ထိုင်း-ကမ္ဘောဒီးယားပဋိပက္ခ၌ဒရုန်းမထောက်ပံ့ဟုတရုတ်နှင့်ဂျပန်ပြော

ဩဂုတ် ၆

ထိုင်းနှင့် ကမ္ဘောဒီးယား နယ်စပ် ပဋိပက္ခများတွင် အသုံးပြုရန် တိုက်ခိုက်ရေး ဒရုန်းများထောက်ပံ့ပေးခြင်းကို ဂျပန်နှင့် တရုတ်တို့က ငြင်းဆိုထားသည်။

ကမ္ဘောဒီးယားနိုင်ငံဆိုင်ရာ ဂျပန်သံရုံးနှင့် ထိုင်းနိုင်ငံဆိုင်ရာ တရုတ်သံရုံးတို့က ဗုဒ္ဓဟူးနေ့တွင် ၎င်းတို့၏ဖေ့စ်ဘွတ်ခ်စာမျက်နှာများမှတဆင့်တိုက်ပွဲများတွင်ပံ့ပိုးကူညီသည်ဟူသော ကောလာဟလများကို ပယ်ချခဲ့သည်။

“ဂျပန်အစိုးရအနေနဲ့ ထိုင်းနိုင်ငံကို ဒီလိုပစ္စည်းတွေ ထောက်ပံ့ပေးဖို့ ဘယ်တုန်းကမှ မစီစဉ်ထားသလို ထိုင်းဘက်ကလည်း ဒီလိုတောင်းဆိုမှုမျိုးကို မရရှိခဲ့ပါဘူး” ဟု ဂျပန်သံရုံးက ပြောကြားခဲ့သည်။

“ဂျပန်၏အကူအညီကို နိုင်ငံတကာပဋိပက္ခများနှင့် တိုက်ရိုက်မသက်ဆိုင်သောနယ်ပယ်များတွင်သာ ပေးပါသည်။ သတင်းအတုများကို မဖြန့်ပါက ကျွန်ုပ်တို့ ကျေးဇူးတင်ပါမည်” ဟု ၎င်းကဆိုသည်။

ကမ္ဘောဒီးယားနယ်စပ်တွင် မောင်းသူမဲ့လေယာဉ်များ ကိုလှူဒါန်းခဲ့သည် ဆိုသည့်သတင်းကို တရုပ်က ငြင်းဆိုထား ပြီးဖြစ်သည်ဟု ဘန်ကောက်ရှိ တရုတ်သံရုံးက ကြေညာချက်ထုတ်ပြန်ခဲ့သည်။

“ဒီအစီရင်ခံစာမှာ အသုံးပြုထားတဲ့ ဓာတ်ပုံတွေဟာ ကမ္ဘောဒီးယားမှာ ၂၀၂၄ ခုနှစ် ဇန်နဝါရီလမှာ ကျင်းပတဲ့ တရုတ်နိုင်ငံတော် လေကြောင်းနည်းပညာ သွင်းကုန်/ထုတ်ကုန် ကော်ပိုရေးရှင်း က ကျင်းပတဲ့ ပျံသန်းမှု သရုပ်ပြပွဲတုန်းကရိုက်ကူးခဲ့တဲ့ပုံတွေပါ။ လက်ရှိအခြေအနေနဲ့ ဆက်စပ်မှုမရှိပါဘူး” ဟု သံရုံးကငြင်းဆိုထားပါသည်။

ထိုင်း၊ ကမ္ဘောဒီးယားနှင့် မလေးရှားတို့ အပါအဝင် ဒေသတွင်း နိုင်ငံများနှင့် နီးကပ်စွာ ဆက်ဆံရေး ထိန်းသိမ်းရန် တရုတ်နိုင်ငံက အဆင်သင့်ရှိကြောင်း ထုတ်ဖော် ပြောကြားခဲ့ပြီး အပစ်အခတ် ရပ်စဲရေး ကြိုးပမ်းမှုများကို ပံ့ပိုးကူညီရန်နှင့် ငြိမ်းချမ်းရေးနှင့် တည်ငြိမ်မှု အမြန်ဆုံး ပြန်လည်ရရှိရေး အတွက် အပြုသဘောဆောင်သည့် အခန်းကဏ္ဍမှ ပါဝင်သွားမည်ဟုလည်း ကတိပြုခဲ့သည်။

မကြာသေးမီ ရက်ပိုင်းအတွင်းက နယ်စပ်တလျှောက် ထောက်လှမ်းခြင်းလုပ်ငန်းကို လုပ်ဆောင်နေသည့် ဒရုန်းအများစုသည် ကမ္ဘောဒီးယားမှ ဆင်းသက်လာခြင်းဖြစ်ကြောင်း ထိုင်းကာကွယ်ရေးဝန်ကြီးဌာနက အစောပိုင်းတွင် ပြောကြားခဲ့သည်။

အာဏာပိုင်များသည် ကျုးကျော်မှုအားလုံးကို ဓာတ်ပုံအထောက်အထားများဖြင့် မှတ်တမ်းတင်ထားကြောင်း ဒုတိယကာကွယ်ရေးဝန်ကြီး နတ္တဖွန် နတ်ဖန်နစ် က တနင်္လာနေ့တွင် ပြောကြားခဲ့သည်။
နယ်စပ်တစ်လျှောက်တွင် တွေ့ရသည့် ဒရုန်းအများစုမှာ ကမ္ဘောဒီးယားမှ လာသော်လည်း ဗိုလ်ချုပ်နတ္တဖွန်က ဆူရင်တွင် တနင်္ဂနွေနေ့ညနေခင်းတွင် မြင်တွေ့ရသည့် ဒရုန်းသည် ထိုင်းနိုင်ငံအတွင်းမှ ဆင်းသက်လာခြင်းဖြစ်ကြောင်း ဗိုလ်ချုပ်နတ္တဖွန်က ပြောကြားခဲ့သည်။

Ref: ဘန်ကောက်ပို့စ်