ထိုင်းနိုင်ငံ၏ အကြီးဆုံး ငွေလိ-မ်ဂိုဏ်းသားများကို ထောင်ဒဏ်ချမှတ်

ထိုင်းနိုင်ငံ၏ အကြီးမားဆုံး အွန်လိုင်း အလိမ်အညာဂိုဏ်းကို ဖြိုခွင်းခဲ့မှုတွင် ကြံရာပါ ရာဇဝတ်သား ၇၀ ဦးကို ထောင်ဒဏ် ၂၄ နှစ် အထိ ချမှတ်ခဲ့သည်။

Thung Song ပြည်နယ်တရားရုံးက ကြံရာပါ တရားခံ ၇၀ ဦးကို မေလ ၂၂ ရက်တွင် စီရင်ချက်ချခဲ့ခြင်းဟု အထူးစုံစမ်းစစ်ဆေးရေးဦးစီးဌာန(DSI) က ဗုဒ္ဓဟူးနေ့(ဇူလိုင် ၉) တွင် သတင်းထုတ်ပြန်ကြေညာခဲ့သည်။

နိုင်ငံဖြတ်ကျော် လိ-မ်လ-ည်မှုလုပ်ငန်းကြီးကို ထိုင်းနိုင်ငံတောင်ပိုင်း နာခွန်စီထမ်မရတ်ပြည်နယ်ရှိ လေးထပ်အဆောက်အအုံတစ်ခုမှ လုပ်ဆောင်ခဲ့ခြင်းဖြစ်သည်။

ယခုအမှုသည် ထိုင်းနိုင်ငံတွင် ယနေ့အထိ ဖော်ထုတ်ဖမ်းဆီးရမိသမျှတွင် အကြီးဆုံးရာဇဝတ်မှုကွန်ရက်ဖြစ်ပြီး ငွေလိမ်ဂိုဏ်းဝင် ထိုင်းနှင့် တရုတ်နိုင်ငံသားများကို အစုလိုက်အပြုံလိုက်ဖမ်းဆီးရမိမှုကို အခြေပြုထားကြောင်း DSI က ဆိုသည်။

၂၀၂၄ ခုနှစ် မတ်လ ၂၈ ရက်တွင် DSI၊ ဆိုက်ဘာမှုခင်း ရဲတပ်ဖွဲ့၊ လူဝင်မှုကြီးကြပ်ရေးဗျူရိုနှင့် အလုပ်အကိုင်ခန့်ထားရေးဌာနတို့မှ တာဝန်ရှိသူများသည် Chawang ခရိုင်ရှိ အဆောက်အအုံနှင့် အခြားအသေးစားနေရာများကို ဝင်ရောက်စီးနင်းခဲ့သည်။ စီးနင်းမှုအတွင်း ၎င်းတို့သည် တရုတ်နိုင်ငံသား ၅၂ ဦးနှင့် ထိုင်းနိုင်ငံသား ၁၉ ဦး စုစုပေါင်း ၇၁ ဦးကို ဖမ်းဆီးခဲ့သည်။

စီးနင်းခဲ့မှုတွင် ရဲတပ်ဖွဲ့သည် အဆောက်အအုံ မြေညီထပ်တွင် ထိုင်းနိုင်ငံသား အစောင့်များနှင့် ထိပ်တိုက်တွေ့ခဲ့သည်ဟု DSI က ပြောဆိုသည်။

ရဲတပ်ဖွဲ့သည် ကွန်ပျူတာ ၂၂၃ လုံး၊ မိုဘိုင်းလ်ဖုန်း ၁,၀၀၁ လုံး၊ အိုင်ပက် ၁၄ လုံး၊ ဆင်းမ်ကတ် ၂၉၈ ခုနှင့် ဘဏ်အကောင့် ၈၆ ခုတို့ကို တရားမဝင်ပစ္စည်းများနှင့်အတူ တွေ့ရှိသိမ်းဆည်းခဲ့သည်။

ထို့အပြင် တရုတ်၊ ဂျပန်၊ ရုရှားနှင့် ထိုင်းဘာသာစကားများဖြင့် သားကောင်များကို လိမ်လည်သည့် အင်တာနက်ချက်ဘောက်စ်များကိုလည်း စုံစမ်းစစ်ဆေးသူများက ဖော်ထုတ်တွေ့ရှိခဲ့ကြောင်း သိရသည်။

တရားရုံးသည် ဂိုဏ်းခေါင်းဆောင်များကို ထောင်ဒဏ် ၂၄ နှစ်စီ ချမှတ်ခဲ့ပြီး အခြားသူများကို ယင်းထက်နည်းသော ထောင်ဒဏ်များချမှတ်ခဲ့သည်။

Ref: ဘန်ကောက်ပို့စ်