ထရမ့်ပ်အော်ဂန်နိုက်ဇေးရှင်းနှင့် မိတ်ဖက်ကုမ္ပဏီ၏ ဒေါ်လာ ၁ ဒဿမ ၅ ဘီလျံဖိုး ရင်းနှီးမြှုပ်နှံမှုကို ဗီယက်နမ် ခွင့်ပြု

ဂေါက်ကွင်းများ၊ ဟိုတယ်များနှင့် အိမ်ခြံမြေစီမံကိန်းများတွင် ဒေါ်လာ ၁ ဒဿမ ၅ ဘီလျံရင်းနှီးမြှုပ်နှံမည့် ထရမ့်ပ်အော်ဂန်နိုက်ဇေးရှင်းနှင့် မိတ်ဖက်ကုမ္ပဏီတစ်ခု၏ အစီအစဉ်ကို ဗီယက်နမ်အစိုးရက အတည်ပြုချက်ပေးလိုက်သည်ဟု နိုင်ငံပိုင် Tuoi Tre သတင်းစာက သောကြာနေ့တွင် သတင်းဖော်ပြခဲ့သည်။

မြေ ၂,၄၄၆ ဧကပေါ်တွင် စီစဉ်ထားသော အဆိုပါ ပရောဂျက်တွင် ဂေါက်ကွင်းများ၊ အပန်းဖြေစခန်းများ၊ ဟိုတယ်များနှင့် ခေတ်မီလူနေအိမ်ရာစီမံကိန်းတို့ ပါဝင်မည်ဖြစ်သည်။ ရင်းနှီးမြှုပ်နှံမှုသည် ယခုသုံးလပတ်မှ စတင်ကာ ၂၀၂၉ ခုနှစ် ဒုတိယသုံးလပတ်အထိ လည်ပတ်ဆောင်ရွက်သွားမည်ဟု မျှော်လင့်ရကြောင်း ဒုတိယဝန်ကြီးချုပ် Tran Hong Ha လက်မှတ်ရေးထိုးထားသော စာရွက်စာတမ်းကို ကိုးကား၍ သတင်းစာက ဖော်ပြခဲ့သည်။

အမေရိကန်သမ္မတ ဒေါ်နယ်ထရမ့်ပ်၏ မိသားစုစီးပွားရေးလုပ်ငန်း၏ ဗီယက်နမ်မိတ်ဖက်ကုမ္ပဏီဖြစ်သော အိမ်ခြံမြေလုပ်ငန်း Kinhbac City သည် အဆိုပါစီမံကိန်းကို အောက်တိုဘာလတွင် ကြေညာခဲ့သည်။

ယခုသတင်းနှင့် ပတ်သက်၍ မှတ်ချက်ပေးရန် တောင်းဆိုမှုကို ထရမ့်ပ်အော်ဂန်နိုက်ဇေးရှင်း နှင့် ဗီယက်နမ်အစိုးရတို့က လောလောဆယ်တွင် တုန့်ပြန်ဖြေကြားခြင်း မရှိသေးပေ။

ဗီယက်နမ်နှင့် အမေရိကတို့အကြား ကုန်သွယ်မှုဆိုင်ရာ စေ့စပ်ညှိနှိုင်းမှုများလုပ်နေသည့် အချိန်ကာလတွင် ယခုစီမံကိန်းအတည်ပြုချက် ထွက်လာခြင်းဖြစ်သည်။ စက်မှုလုပ်ငန်းဗဟိုချက်ဖြစ်သော ဗီယက်နမ်နိုင်ငံသည် အမေရိက၏ သွင်းကုန်ခွန် ၄၆ ရာခိုင်နှုန်းသတ်မှတ်ခံထားရမှုကို ရှောင်လွှဲနိုင်ရေး နည်းလမ်းရှာနေခဲ့သည်။

Ref: ယူအက်စ်နူးစ်