ထိုင်းနိုင်ငံ၊ အလုပ်သမားဝန်ကြီးဌာနမှ မြန်မာအလုပ်သမား (၁.၈)သန်းခန့် အား ထိုင်းနိုင်ငံအတွင်း အထူးအခွင့်အရေးတစ်ရပ်အနေဖြင့် သက်တမ်းတိုးလုပ်ငန်းစဉ်ကို သတ်မှတ်ကာလအတွင်း ဆောင်ရွက်နိုင်ရန် ထပ်မံ၍ (၆)လ သက်တမ်းတိုးပေးမည်ဖြစ်ကြောင်း သိရသည်။
အလုပ်လုပ်ကိုင်ခွင့် သက်တမ်းတိုးပေးမည့် ကိစ္စနှင့်ပတ်သက်၍ ထိုင်းနိုင်ငံ၊ အလုပ်သမားဝန်ကြီးဌာနမှ မေလ (၂၈) ရက်တွင် နိုင်ငံခြားသားအလုပ်သမားစီမံခန့်ခွဲရေး ကော်မတီ အစည်းအဝေးပြုလုပ်ခဲ့ကြောင်း သိရသည်။
ထိုင်းရောက်မြန်မာလုပ်သားများသည် သတ်မှတ်ထားသောလုပ်ငန်းစဉ်များဆောင်ရွက်ပြီးပါက အလုပ်လုပ်ကိုင်ခွင့် သက်တမ်း (၂) နှစ် ရရှိမည်ဖြစ်ကြောင်း သိရသည်။
အဆိုပါ အစည်းအဝေး၏ အစည်းအဝေးဆုံးဖြတ်ချက်များအား ထိုင်းအစိုးရအဖွဲ့အစည်းအဝေးသို့ အတည်ပြုချက်ရရှိရေး ဆက်လက်တင်ပြသွားမည်ဖြစ်ကြောင်း သိရသည်။
ထို့ပြင် မည်သူမည်ဝါဖြစ်ကြောင်း သက်သေခံလက်မှတ် (Certificate of Identity: CI) သက်တမ်းတိုးလုပ်ငန်းစဉ်များကိုလည်း ၂၀၂၅ ခုနှစ်၊ ဇွန်လအတွင်း ဖွင့်လှစ်ဆောင်ရွက်ပေးသွားမည်ဖြစ်ပြီး အသေးစိတ်လုပ်ငန်းစဉ်အား ထပ်မံဖော်ပြပေးသွားမည်ဖြစ်ကြောင်း အလုပ်သမားသံအရာရှိရုံးက အသိပေးထားသည်။