ရခိုင်ပြည်နယ်အတွင်း (၁) နှစ်ကျော်ကြာ တိုက်ပွဲပြင်းထန်ခဲ့ပြီး မြို့နယ်ပေါင်း (၁၄) မြို့နယ် ထိန်းချုပ်ပြီးနောက် နိုင်ငံရေးအရဖြေရှင်းမည်ဟု ရခိုင်လက်နက်ကိုင်အဖွဲ့တစ်ခုဖြစ်သည့် AA က ထုတ်ပြန်လာသည်။
၂၀၂၃ ခုနှစ် နိုဝင်ဘာ (၁၃)ရက်က စတင်ကာ ရခိုင်ပြည်နယ် အတွင်းရှိ တပ်မတော် တပ်စခန်းများအား ထိုးစစ်ဆင်တိုက်ခိုက်မှုများလုပ်ဆောင်ခဲ့ပြီး (၁) နှစ်ကျော်အကြာတွင် နိုင်ငံရေးဆွေးနွေးရန် စကားလမ်းကြောင်းစလာခြင်းလည်း ဖြစ်သည်။
AA အနေဖြင့် ရှမ်းမြောက် (၁၀၂၇) စစ်ဆင်ရေးတွင်လည်းကိုးကန့် ၊ တအာင်း လက်နက်ကိုင်အဖွဲ့များနှင့် ပူးပေါင်းကာ တိုက်ပွဲများ ဖော်ဆောင်တိုက်ခိုက်ခဲ့ကြပြီး တရုတ်၏ ကြားဝင်စေ့စပ်မှုဖြင့် ဟိုင်ဂင်ဆွေးနွေးပွဲ သဘောတူညီမှုကို ရရှိခဲ့ကြသည်။
လက်ရှိတွင် ရခိုင်ပြည်နယ်အတွင်းရှိ စစ်တွေ၊ ကျောက်ဖြူနှင့် မာန်အောင်မြို့နယ်မှအပ ကျန်မြို့နယ် (၁၄) ခုကို AA က ထိန်းချုပ်ထားပြီး စစ်ရေးအရ အသာစီးရယူထားသည့်အခြေအနေဖြစ်သည်။
AA က ထုတ်ပြန်လာသည့် ထုတ်ပြန်ချက်အရ လက်ရှိ ပြည်တွင်းရေး အခင်းအကျင်းနှင့် အဖြစ်အပျက်များကို စစ်ရေးအရ ဖြေရှင်းခြင်းထက် နိုင်ငံရေးနည်းလမ်းအရ ဖြေရှင်းရန် အဆင်သင့်အနေအထားရှိကြောင်း ထည့်သွင်း ဖော်ပြထားသည်ကို တွေ့ရသည်။
ထို့ပြင် ရခိုင်ပြည်နယ်အတွင်းရှိ နိုင်ငံခြားရင်းနှီးမြှုပ်နှံမှုစီမံကိန်းများကို ဂရုတစိုက် ထိန်းသိမ်းကာကွယ်သွားမည့်အပြင် အကျိုးတူပူးပေါင်းဆောင်ရွက်သွားရန် လိုလားကြောင်းကိုလည်း AA က ထုတ်ဖော်ပြောကြားထားသည်။
လက်ရှိတွင် ရခိုင်ပြည်နယ်အတွင်း၌ တရုတ်၊ အိန္ဒိယ၊ တောင်ကိုရီးယားနှင့် ဂျပန်နိုင်ငံတို့မှ ရင်းနှီးမြှုပ်နှံမှုလုပ်ငန်းများ ဆောင်ရွက်နေပြီး စီမံကိန်းဧရိယာအချို့မှာ AA ထိန်းချုပ်မှုအောက်ရောက်ရှိနေသည့် ဒေသများတွင် ပါဝင်နေသည်ကို တွေ့ရသည်။
နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်၏ ပြီးခဲ့သည့် လအတွင်းက သွားရောက်ခဲ့သည့် တရုတ်နိုင်ငံခရီးစဉ်တွင် တိုင်းရင်းသား လက်နက်ကိုင်အဖွဲ့များအနေဖြင့် ငြိမ်းချမ်းရေးကို အမှန်တကယ်လိုလားပါက ဆွေးနွေးရန်အသင့်ရှိကြောင်း ပြောကြားထားသည်။
သို့သော် ငြိမ်းချမ်းရေးကိုအမှန်တကယ် လိုလားမှသာ ဆွေးနွေးနိုင်မည်ဟုလည်း ၎င်းက တရုတ်ဝန်ကြီးချုပ်နှင့် တွေ့ဆုံစဉ်က ပြောကြားထားသည်။
” MNDAA ၊ TNLA နှင့် AA အဖွဲ့သုံးဖွဲ့အနေဖြင့် ငြိမ်းချမ်းရေးကို လိုလားကြောင်း ရှင်းလင်းပြတ်သားသည့် လုပ်ဆောင်ချက် ပြသလာမှသာလျှင် မိမိတို့အနေဖြင့် ဆွေးနွေးမှုကို ဆောင်ရွက်နိုင်မည်” ဟု ဗိုလ်ချုပ်မှူးကြီး မင်းအောင်လှိုင်က ပြောကြားထားသည်။