ထိုင်းနိုင်ငံ၊ရတ်ချဘူရီခရိုင်တွင် ယာဥ်မတော်တ ဆမှုကြောင့် သေဆုံးသွားသည့် မြန်မာနိုင်ငံသား ကိုသန့်ဇင်ထွန်း(၂၉)နှစ်မှ ၎င်း၏ကိုယ်အင်္ဂါများအား လူ ၁၃ ဦးအတွက် လှူဒါန်းပေးခဲ့ကြောင်း သိရသည်။
ကိုသန့်ဇင်ထွန်းသည် ဇန်နဝါရီ ၃ ရက်က ဆိုင်ကယ်စီးနင်းလာစဥ် ပစ်ကပ်ကားတစ်စီး၏ဝင်တိုက်ခြင်းခံရပြီးနောက် ထိခိုက်ဒဏ်ရာများရရှိကာ သတိလစ်မေ့မြောနေ၍ ပါထော့ဆေးရုံမှတဆင့် ရတ်ချဘူရီခရိုင်ဆေးရုံသို့ လွှဲပြောင်းကုသမှုခံယူခဲ့ရသည်။
ရတ်ချဘူရီခရိုင်ဆေးရုံ၌ ဆေးကုသမှုခံယူခဲ့သော်လည်း သတိပြန်လည်ရရှိလာခြင်းမရှိ၍ ဦးနှောက်အား ဓာတ်မှန်ရိုက်ခြင်း၊လည်ပင်းရိုးစစ်ဆေးခြင်းများပြုလုပ်ခဲ့ပြီးနောက် နောက်ဆုံးအခြေအနေသို့ ရောက်ရှိခဲ့ကြောင်း သိရှိခဲ့ရသည်။
ထို့နောက် ခရိုင်ဆေးရုံဆရာဝန်အဖွဲ့မှ ကိုသန့်ဇင်ထွန်း၏ မိသားစုထံဆက်သွယ်၍ ကိုယ်အင်္ဂါအလှူ ခံရန်ဆက်သွယ်ခဲ့ခြင်း၊ကိုသန့်ဇင်ထွန်း၏ အသက်ရှိစဥ် ကိုယ်အင်္ဂါလှူဒါန်းရန် စိတ်ဆန္ဒရှိခဲ့ခြင်းတို့ကြောင့် မျက်လုံးတစ်စုံ၊အရိုးနှင့်တစ်ရှုး ၁၁ ခုတို့အား လှူဒါန်းနိုင်ခဲ့ကြောင်း သိရသည်။
ခရိုင်ဆေးရုံဆရာဝန်အဖွဲ့မှ ကိုသန့်ဇင်ထွန်း၏ လှူ ဒါန်းသည့်မျက်လုံးတစ်စုံအား ထိုင်းကြက်ခြေနီအ ဖွဲ့ချုပ်၊အရိုးနှင့်တစ်ရှူးများအား ဗန်ကောက်မြို့ရှိ တော်ဝင်ဇီဝတစ်ရှူးဌာနတို့ထံ ဆက်လက်လှူဒါန်းပေးခဲ့ကြောင်း သိရသည်။
ထို့ပြင် ခရိုင်ဆေးရုံမှ ကိုသန့်ဇင်ထွန်း၏ ကိုယ်ခန္ဓာလှူဒါန်းမှုအတွက် ဂုဏ်ပြုမှတ်တမ်းလွှာအား ကျန်ရစ်သူမိသားစုထံ ချီးမြှင့်ပေးအပ်ခဲ့ကြောင်း သိရသည်။
