ထရမ့်ပ်ကို ချီတက်ဆန္ဒပြစဉ် ဝါရှင်တန်ဒီစီ၌ စစ်ရေးပြပွဲပြုလုပ်

အမေရိကန်ပြည်ထောင်စုသမ္မတဒေါ်နယ်ထရမ့်ပ်သည် နှစ်ပေါင်းများစွာ လိုလားစောင့်စားခဲ့သည့် စစ်ရေးပြပွဲကြီးကို စနေနေ့တွင် တင့်ကားတပ်များ၊ စစ်သည်များ၊ ေ-သနတ် ၂၁ ချက် ပစ်ဖောက်အလေးပြုမှုတို့ဖြင့် ပြုလုပ်ခဲ့ပြီး အမေရိကခေါင်းဆောင်ကို အာဏာရှင်တစ်ဦး၊ ဘုရင်လုပ်လာမည့်သူတစ်ဦးအဖြစ် နိုင်ငံတစ်ဝန်း ကဋ့်ကွက်ဆန္ဒပြသူများကို တန်ပြန်သည့် အခမ်းအနားတစ်ခုအဖြစ် ကျင်းပခဲ့သည်။

၎င်း၏ ၇၉ နှစ်မြောက်မွေးနေ့တွင် ရီပတ်ဘလီကန်သမ္မတသည် အိမ်ဖြူတော် အထူးကြည့်ရှု့ဆောင်မှနေ၍ အမေရိကန်စစ်တပ်၏ အင်အားပြမှုကို ကြည့်ရှုခဲ့သည်။ တပ်ဖွဲ့ဝင် ၆,၀၀၀ ကျော်နှင့် တင့်ကား ၁၂၈ စီးဖြင့် စီတန်းလှည့်လာခြင်းအခမ်းအနားသည် ၂၀၁၇ ခုနှစ်အတွင်းက ပါရီတွင် ယင်းကဲ့သို့ စစ်ရေးပြအခမ်းအနားကို မြင်တွေ့ခဲ့ရပြီးနောက် ၎င်း၏ ပထမသက်တမ်းတွင် ထိုကဲ့သို့ အခမ်းအနားမျိုးလုပ်ရန် ကြိုးပမ်းခဲ့သော်လည်း မဖြစ်မြောက်ခဲ့ဘဲ အမေရိကန်စစ်တပ်၏ ၂၅၀ ပြည့်နှစ်ပတ်လည်နှင့် ကြုံကြိုက်ချိန်နှင့်တိုက်ဆိုင်ကာ ပြုလုပ်ခဲ့သည့် ပွဲဖြစ်သည်။

“အခြားနိုင်ငံတိုင်းက သူတို့ရဲ့ အောင်ပွဲတွေကို ဂုဏ်ပြုကြတယ်။ အမေရိကလည်း ဒီလိုလုပ်ရမယ့် အချိန်ရောက်ပြီ” ဟု စစ်ရေးပြပွဲအပြီးတွင် ထရမ့်ပ်က ပြောကြားခဲ့သည်။

စစ်ရေးပြ ချီတက်ပွဲ အခမ်းအနားသို့ လူဦးရေ ၂၀၀,၀၀၀ တက်ရောက်လိမ့်မည်ဟု အစောပိုင်းက ခန့်မှန်းထားသော်လည်း တက်ရောက်သူဦးရေသည် ခန့်မှန်းသည်ထက် များစွာနည်းပါးခဲ့ပုံရသည်။ ယင်းသို့ တက်ရောက်သူဦးရေ နည်းပါးရခြင်းမှာ ယင်းနေ့၏ စိုစွတ်သော ရာသီဥတုနှင့် မိုးကြိုးမုန်တိုင်းအန္တာရာယ်ကြောင့် ဖြစ်ဖွယ်ရှိသည်။

စစ်ရေးပြပွဲမစမီ နာရီပိုင်းအလိုတွင် နိုင်ငံတစ်ဝန်း ဆန္ဒပြသူများသည် လမ်းများ၊ ပန်းခြံများဆီသို့ ရောက်ရှိလာကြကာ ရီပတ်ဘလီကန် သမ္မတကို ဆန့်ကျင် ကန့်ကွက်ဆန္ဒပြခဲ့ကြသည်။ ထရမ့်ပ်၏ နေရပ်ပြန်ပို့ခြင်း အစီအစဉ်များအပေါ် ကန့်ကွက်ဆန္ဒပြသူများကို စစ်တပ်အင်အားကိုသုံး၍ တုန့်ပြန်ခဲ့ခြင်း၊ အမေရိကန်မြို့တော်တွင် စစ်အင်အားထုတ်ပြခြင်းများအတွက် ထရမ့်ပ်ကို ၎င်းတို့က ဝေဖန်ခဲ့ကြသည်။

Ref: အေပီ