ဂျပန်နိုင်ငံခြားရေးဝန်ကြီး တာကီရှီ အီဝါယာသည် ဇန်နဝါရီ ၂၀ ရက်တွင် ကျင်းပပြုလုပ်မည့် ဒေါ်နယ်ထရမ့်ပ်၏ သမ္မတကျမ်းသစ္စာကျိန်ဆိုပွဲ အခမ်းအနားကို တက်ရောက်မည်ဖြစ်သည်ဟု အစိုးရသတင်းရင်းမြစ်တစ်ခုက သောကြာနေ့တွင် ဖေါ်ပြလိုက်သည်။ အာရှနိုင်ငံသည် ၎င်း၏ အရေးပါဆုံး မဟာမိတ်နိုင်ငံ၏ နောက်တက်မည့်အစိုးရအဖွဲ့နှင့် ဆက်ဆံရေးတည်ဆောက်ရန် အလောသုံးဆယ် ဆောင်ရွက်နေခြင်းဖြစ်သည်။
အမေရိကန်သမ္မတအဖြစ် ဒုတိယအကြိမ် ကျမ်း သစ္စာကျိန်ဆိုပြီးနောက်တွင် ဂျပန်ဝန်ကြီးချုပ် ရှီဂီရူ အီရှီဘာနှင့် ထရမ့်ပ်တို့အကြား ဆွေးနွေးမှုများအတွက် အုတ်မြစ်ခင်းရန် ရည်ရွယ်သော ခရီးစဉ်ဖြစ်သည်။ ဂျပန်အစိုးရသည် ကျမ်းသစ္စာကျိန်ဆိုပွဲသို့ တက်ရောက်ရန် ဖိတ်ကြားချက်ကို လက်ခံရရှိထားသည်ဟု သတင်းရင်းမြစ်က ပြောဆိုသည်။
အီဝါယာသည် သူ၏ အမေရိကခရီးစဉ်အတွင်း အမေရိကန်နိုင်ငံခြားရေးဝန်ကြီးအဖြစ် အမည်စာရင်းလျာထားတင်သွင်းထားသော အထက်လွှတ်တော်၏ အတည်ပြုချက်ကို စောင့်ဆိုင်းနေသော အထက်လွှတ်တော်အမတ် မာကို ရူဘီယိုနှင့် ဆွေးနွေးသွားနိုင်ရေးကိုရည်ရွယ်ထားသည်ဟုလည်း ယင်းသတင်းရင်းမြစ်က ပြောဆိုခဲ့သည်။
ဝန်ကြီးချုပ် အီရှီဘာသည် တနင်္လာနေ့က သူ၏ နှစ်သစ် ပထမဆုံးသတင်းစာရှင်းလင်းပွဲတွင် ပြောဆိုရာ၌ ထရမ့်ပ်နှင့် အသင့်တော်ဆုံး အခြေအနေ အချိန်အခါတွင် တွေ့ဆုံရန် သူ ရည်ရွယ်ထားကြောင်းဆိုခဲ့သော်လည်း အချိန်ကာလသတ်မှတ်ချက်ကို ထုတ်ပြောခဲ့ခြင်းမရှိပေ။
Ref: ကျိုဒိုနူးစ်