အထွေထွေရွေးကောက်ပွဲအောင်မြင်စွာကျင်းပနိုင်ရေးကိစ္စနှင့် NCA လမ်းကြောင်းအတိုင်း ငြိမ်းချမ်းရေးလုပ်ငန်းစဉ်များ၌ ဆက်လက်ပူးပေါင်းဆောင်ရွက်မည် ကိစ္စရပ်များ ဆွေးနွေးခဲ့
နိုင်ငံတော်လုံခြုံရေးနှင့် အေးချမ်းသာယာရေးကော်မရှင် ဥက္ကဌ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်ထံ ငြိမ်းချမ်းရေးဆွေးနွေးပွဲတက်ရောက်ခဲ့သည့် တိုင်းရင်းသားလက်နက်ကိုင်ကိုယ်စားလှယ်အဖွဲ့များက ယနေ့ အောက်တိုဘာ(၁၇)ရက်နေ့တွင် လာရောက်တွေ့ဆုံခဲ့ကြောင်း သိရသည်။
ရခိုင်ပြည်လွတ်မြောက်ရေးပါတီ(ALP) ၊ ဒီမိုကရေစီအကျိုးပြု ကရင့်တပ်မတော်(DKBA) ၊ ကရင်အမျိုးသားအစည်းအရုံး-ငြိမ်းချမ်းရေးကောင်စီ( KNU/KNLA-PC) ၊ လားဟူဒီမိုကရက်တစ် အစည်းအရုံး (LDU) ၊ မွန်ပြည်သစ်ပါတီ(NMSP) ၊ နှင့် ရှမ်းပြည်ပြန်လည်ထူထောင်ရေးကောင်စီ(RCSS) အဖွဲ့က တာဝန်ရှိသူများနှင့် NCA တွင် လက်မှတ်ရေးထိုးခဲ့သူ ဦးခွန်ဥက္ကာနှင့်ဦးမျိုးဝင်း တိုင်းရင်းသားလက်နက်ကိုင် ကိုယ်စားလှယ်များက လာရောက်တွေ့ဆုံခဲ့ခြင်းဖြစ်သည်။
တွေ့ဆုံမှုတွင် ငြိမ်းချမ်းရေးလုပ်ငန်းများကို မိမိတို့အနေဖြင့် အမြန်ဆုံးအကောင်ထည်ဖော်ဆောင်ရွက်သွားရန်လိုကြောင်းနှင့် ဖွဲ့စည်းပုံအခြေခံဥပဒေပြင်ဆင်ရေးအတွက်လည်း သဘောတူညီပြီးဖြစ်ကြောင်း ခေတ်ကာလအရ ပြင်ဆင်ရန်လိုအပ်သည်များရှိသည်ကို သဘောပေါက်ကြောင်း နိုင်ငံတော်လုံခြုံရေးနှင့် အေးချမ်းသာယာရေးကော်မရှင် ဥက္ကဌ တပ်မတော်ကာကွယ်ရေးဦးစီးချုပ်က ပြောကြားခဲ့ကြောင်း သိရသည်။
ထိုပြင် NCA ကို အရှိန်ပြန်လည်ရအောင်လာရောက် ပူးပေါင်းဆောင်ရွက်ပေးသည်ကိုလည်း ကျေးဇူးတင်ရှိကြောင်း နိုင်ငံတော်လုံခြုံရေးနှင့် အေးချမ်းသာယာရေးကော်မရှင် ဥက္ကဌ တပ်မတော်ကာကွယ်ရေးဦးစီးချုပ်က ပြောကြားခဲ့သည်။
ထို့နောက် ရွေးကောက်ပွဲသည် ငြိမ်းချမ်းရေးလုပ်ငန်းစဉ်အတွက် အရေးကြီးသည် အခန်းကဏ္ဍာတွင်ပါဝင်ခြင်းကြောင့် ပါတီစုံဒီမိုကရေစီအထွေထွေရွေးကောက်ပွဲ အောင်မြင်စွာကျင်းပပြုလုပ်နိုင်ရေး အဘက်ဘက်မှ ပူးပေါင်းဆောင်ရွက်သွားမည်အခြေအနေများကိုလည်း ဆွေးနွေးခဲ့ကြောင်း သိရသည်။
ငြိမ်းချမ်းရေးဆွေးနွေးပွဲများတွင် ဆက်လက်ပါဝင်တက်ရောက်မည်အခြေအနေများ ရွေးကောက်ပွဲကျင်းပပြီးနောက် ထွက်ပေါ်လာသည့် အစိုးရနှင့်အတူ ငြိမ်းချမ်းရေးလုပ်ငန်းစဉ်များ၌ ဆက်လက်ပူးပေါင်းဆောင်ရွက်သွားမည် အခြေအနေများကိုလည်း ဆွေးနွေးခဲ့ကြောင်း သိရသည်။