ထိုင်း-ဗီယက်နမ် ကုန်သွယ်မှုမြှင့်တင်မည်

 ထိုင်းနှင့် ဗီယက်နမ်တို့သည် ယခုနှစ်တွင် နှစ်နိုင်ငံကုန်သွယ်မှုကို ဒေါ်လာ ၂၅ ဘီလျံအထိ မြှင့်တင်ရန် ရည်မှန်းချက်ထားရှိပြီး ၎င်းတို့၏ ဘက်စုံမဟာဗျူဟာမြောက် မိတ်ဖက်ဆက်ဆံရေးအရ စီးပွားရေးပူးပေါင်းဆောင်ရွက်မှုကို အရှိန်မြှင့်ရန် အင်္ဂါနေ့က ဟနွိုင်းတွင် ကျင်းပသော ဆွေးနွေးပွဲများအတွင်း နှစ်နိုင်ငံခေါင်းဆောင်များက ကတိပြုခဲ့ကြသည်။

ပြီးခဲ့သည့် သီတင်းပတ်က ဗီယက်နမ်ခေါင်းဆောင်၏ ထိုင်းနိုင်ငံ ခရီးစဉ်အပြီးတွင် ထိုင်းဝန်ကြီးချုပ် အနူတင်ချန်ဗီရာကူလ်သည် ဗီယက်နမ်သမ္မတ တိုလမ်ကို တွန်ကင်နန်းတော်တွင် သွားရောက်တွေ့ဆုံခဲ့သည်။

မကြာသေးမီက ဖလှယ်မှုများသည် အလွန်အောင်မြင်ကြောင်း နှစ်ဖက်စလုံးက ထုတ်ဖော် ပြောကြားခဲ့ကြပြီး ယခင်ဆွေးနွေးမှုများအတွင်း ရရှိခဲ့သော သဘောတူညီချက်များကို အကောင်အထည်ဖော်ရန် အရှိန်မြှင့်ဆောင်ရွက်ရေးကို ကတိပြုခဲ့ကြသည်။

 ဗီယက်နမ်နှင့် ဆက်ဆံရေးကို နက်ရှိုင်းလိုသည့် ထိုင်းနိုင်ငံ၏ ရည်ရွယ်ချက်ကို ထင်ဟပ်စေသည့်အနေဖြင့် မစ္စတာအနူတင်နှင့်အတူ အစိုးရအဖွဲ့ဝင် ဝန်ကြီး ကိုးဦးနှင့် လက်နက်ကိုင်တပ်ဖွဲ့အားလုံးမှ တပ်မှူးများသည် ခရီးစဉ်တွင် လိုက်ပါလာခဲ့သည်။

 နှစ်ဖက်စလုံးသည် ထိုင်း-ဗီယက်နမ် ဘက်စုံမဟာဗျူဟာမြောက် မိတ်ဖက်ဆက်ဆံရေးကို ထောက်ခံကြောင်း အတည်ပြုခဲ့ပြီး ပူးတွဲအစိုးရယန္တရားအပါအဝင် ဝန်ကြီးဌာနများနှင့် အေဂျင်စီများအကြား ပိုမိုနီးကပ်စွာ ညှိနှိုင်းဆောင်ရွက်မှုမှတဆင့် ချိတ်ဆက်မှု သုံးခု မဟာဗျူဟာကို မြှင့်တင်ရန် သဘောတူညီခဲ့ကြသည်။

 နှစ်နိုင်ငံကို ကုန်သွယ်ရေးကို ဒေါ်လာ ၂၅ ဘီလျံအထိ တိုးမြှင့်ရန်နှင့် နောက်ပိုင်းတွင် ဒေါ်လာ ၅၀ ဘီလျံအထိ တိုးမြှင့်သွားရန် မစ္စတာလမ်က အဆိုပြုခဲ့သည်။

 ထိုင်းနိုင်ငံသည် အဆိုပါအစီအစဉ် အထူးသဖြင့် အစိမ်းရောင် စီးပွားရေးဖွံ့ဖြိုးတိုးတက်မှုနှင့် ဖန်လုံအိမ်ဓာတ်ငွေ့ထုတ်လွှတ်မှု သုညအဆင့် ရည်မှန်းချက်များကို အပြည့်အ၀ ထောက်ခံခဲ့သည်။

 “ဒေါ်လာ ၂၅ ဘီလျံ ရည်မှန်းချက်ကို ဒီနှစ်အတွင်းမှာ အောင်မြင်နိုင်မယ်လို့ ယုံကြည်ထားပြီး မကြာမီ အနာဂတ်မှာ အမေရိကန်ဒေါ်လာ ၃၀ ဘီလျံအထိ မြင့်တက်လာမယ်လို့ ကျွန်တော်ယုံကြည်ပါတယ်” ဟု ၎င်းက ပြောကြားခဲ့သည်။

 ခေါင်းဆောင်နှစ်ဦးသည် လုံခြုံရေး ပူးပေါင်းဆောင်ရွက်မှုနှင့် တရားဥပဒေစိုးမိုးရေးတို့ကိုလည်း ဆွေးနွေးခဲ့ကြသည်။

Ref: ဘန်ကောက်ပို့စ်