ထိုင်ဝမ်ကို တရုတ်က ထိန်းချုပ်လာလျှင်တားဆီးရန်သည် သူ့အစိုးရ၏ မူဝါဒဖြစ်ပါသလားဆိုသော မေးခွန်းကို အမေရိကန်သမ္မတ ဒေါ်နယ်ထရမ့်ပ်က သူ မဖြေကြားလိုကြောင်း တုန့်ပြန် ပြောကြားခဲ့သည်။
“ဒီကိစ္စကို ငါ ဘယ်တော့မှ မှတ်ချက်မပေးပါဘူး” ဟု ဗုဒ္ဓဟူးနေ့က အိမ်ဖြူတော်တွင် ပြုလုပ်သည့် ဝန်ကြီးအဖွဲ့အစည်းအဝေးအတွင်း သတင်းထောက်တစ်ဦး၏ မေးမြန်းမှုကို ထရမ့်ပ်က တုန့်ပြန်ခဲ့သည်။ သူ့အနေဖြင့် ယင်းကိစ္စအပေါ် မှတ်ချက်ပေးရမည်ဆိုလျှင်ပင် သတင်းထောက်ကို ပြောပြမည် မဟုတ်ဟု သူက တုန့်ပြန်ခဲ့သည်။
မှတ်ချက်ပေးရန် ငြင်းဆန်မှုသည် ထိုင်ဝမ်ကို တရုတ်က ကျူးကျော်ခဲ့ပါက စစ်ရေးအရ ကြားဝင်ရလိမ့်မည်ဟု ထပ်ခါတလဲလဲ ပြောကြားခဲ့သော သမ္မတဟောင်း ဂျိုးဘိုင်ဒင်၏ ပြောဆိုချက်များနှင့် လုံး၀ ကွဲထွက်သွားခြင်းဖြစ်သည်။
အမေရိကသည် ထိုင်ဝမ်နှင့် ပတ်သက်၍ တိကျပြတ်သားသော လုံခြုံရေးအာမခံချက်တစ်ရပ်ပေးရေးကို အစဉ်အလာအားဖြင့် ရှောင်ရှားခဲ့ပြီး မရေရာသော မူဝါဒကိုသာ ကိုင်စွဲခဲ့သည်။ ၁၉၇၉ ခုနှစ် ထိုင်ဝမ်ဆက်ဆံရေးအက်ဥပဒေအရ လက်ရှိအနေအထားကို တစ်ဖက်သတ် ပြောင်းလဲမှုမျိုးကို ဆန့်ကျင်ရန်နှင့် ကိုယ့်ကိုယ်ကို ကာကွယ်ရေးအတွက် ထိုင်ဝမ်ကို အရင်းအမြစ်များ ပံ့ပိုးပေးရန် ပြဌာန်းထားပြီး အမေရိက,က ကြားဝင်စွက်ဖက်ရမည်ဟု အတိအလင်းဖော်ပြထားခြင်း မရှိပေ။
အကာအကွယ်ပေးရမှုအတွက် ထိုင်ဝမ်က မိမိတို့ကို အခကြေးငွေ ပေးသင့်သည်ဟု မဲဆွယ်စည်းရုံးရေးကာလအတွင်းက Bloomberg သတင်းဌာနနှင့် အင်တာဗျူးတွင် ထရမ့်ပ်က ပြောဆိုထားသည်။
တရုတ်သမ္မတ ရှီကျင့်ဖျင်နှင့် ကောင်းမွန်သော ဆက်ဆံရေးရှိသည်ဟု ဗုဒ္ဓဟူးနေ့တွင် ထရမ့်ပ်က ပြောကြားခဲ့ပြီး ပေကျင်းနှင့် ကုန်သွယ်မှု တိုးတက်လာမည်ဟု မျှော်လင့်ကြောင်း ဆိုခဲ့သည်။
“ တရုတ်နဲ့ ကျွန်တော်တို့ရဲ့ ဆက်ဆံရေးက အရမ်းကောင်းလာပါလိမ့်မယ်” ဟု ထရမ့်ပ်က ပြောကြားခဲ့သည်။
Ref: ဘန်ကောက်ပို့စ်