ထိုင်းနိုင်ငံ၌ ရွှေ့ပြောင်းအလုပ်သမားများအား အစိုးရသစ်တက်လာသည်အထိ နေထိုင်ခွင့်တိုးမြှင့်ပေးထား

ဘန်ကောက်၊ဇွန် ၂

ထိုင်းအစိုးရအဖွဲ့သည် အနည်းဆုံးအနေဖြင့် အစိုးရအသစ်တက်လာသည့်အချိန်အထိ ရွှေ့ပြောင်းလုပ်သား ၂၀၀,၀၀၀ ကျော်အား နေထိုင်ခွင့်သက်တမ်းတိုးပေးလိုက်ကြောင်း ဘန်ကောက်ပို့စ်သတင်းဌာန၏ သတင်းတစ်ရပ်အရသိရှိရသည်။

ယခုသတင်းကို ဒုတိယဝန်ကြီးချုပ်ကထုတ်ပြန်ကြေငြာခဲ့ခြင်းဖြစ်ကာ မြန်မာ၊ကမ္ဘောဒီးယားနှင့်လာအိုနိုင်ငံများမှ ရွှေ့ပြောင်းလုပ်သားများအား အစိုးရသစ်တက်လာသည်အထိ နေထိုင်ခွင့်သက်တမ်းတိုးပေးထားကြောင်း ၎င်းကပြောကြားခဲ့သည်။

ယခုကိစ္စနှင့်ပတ်သက်၍ အလုပ်သမားဝန်ကြီးဌာန၏ လုပ်ဆောင်ချက်အား နောက်တက်လာမည့်အစိုးရအသစ်အတွက် ဝန်ထုပ်ဝန်ပိုးဖြစ်စေမည်ကိုစိုးရိမ်လျက် ထိုင်းအစိုးရအဖွဲ့သည် ပထမကငြင်းဆိုခဲ့သော်လည်း အကြိမ်ကြိမ်ဆွေးနွေးမှုများအရ လုပ်သားအင်အားပြတ်လပ်သွားမည်ကိုစိုးရိမ်ရသဖြင့် ခွင့်ပြုခဲ့ခြင်းဖြစ်ကြောင်း၎င်းကဆိုသည်။

ယခုကဲ့သို့ နေထိုင်မှုသက်တမ်းတိုးပေးခြင်းအား အစိုးရအသစ်တက်လာသည်အထိသာခွင့်ပြုသွားမည်ဖြစ်ပြီး အစိုးရအသစ်ဖွဲ့ပြီးသည်နှင့်တစ်ပြိုင်နက် ပြန်လည်ပြင်ဆင်သွားမည်ဖြစ်ကြောင်းလည်းပြောကြားခဲ့သည်။

အကယ်၍ယခုကဲ့သို့ ညှိနှိုင်းမှုမပြုလုပ်ပေးပါက ရဲတပ်ဖွဲ့များက ရွှေ့ပြောင်းလုပ်သားများကို စတင်ဖမ်းဆီးတော့မည်ဖြစ်ကာ လုပ်ငန်းရှင်များအနေဖြင့်လည်း လုပ်သားငှားရမ်းခွင့်ခက်ခဲသွားမည်ဖြစ်ကြောင်း ၎င်းကထောက်ပြပြောကြားခဲ့သည်။

Source : Khmertimes