ထိုင်းမှာ တရားမဝင်ကူးပြောင်း ဝင်ရောက်သူမြန်မာ ၄၁ ဦး အဖ-မ်းခံရ  

      
ထိုင်းနိုင်ငံတွင် တနင်္လာနေ့(ဇွန်လ၂၃)ရက်နေ့ အစောပိုင်းက မြန်မာအလုပ်သမားများကို တင်ဆောင်လာသည့် ပစ်ကပ်ထရပ်ကားတစ်စီးသည် ရဲလက်မှ ထွက်ပြေးရန် ကြိုးပမ်းရင်း ဗွက်နစ်ခဲ့သောကြောင့် တရားမဝင် မြန်မာအလုပ်သမား ၄၁ ဦး အဖ-မ်းခံလိုက်ရကြောင်း သိရသည်။
      
အီစူဇူး ပစ်ကပ်ကားသည် အမှတ် ၃၂၃ အဝေးပြေးလမ်းကြောင်းရှိ ထုန်ဖါဖွမ် ခရိုင်မှ အလုပ်သမားများကို ခေါ်သွင်းလာခြင်းဖြစ်သည်ဟု ကန်ချနာဘူရီပြည်နယ် အုပ်ချုပ်ရေးမှူး အာတီဆမ် အင်တာရာက ပြောဆိုသည်။
        
နံနက် ၃း၄၀ နာရီခန့်က ဝပ်တ်အူလေ-ာင်းမြို့အနီးတွင် ပစ်ကပ်ကားကို ကင်းလှည့်အဖွဲ့က တွေ့ရှိခဲ့ပြီးနောက် ယာဉ်မောင်းက ကားကိုမောင်းထွက်ပြေးခဲ့ရာ ရဲတပ်ဖွဲ့က နောက်မှထပ်ကြပ်မကွာ လိုက်ခဲ့သည်။
        
ပစ်ကပ်ကားသည် ခွေနွာမြစ်ဘက်သို့ ဦးတည်မောင်းပြေးခဲ့သော်လည်း မကြာခင်တွင် ဗွက်နစ်သွားခဲ့သောကြောင့် ရဲတပ်ဖွဲ့က ယာဉ်ကို ဝိုင်းထားခဲ့သည်။
        
ယာဉ်၏ နောက်ပိုင်းကုန်တင်ခန်းအတွင်း အမျိုးသား ၃၃ ဦးနှင့် အမျိုးသမီး ၈ ဦးသည် မတ်တပ်ရပ်လျက်လိုက်ပါခဲ့သည်ကို တွေ့ရှိခဲ့ပြီး ၎င်းတို့အားလုံးသည် ခရီးသွားလာမှုဆိုင်ရာ အထောက်အထားစာရွက်စာတမ်းများ မပါရှိသကဲ့သို့ ထိုင်းစကားလည်း မပြောတတ်ကြဟု ဆိုသည်။
         
၎င်းတို့သည် ရန်ကုန်၊ မော်လမြိုင်၊ ကချင်နှင့် ပဲခူးဒေသတို့မှ လာရောက်ကြခြင်းဖြစ်ကာ ဘုရားသုံးဆူ ဒေသတွင် စုဝေးခဲ့ကြခြင်းဟု စကားပြန်မှတဆင့် ပြောကြားခဲ့သည်။
       
၎င်းတို့ကို နယ်စပ်တောလမ်းအတိုင်း ထိုင်းနိုင်ငံသို့ ဝင်ရောက်ရန် လမ်းညွှန်ခဲ့ပြီး ဆန်ခလာဘူရီတွင် ခမ်ဖွန်ဟုအမည်ရသောအသက် ၄၀ အရွယ် ထိုင်းယာဉ်မောင်းနှင့် တွေ့ဆုံခဲ့ရသည်။ 
          
၎င်းတို့ထဲက ရှစ်ဦးသည် ဘန်ကောက်တွင် အလုပ်ရမည်ဟု ကတိရထားပြီး ပွဲစားများကို တစ်ဦးလျှင် ဘတ် ၁၅,၀၀၀ စီပေးခဲ့ရသည်ဟု ထွက်ဆိုခဲ့ကာ ကျန် ၃၃ ဦးမှာမူ မလေးရှားနိုင်ငံသို့ ခေါ်ဆောင်ပေးရန်အတွက် ဘတ် ၅၅,၀၀၀ စီပေးခဲ့ရသည်ဟု ဆိုသည်။
        
အဆိုပါ တရားမဝင် မြန်မာလုပ်သားများကို ဥပဒေအရ ဆက်လက်အရေးယူနိုင်ရန်နှင့် မြန်မာသို့ ပြန်ပို့ရန် ထုန်ဖါဖွမ်  ရဲစခန်းသို့ လွှဲပြောင်းပေးခဲ့ကြောင်း သိရသည်။

Ref: ဘန်ကောက်ပို့စ်