြီး အစိုးရသည် စီးပွားရေးဖွံ့ဖြိုးတိုးတက်မှုနှင့် အလုပ်အကိုင်များ ပိုမိုဖန်တီးရေးဆိုင်ရာ ကတိကဝတ်များကို မဖြည့်ဆည်းနိုင်ခဲ့ကြောင်း စွပ်စွဲခဲ့ကြသည်။
စက်တင်ဘာလအတွင်း ဂျန်ဇီးလူငယ်များဦးဆောင်သော အဂတိလိုက်စားမှု တိုက်ဖျက်ရေး မငြိမ်သက်မှုများတွင် လူ ၇၇ ယောက်သေဆုံးခဲ့ရပြီး ဝန်ကြီးချုပ် ကေပီ ရှားမာအိုလီလည်း ရာထူးမှနုတ်ထွက်ခဲ့ရသည်။
မတ်လ ၅ ရက်တွင် လွှတ်တော်အသစ်အတွက် ရွေးကောက်ပွဲအသစ် ကျင်းပရန် စီစဉ်ထားပြီး ဘုရင်စနစ်ဖွဲ့စည်းပုံကို ပြန်လည်ထူထောင်ရေးကို ထောက်ခံသော တော်ဝင်ဝါဒီအုပ်စုတစ်ခုသည် လွှတ်တော်အမတ်နေရာ ၂၇၅ နေရာအတွက် ဝင်ရောက်ယှဉ်ပြိုင်မည့် ပါတီ ၆၅ ခုတွင် တစ်ခုအပါအဝင်ဖြစ်သည်။
Ref: သယ်စထရိတ်တိုင်းမ်စ်