ထရမ့်ပ်၏ ငြိမ်းချမ်းရေးဘုတ်အဖွဲ့မှာ အစ္စရေးပါမည်–နေတန်ယာဟု

အမေရိကန်သမ္မတ ဒေါ်နယ်ထရမ့်ပ်၏ ငြိမ်းချမ်းရေးဘုတ်အဖွဲ့အစီအစဉ်တွင် အစ္စရေးနိုင်ငံပါဝင်မည်ဖြစ်ကြောင်း ဝန်ကြီးချုပ် ဘင်ဂျမင်နေတန်ယာဟုက ဗုဒ္ဓဟူးနေ့ ဝါရှင်တန်ခရီးစဉ်အတွင်း ထရမ့်ပ်၊ နိုင်ငံခြားရေးဝန်ကြီး မာကိုရူဘီယိုတို့နှင့် တွေ့ဆုံစဉ် ပြောကြားခဲ့သည်။

ဗုဒ္ဓဟူးနေ့တွင် ရူဘီယိုနှင့် တွေ့ဆုံပြီးနောက် အစ္စရေး၏ ငြိမ်းချမ်းရေးဘုတ်အဖွဲ့ဝင်အဖြစ် ဝင်ရောက်ခြင်းကို လက်မှတ်ရေးထိုးခဲ့သည် ဟု နေတန်ယာဟုက X ပေါ်တွင် တင်ခဲ့သည်။

နေတန်ယာဟုသည် ထရမ့်ပ်နှင့် အီရန်အရေး ဆွေးနွေးရန် ဝါရှင်တန်သို့ ရောက်ရှိနေခဲ့ခြင်းဖြစ်သည်။

နိုဝင်ဘာလလယ်တွင် အတည်ပြုခဲ့သော ကုလသမဂ္ဂလုံခြုံရေးကောင်စီ၏ ဆုံးဖြတ်ချက်တွင် ဂါဇာဒေသ၌ နိုင်ငံတကာတည်ငြိမ်ရေးတပ်ဖွဲ့တစ်ခု ထူထောင်ရန် ဘုတ်အဖွဲ့နှင့် ၎င်းနှင့်အတူ လုပ်ဆောင်သော နိုင်ငံများကို ခွင့်ပြုချက်ပေးခဲ့သည်။ ထရမ့်ပ်၏ အစီအစဉ်အရ အစ္စရေးနှင့် ပါလက်စတိုင်းစစ်သွေးကြွအဖွဲ့ ဟားမတ်စ်တို့ လက်မှတ်ရေးထိုးခဲ့သော အတိမ်းအစောင်းမခံသည့် ဂါဇာအပစ်အခတ်ရပ်စဲမှုသည် အောက်တိုဘာလတွင် စတင်အကျိုးသက်‌ရောက်ခဲ့သည်။

ထရမ့်ပ်၏ ဂါဇာစီမံကိန်းအရ ဘုတ်အဖွဲ့သည် ဂါဇာ၏ ယာယီအုပ်ချုပ်ရေးကို ကြီးကြပ်ရန် ရည်ရွယ်ထားသည်။ ထို့နောက်တွင် ထရမ့်ပ်က ၎င်းဥက္ကဌအဖြစ် တာဝန်ယူထားသော ဘုတ်အဖွဲ့ကို ကမ္ဘာလုံးဆိုင်ရာ ပဋိပက္ခများကို ကိုင်တွယ်ဖြေရှင်းရန် တိုးချဲ့မည်ဟု ပြောကြားထားသည်။

ဘုတ်အဖွဲ့၏ ပထမဆုံးအစည်းအဝေးကို ဖေဖော်ဝါရီလ ၁၉ ရက်‌နေ့တွင် ဝါရှင်တန်၌ ပြုလုပ်မည်ဖြစ်ပြီး ဂါဇာပြန်လည်တည်ဆောက်ရေးနှင့်ပတ်သက်၍ ဆွေးနွေးမည်ဖြစ်သည်။

ထရမ့်ပ်သည် နိုင်ငံခြားနယ်မြေတစ်ခု၏ ကိစ္စရပ်များကို ကြီးကြပ်မည့် ဘုတ်အဖွဲ့တစ်ခုကို ဦးဆောင်ခြင်းသည် ကိုလိုနီဖွဲ့စည်းပုံနှင့် ဆင်တူသည်ဟု လူ့အခွင့်အရေးကျွမ်းကျင်သူများက ပြောသည်။ ဘုတ်အဖွဲ့တွင် ပါလက်စတိုင်းလူမျိုးမပါဝင်သောကြောင့် အစ္စရေး၏ ပါဝင်မှုသည် ဝေဖန်မှုများကို ပိုမိုဖြစ်ပေါ်စေမည်ဟု မျှော်လင့်ရသည်။

Ref: အင်န်ဒီတီဗီ