ထရမ့်ပ်၏ ငြိမ်းချမ်းရေးဘုတ်အဖွဲ့ဝင်ကြေး ဒေါ်လာ ၁ ဘီလျံကို အင်ဒိုက မပေးပါ–ပရာဘိုဝို

           
အမေရိကန်သမ္မတ ဒေါ်နယ်ထရမ့်ပ်၏ ငြိမ်းချမ်းရေးဘုတ်အဖွဲ့တွင်ပါဝင်ရန် လက်မှတ်ရေးထိုးခဲ့ခြင်းအတွက် ပြည်တွင်း၌ ဝေဖန်မှုများခံနေရသော အင်ဒိုနီးရှားသမ္မတက ၎င်း၏ နိုင်ငံသည် အမြဲတမ်းအဖွဲ့ဝင်ဖြစ်ရေးအတွက် ဝင်ကြေး ဒေါ်လာ ၁ ဘီလျံကို ပေးဆောင်မည်မဟုတ်ကြောင်း အခိုင်အမာပြောကြာခဲ့သည်။
     
ဂျကာတာသည် အဆိုပါအစီအစဉ်အတွက် ငြိမ်းချမ်းရေးထိန်းသိမ်းရေးတပ်ဖွဲ့များကို စေလွှတ်ရန်သာ ကတိပြုခဲ့ကြောင်း သမ္မတ ပရာဘိုဝိုဆူဘီယန်တိုက တနင်္ဂနွေနေ့က သမ္မတ၏ ယူကျူ့ဘ်ချန်နယ်တွင် ထုတ်ပြန်ခဲ့သော ကြေညာချက်တွင် ပြောကြားခဲ့သည်။
        
ထရမ့်ပ်အစိုးရသည် ဂါဇာတွင် ၂ နှစ်ကြာလာသော ပြင်းထန်သည့် စစ်ပွဲကို ရပ်တန့်စေရန်အတွက် အပစ်အခတ်ရပ်စဲရေးညှိနှိုင်းပြီးနောက် ကာတာ၊ အီဂျစ်တို့နှင့် ပူးပေါင်း၍ အောက်တိုဘာလတွင် ငြိမ်းချမ်းရေးဘုတ်အဖွဲ့ကို ဖွဲ့စည်းခဲ့သည်။
       
ဘုတ်အဖွဲ့၏ အမြဲတမ်းအဖွဲ့ဝင်ဖြစ်လိုသော နိုင်ငံများသည် ဒေါ်လာ ၁ ဘီလျံပေးဆောင်ရမည်ဖြစ်ပြီး အဆိုပါဘုတ်အဖွဲ့သည် ကုလသမဂ္ဂလုံခြုံရေးကောင်စီ၏ ငွေပေးချေသည့်ပုံစံဖြစ်လာနိုင်ကြောင်း ဝေဖန်မှုများ ထွက်ပေါ်ခဲ့သည်။
       
ဗိုလ်ချုပ်ကြီးဟောင်းတစ်ဦးဖြစ်သော ပရာဘိုဝိုသည် ဘုတ်အဖွဲ့တွင် ပါဝင်ခြင်းနှင့် ဂါဇာသို့ ငြိမ်းချမ်းရေးထိန်းသိမ်းရေးတပ်ဖွဲ့ဝင် ၈,၀၀၀ စေလွှတ်ရန် ကတိပြုခဲ့ခြင်းအတွက် အင်ဒိုနီးရှားမွတ်ဆလင်အဖွဲ့အစည်းများ၏ ဝေဖန်မှုကို ခံခဲ့ရသည်။
        
ပရာဘိုဝိုသည် ပြီးခဲ့သည့်လက ဝါရှင်တန်တွင် ကျင်းပခဲ့သော ငြိမ်းချမ်းရေးဘုတ်အဖွဲ့၏ ပထမဆုံးအစည်းအဝေးကို တက်ရောက်ခဲ့သည်။
     
သို့သော်လည်း ပါလက်စတိုင်းများအတွက် အကျိုးကျေးဇူးများမရှိလျှင် သို့မဟုတ် အင်ဒိုနီးရှား၏ နိုင်ငံတော်အကျိုးစီးပွားများနှင့် မကိုက်ညီပါက ဘုတ်အဖွဲ့မှ နုတ်ထွက်မည်ဖြစ်ကြောင်း နောက်ပိုင်းတွင် ပြောဆိုခဲ့သည်။
      
“ကျွန်တော်တို့ ဒေါ်လာ ၁ ဘီလျံထည့်ဝင်လိုတယ်လို့ ဘယ်တုန်းကမှ မပြောခဲ့ပါဘူး” ဟု တနင်္ဂနွေနေ့က ၎င်း၏ ယူကျူ့ချန်နယ်တွင် ထုတ်လွှင့်ခဲ့သော ကြေညာချက်၌ ပရာဘိုဝိုက ပြောကြားခဲ့သည်။
      
ငွေကြေးဆိုင်ရာ ကတိကဝတ်များ လုံးဝမလုပ်ခဲ့ကြောင်း ၎င်းက ပြောဆိုခဲ့သည်။

Ref: သည်အိတ်စ်ပရက်စ်ထရီဗြွန်း