“နိုင်ငံဖွံ့ဖြိုးဖို့ လူငယ်များ၏ အနာဂတ်ကို မြှင့်တင်စို့” လူငယ်စကားဝိုင်းကျင်းပ

လူငယ်များအနေဖြင့် စည်းလုံးညီညွတ်မှုဖြင့် နိုင်ငံဖွံ့ဖြိုးတိုးတက်ရေးတွင် ပါဝင်ကြရန် ပြည်ထောင်စုဝန်​ကြီး တိုက်တွန်း

နိုင်ငံတော်၏ ဖွံ့ဖြိုးတိုးတက်ရေးလုပ်ငန်းစဉ်များတွင် လူငယ်များ တက်ကြွစွာပါဝင်လာစေရန် ရည်ရွယ်၍ “နိုင်ငံဖွံ့ဖြိုးဖို့ လူငယ်များ၏ အနာဂတ်ကို မြှင့်တင်စို့” ခေါင်းစဉ်ဖြင့် လူငယ်စကားဝိုင်းအခမ်းအနားကို ဇွန်လ (၄) ရက်နံနက်ပိုင်းက ရန်ကုန်တိုင်းဒေသကြီး သာကေတမြို့နယ်ရှိ လူငယ်စင်တာခန်းမတွင် ကျင်းပပြုလုပ်ခဲ့သည်။

အခမ်းအနားသို့ မြန်မာနိုင်ငံလူငယ်ရေးရာဗဟိုကော်မတီ ဒုတိယဥက္ကဌ(၁)၊ လူငယ်ရေးရာဝန်ကြီးဌာန ပြည်ထောင်စုဝန်ကြီး ဒေါက်တာမောင်သင်း၊ ရန်ကုန်တိုင်းဒေသကြီး လူငယ်ရေးရာကော်မတီဥက္ကဌနှင့် တိုင်းဒေသကြီးဝန်ကြီးချုပ် ဦးအောင်နိုင်သူ၊ တိုင်းဒေသကြီးလွှတ်တော်ဥက္ကဌနှင့် ဒုတိယဥက္ကဌများ၊ တာဝန်ရှိသူများ၊ လူငယ်ကိုယ်စားလှယ်များ၊ လူမှုကူညီရေးအဖွဲ့အစည်းများနှင့် အလှူရှင်များ တက်ရောက်ခဲ့ကြသည်။

အဖွင့်အမှာစကားပြောကြားရာတွင် ပြည်ထောင်စုဝန်ကြီး ဒေါက်တာမောင်သင်းက လူငယ်များသည် နိုင်ငံ၏ အဖိုးတန်သက်ရှိသယံဇာတများဖြစ်ကြောင်း၊ လူငယ်များအတွက် ရင်းနှီးမြှုပ်နှံခြင်းသည် နိုင်ငံအနာဂတ်အတွက် အကောင်းဆုံးရလဒ်များ ဖော်ဆောင်နိုင်ကြောင်း ပြောကြားခဲ့သည်။

ထို့ပြင် လူငယ်များ၏ အရည်အသွေးမြင့်မားရေး၊ ဝေဖန်ပိုင်းခြားတွေးခေါ်နိုင်စွမ်းနှင့် ခေါင်းဆောင်မှုအရည်အသွေးများ တိုးတက်စေရန် လူငယ်ဖိုရမ်များနှင့် စကားဝိုင်းများကို အလေးထားဆောင်ရွက်နေကြောင်း၊ လူငယ်များအနေဖြင့် စည်းလုံးညီညွတ်မှုဖြင့် နိုင်ငံဖွံ့ဖြိုးတိုးတက်ရေးတွင် ပါဝင်ကြရန် တိုက်တွန်းပြောကြားခဲ့သည်။

ယင်းနောက် ရန်ကုန်တိုင်းဒေသကြီး လူငယ်လှုပ်ရှားမှု Video Clip ကို ပြသခဲ့ပြီး ပြည်ထောင်စုဝန်ကြီးနှင့် တာဝန်ရှိသူများက စကားဝိုင်း Moderator/Speaker များနှင့် အလှူရှင်များအား ဂုဏ်ပြုမှတ်တမ်းလွှာများ ပေးအပ်ခဲ့သည်။

ထို့နောက် မြန်မာနိုင်ငံတိုက်ကွမ်ဒိုအဖွဲ့ချုပ်နှင့် မြန်မာ့ရိုးရာခြင်းလုံးအဖွဲ့တို့က အားကစားသရုပ်ပြအစီအစဉ်များ တင်ဆက်ခဲ့ကြပြီး စုပေါင်းမှတ်တမ်းတင်ဓာတ်ပုံ ရိုက်ကူးခဲ့ကြသည်။

ဒုတိယပိုင်းအစီအစဉ်တွင် လူငယ်အဖွဲ့ခေါင်းဆောင်(၅)ဦးက “နိုင်ငံဖွံ့ဖြိုးဖို့ လူငယ်များ၏ အနာဂတ်ကို မြှင့်တင်စို့” ခေါင်းစဉ်ဖြင့် ဆွေးနွေးခဲ့ကြပြီး တက်ရောက်လာသည့် လူငယ်များ၏ မေးမြန်းချက်များကို ပြန်လည်ဖြေကြားခဲ့ကြောင်း သိရသည်။