နိုင်ငံရေး စီးပွားရေးအကျပ်အတည်းကြားတိုင်းပြည်မှထွက်ပြေးရသည့် သီရိလင်္ကာသမ္မတ
ကိုလံဘို၊ ဇူလိုင် ၁၃
၁၉၄၈ ခုနှစ် နိုင်ငံလွတ်လပ်ရေးရပြီးချိန်မှစ၍ အဆိုးရွားဆုံးစီးပွားရေးပြဿနာနှင့် ကြုံတွေ့နေရသော သီရိလင်္ကာနိုင်ငံ၏ သမ္မတ ဂိုတာဗျာရာဂျားပါစကာသည် ယနေ့မနက်အစောပိုင်းတွင် နိုင်ငံမှထွက်ခွာသွားကြောင်းသိရှိရသည်။
သမ္မတ ရာဂျားပါစကာ၊ ၎င်း၏ဇနီးနှင့် သက်တော်စောင့်နှစ်ဦးသည် သီရိလင်္ကာလေတပ်လေယာဉ်ဖြင့် မော်လ်ဒိုက်မြို့တော် မာလီ သို့ထွက်ပြေးတိမ်းရှောင်သွားကြောင်း လေတပ်ပြောဆိုချက်နှင့် လူဝင်မှုကြီးကြပ်ရေးမှအရာရှိများကို ကိုးကား၍ သတင်းအေဂျင်စီများကဖော်ပြခဲ့သည်။
သီရိလင်္ကာသမ္မတသည် ဗုဒ္ဓဟူးနေ့မနက်အစောပိုင်းက မာလီသို့ရောက်ရှိလာသည်ဟု AFP သတင်းဌာနက ဖော်ပြခဲ့သည်။ထောင်ပေါင်းများစွာသော ဆန္ဒပြသူများသည်သမ္မတအိမ်တော်ကို ဝင်ရောက်စီးနင်းကာ ရာထူးမှဆင်းပေးရန် တောင်းဆိုပြီးနောက် ဗုဒ္ဓဟူးနေ့တွင်ရာထူးမှ နုတ်ထွက်မည်ဟု၎င်းကပြောဆိုခဲ့သည်။
လွန်ခဲ့သည့် ဆယ်စုနှစ်တစ်ခုကျော်က အစ်ကိုဖြစ်သူ၏ အစိုးရလက်ထက်တွင် ကာကွယ်ရေးအတွင်းဝန်အဖြစ် တာဝန်ထမ်းဆောင်ကာ သက်တမ်းရှည်နေသော နိုင်ငံ၏ပြည်တွင်းစစ်ကို အဆုံးသတ်ရန် ကူညီပေးခဲ့သော ရာဂျားပါစကာသည် ၂၀၁၉ ခုနှစ်တွင် လုံခြုံရေးနှင့် တည်ငြိမ်ရေးဆိုင်ရာအတွက်အလားအလာကောင်းသော သမ္မတအဖြစ် ရွေးချယ်ခံခဲ့ရသည်။
သို့သော်အစိုးရဘဏ္ဍာများ ကုန်သွားပြီး တိုင်းပြည်တွင် လောင်စာဆီ၊စားနပ်ရိက္ခာနှင့် ဆေးဝါးများကုန်ခမ်းလာသည့်အပြင် နိုင်ငံခြားကြွေးမြီများပါတင်နေသည့်အတွက် သမ္မတကိုစီးပွားရေးဆိုင်ရာ အရည်အချင်းမရှိဟုစွပ်စွဲခဲ့ပြီး သီရိလင်္ကာနိုင်ငံရေးကို နှစ် ၂၀ နီးပါးအုပ်စိုးခဲ့သည့် ဂိုတာဗျာနှင့် ရာဂျားပါစကာ မိသားစုအပေါ်လူထု၏သဘောထားပြောင်းလာခဲ့သည်။
ယခုအချိန်တွင် ဖမ်းဆီးထိန်းသိမ်းခံရနိုင်ခြေရှိသဖြင့်ရှောင်ရှားနိုင်ရန် ရာထူးမှမဆင်းမီ နိုင်ငံရပ်ခြားသို့ ထွက်ပြေးသွားခြင်းဖြစ်သည်ဟုသိရှိရသည်။
နိုင်ငံ၏လွှတ်တော်သည် သမ္မတအသစ်ရွေးချယ်နိုင်ရန် ဇူလိုင် ၂၀ ရက်တွင် မဲခွဲဆုံးဖြတ်ရမည်ဖြစ်သည်။
Source – Aljerzeera