နိုင်ငံတော်သမ္မတ ဦးမင်းအောင်လှိုင် ဗီယက်နမ်နိုင်ငံသို့ နိုင်ငံတော်အဆင့် တရားဝင်ချစ်ကြည်ရေးခရီးစဉ်အပြီး နေပြည်တော်သို့ ပြန်လည်ရောက်ရှိ

နေပြည်တော်၊ စက်တင်ဘာ ၆

ဗီယက်နမ်ဆိုရှယ်လစ်သမ္မတနိုင်ငံသို့ နိုင်ငံတော်အဆင့် တရားဝင်ချစ်ကြည်ရေးခရီးစဉ် (Official Visit) သွားရောက်ခဲ့သည့် နိုင်ငံတော်သမ္မတ ဦးမင်းအောင်လှိုင်နှင့် ဇနီး ဒေါ်ကြူကြူလှ ဦးဆောင်သည့် မြန်မာကိုယ်စားလှယ်အဖွဲ့သည် ယနေ့ စက်တင်ဘာ ၆ ရက်တွင် အထူးလေယာဉ်ဖြင့် နေပြည်တော်သို့ ပြန်လည်ရောက်ရှိခဲ့သည်။

နိုင်ငံတော်သမ္မတနှင့် ဇနီးတို့သည် ဗီယက်နမ်နိုင်ငံသို့ ရောက်ရှိနေစဉ် ဗီယက်နမ်နိုင်ငံခေါင်းဆောင်များနှင့် တွေ့ဆုံ၍ နှစ်နိုင်ငံချစ်ကြည်ရင်းနှီးမှုနှင့် ပူးပေါင်းဆောင်ရွက်မှု တိုးမြှင့်ရေးဆိုင်ရာ ကိစ္စရပ်များကို ဆွေးနွေးခဲ့ကြပြီး နိုင်ငံတော်အဆင့် တရားဝင်ကြိုဆိုပွဲနှင့် ဂုဏ်ပြုညစာစားပွဲတို့သို့ တက်ရောက်ခဲ့သည်။

ထို့ပြင် ဟိုချီမင်းဂူဗိမာန် ၊အမျိုးသားသူရဲကောင်းများနှင့်အာဇာနည်များဗိမာန်တွင် လွမ်းသူ့ပန်းခွေချခြင်း၊ ဗီယက်နမ်နိုင်ငံ၏ စက်မှုနှင့် နည်းပညာကဏ္ဍများဖြစ်သည့် VinFast မော်တော်ယာဉ်ထုတ်လုပ်ရေးစက်ရုံနှင့် Viettel ဆက်သွယ်ရေးကုမ္ပဏီတို့သို့ သွားရောက်လေ့လာခြင်း၊ မြန်မာ-ဗီယက်နမ် စီးပွားရေးဖိုရမ်သို့ တက်ရောက်ခြင်းနှင့် ဗီယက်နမ်နိုင်ငံဆိုင်ရာ မြန်မာသံရုံးမှ ဝန်ထမ်းများ၊ မိသားစုဝင်များနှင့် ပညာသင်များအား တွေ့ဆုံခြင်းတို့ကို ဆောင်ရွက်ခဲ့သည်။

အဆိုပါခရီးစဉ်သည် မြန်မာ-ဗီယက်နမ် နှစ်နိုင်ငံအကြား ရှိရင်းစွဲချစ်ကြည်ရင်းနှီးမှု ပိုမိုခိုင်မာစေရေးနှင့် စီးပွားရေး၊ ကုန်သွယ်ရေး၊ ရင်းနှီးမြှုပ်နှံမှု၊ နည်းပညာနှင့် အခြားကဏ္ဍစုံ ပူးပေါင်းဆောင်ရွက်မှုများ ပိုမိုတိုးမြှင့်နိုင်ရေးတို့အတွက် အထောက်အကူပြုသည့် ခရီးစဉ်တစ်ရပ်ဖြစ်သည်။

နိုင်ငံတော်သမ္မတ ဦးမင်းအောင်လှိုင်နှင့် ဇနီး၊ မြန်မာကိုယ်စားလှယ်အဖွဲ့တို့ နေပြည်တော်လေဆိပ်သို့ ပြန်လည်ရောက်ရှိလာရာ အစိုးရအဖွဲ့တာဝန်ရှိသူများနှင့် မြန်မာနိုင်ငံဆိုင်ရာ ဗီယက်နမ်သံရုံးမှ တာဝန်ရှိသူများက ကြိုဆိုခဲ့ကြသည်။