ထိုင်းပို့ကုန်များအပေါ် အမေရိက၏ ၃၆ ရာခိုင်နှုန်း အခွန်စည်းကြပ်မှု၏ သက်ရောက်မှုကို လျော့ပါးသက်သာစေရေး ကြိုးပမ်းမှုတစ်စိတ်တစ်ပိုင်းအနေဖြင့် အမေရိကန်ပြည်ထောင်စုမှ စွမ်းအင်၊ လေယာဉ်နှင့် စိုက်ပျိုးရေးထွက်ကုန်များကိုတိုးမြှင့် တင်သွင်းသွားမည်ဟု အစိုးရက ကတိပြုခဲ့ကြောင်း ဝန်ကြီးချုပ် ပေတုံတန်ရှင်နာဝပ်ထရာက ပြောကြားသည်။
ဘဏ္ဍာရေးဝန်ကြီး ပီချေးချွန်ဟာဝဇီရာသည် ကိုယ်စားလှယ်အဖွဲ့တစ်ဖွဲ့ကို ဦးဆောင်ကာ ယခုသီတင်းပတ်တွင် အမေရိကသို့ သွားရောက်ပြီး ကုန်သွယ်ရေးဆိုင်ရာ ကိစ္စရပ်များကို ဆွေးနွေးမည်ဖြစ်ကြောင်းနှင့် ထိုင်းနိုင်ငံသည် အမေရိက၏ ပို့ကုန်နိုင်ငံတစ်ခုသာမဟုတ်ဘဲ ယုံကြည်စိတ်ချရသော မိတ်ဆွေနိုင်ငံဖြစ်ကြောင်းကိုလည်း အမေရိကကို ပြောပြမည်ဖြစ်ကြောင်းသတင်း ထုတ်ပြန်ချက်တွင် ဝန်ကြီးချုပ်က ပြောကြားခဲ့သည်။
သမ္မတထရမ့်ပ်၏ အခွန်စည်းကြပ်မှုအပေါ် တုန့်ပြန်ရာတွင် အထူးသဖြင့် အခြား အာဆီယံနိုင်ငံ ခေါင်းဆောင်များ၏ အလျင်အမြန်တုန့်ပြန်မှုနှင့် နှိုင်းယှဉ်ပါက နှေးကွေးနေခဲ့မှုအပေါ် ဝေဖန်မှုများထွက်လာပြီးနောက် တစ်ရက်အကြာတွင် သူ၏မှတ်ချက်များထွက်လာခြင်း ဖြစ်သည်။
အမေရိကသည် ထိုင်းပို့ကုန်များအပေါ် စည်းကြပ်ခွန် ၃၆ ရာခိုင်နှုန်း ချမှတ်ထားပြီး အခြားနိုင်ငံ အများအပြားသည်လည်း အလားတူအခြေအနေမျိုးတွင် ရှိနေကြောင်းနှင့် တုန့်ပြန်ရန် အစီအမံများပြင်ဆင်နေကြောင်း သူက ပြောဆိုခဲ့သည်။ “အခွန်စည်းကြပ်တဲ့ လုပ်ထုံးလုပ်နည်းတွေကတဆင့် ပြင်းထန်တဲ့ လက်တုန့်ပြန်မှုကို ကမ္ဘာက မြင်ရမယ်လို့ ကျွန်မတို့ ယူဆပါတယ်၊ နိုင်ငံအတော်များများက အမေရိကန်အစိုးရနဲ့ ဆွေးနွေးဖို့ ဆုံးဖြတ်ခဲ့ကြပေမယ့် ခိုင်လုံတဲ့ ရလဒ်တစ်ခုမှ မရခဲ့ပါဘူး” ဟု မစ္စပေတုံတန်က ပြောဆိုသည်။
အခွန်စည်းကြပ်မှုအသစ်သည် မိမိတို့ ပို့ကုန်များ အထူးအားဖြင့် အီလက်ထရွန်းနစ်၊ ပြုပြင်ထားသော အစားအစာများနှင့် စိုက်ပျိုးရေးထွက်ကုန်များအပေါ် သိသိသာသာ သက်ရောက်မှုရှိကြောင်း သူက ပြောသည်။
အစိုးရအနေဖြင့် ယင်းကိစ္စကို ဆွေးနွေးရန်၊ ပုဂ္ဂလိကကဏ္ဍမှ အဆိုပြုချက်များကို ထည့်သွင်းစဉ်းစားရန်နှင့် အမေရိကနှင့် တရားဝင်ရော အလွတ်သဘောအားဖြင့်ပါ ဆွေးနွေးရန် အလုပ်အဖွဲ့တစ်ဖွဲ့ ဖွဲ့စည်းထားသည်ဟု မစ္စပေတုံတန်က ပြောကြားခဲ့သည်။
Ref: ဘန်ကောက်ပို့စ်