နိုင်ငံဖွံ့ဖြိုးတိုးတက်ရေးအတွက် တည်ငြိမ်အေးချမ်းရေးမှာ အရေးကြီးသည့်လုပ်ငန်းတစ်ခုဖြစ်သည်ဟု မြန်မာနိုင်ငံတော် ယာယီသမ္မတ၊ နိုင်ငံတော်လုံခြုံရေးနှင့် အေးချမ်းသာယာရေးကော်မရှင် ဥက္ကဋ္ဌ၊ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ဗဟိုကော်မတီဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်က ပြောသည်။
ယနေ့ အောက်တိုဘာ ၁၅ ရက်နံနက်ပိုင်းက နေပြည်တော်၌ကျင်းပသည့် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) (၁၀)နှစ်ပြည့် နှစ်ပတ်လည်နေ့အခမ်းအနားသို့တက်ရောက်၍ မိန့်ခွန်းပြောကြားရာ၌ အထက်ပါအတိုင်းပြောကြားခဲ့ခြင်းဖြစ်သည်။
ယနေ့အချိန်တွင် မိမိတိုတိုင်းပြည်၏ ပကတိလိုအပ်ချက်သည် တည်ငြိမ်အေးချမ်းရေးဖြစ်ပြီး တည်ငြိမ်အေးချမ်းမှုရှိမှသာ ပြည်သူလူထုသည် ကောင်းမွန်စွာစီးပွားရှာနိုင်ပြီး လုံခြုံစွာနေထိုင်နိုင်မည်ဖြစ်ကာ ခိုင်မာတိုးတက်သောလူမှုစီးပွားဘဝများကိုတည်ဆောက်နိုင်မည်ဟု ပြောသည်။
ထို့ကြောင့် ပြည်သူလူထုနှင့် နိုင်ငံတော်ဖွံ့ဖြိုးတိုးတက်ရေးအတွက် လိုအပ်ချက်တစ်ခုဖြစ်သော တည်ငြိမ်အေးချမ်းရေးကို အရေးကြီးသည့်လုပ်ငန်းတစ်ခုအဖြစ် မိမိတို့အားလုံး မဆုတ်မနစ်ဆက်လက်ဆောင်ရွက်ကြရမည်ဟု တိုက်တွန်းပြောကြားသည်။
” လွတ်လပ်ရေးရပြီးနောက်ပိုင်းပေါ်ပေါက်လာတဲ့ လက်နက်ကိုင်လမ်းစဥ်ချုပ်ငြိမ်းစေဖို့အတွက် ခေတ်အဆက်ဆက်အစိုးရတွေက နည်းလမ်းမျိုးစုံနဲ့ကြိုးပမ်းဆောင်ရွက်ခဲ့ကြပါတယ် လက်ရှိအချိန်မှာ ပြည်တွင်းငြိမ်းချမ်းရေးရဖို့ကို ဆက်လက်ကြိုးပမ်းဆောင်ရွက်နေဆဲဖြစ်ပါတယ်”ဟု မြန်မာနိုင်ငံတော် ယာယီသမ္မတက ပြောသည်။
ထိုသို့ ကြိုးပမ်းဆောင်ရွက်လျက်ရှိရာ ပြည်တွင်း၌ ငြိမ်းချမ်းမည်ကိုမလိုလားသည့် ပြည်တွင်း/ပြည်ပအဖွဲ့အစည်းများက နည်းလမ်းပေါင်းစုံအသုံးပြုကာနှောင့်ယှက်နေကြသဖြင့် အဓိပ္ပာယ်အားဖြင့် လွန်စွာလေးနက်ပြီး အမြဲထာဝရမှန်ကန်နေသည့် အမှန်တရားဖြစ်သော ပြည့်အင်အားသည် ပြည်တွင်းမှာရှိသည်ဆိုစကားအတိုင်း တိုင်းပြည်တည်ငြိမ်အေးချမ်းရေးအတွက် အလေးထားလိုက်နာရန်လိုအပ်သည်ဟု မြန်မာနိုင်ငံတော် ယာယီသမ္မတက တိုက်တွန်းပြောကြားခဲ့သည်။