တောင်းဆိုချက်များကိုလိုက်လျောလျှင် အီးယူ နျူသဘောတူညီချက်ကို ပြန်အသက်သွင်းမည့်အဆိုပြုချက်ကို အီရန် လက်ခံမည်

တောင်းဆိုချက်များကိုလိုက်လျောလျှင် အီးယူ နျူသဘောတူညီချက်ကို ပြန်အသက်သွင်းမည့်အဆိုပြုချက်ကို အီရန် လက်ခံမည်

ဒူဘိုင်း၊ ဩဂုတ် ၁၂ ရက်

တေရန်၏ အဓိကတောင်းဆိုချက်များကို အာမခံချက်ပေးမည်ဆိုပါက ၂၀၁၅ ခုနှစ် အီရန်နျူကလီးယားသဘောတူညီချက်ကို ပြန်လည်အသက်သွင်းမည့် ဥရောပသမဂ္ဂ၏ အဆိုပြုချက်ကို လက်ခံနိုင်မည်ဟု နိုင်ငံပိုင်သတင်းအေဂျင်စီ IRNA က ဩဂုတ်လ ၁၂ ရက် သောကြာနေ့တွင် ပြောကြားခဲ့သည်။

ဥရောပသမဂ္ဂက ဗီယင်နာ၌ အမေရိကနှင့် အီရန်အရာရှိများအကြား လေးရက်ကြာ  ဆွေးနွေးပြောဆိုမှုများအပြီးတွင် နောက်ဆုံးစာသားကို အဆိုတင်သွင်းခဲ့ကြောင်း တနင်္လာနေ့က ပြောကြားခဲ့သည်။

ဥရောပသမဂ္ဂအကြီးတန်းအရာရှိတစ်ဦးက ၁၅ လကြာ ညှိနှိုင်းမှု ပြုလုပ်ခဲ့ရသည့် အဆိုပါ နောက်ဆုံးအဆိုပြုချက်နှင့် ပတ်သက်၍ အပြောင်းအလဲများ ထပ်မံပြုလုပ်နိုင်မည်မဟုတ်ကြောင်း၊ ရက်သတ္တပတ်အနည်းငယ်အတွင်း ပါတီများထံမှ နောက်ဆုံး ဆုံးဖြတ်ချက် ပြုလုပ်မည်ကို မျှော်လင့်နေကြောင်း ပြောကြားခဲ့သည်။

အီရန်သံတမန်က တေရန်သည် အဆိုပါအဆိုပြုချက်ကို ပြန်လည်သုံးသပ်နေပြီဖြစ်ကြောင်း၊ အကာအကွယ်များ၊ ပိတ်ဆို့အရေးယူမှုများနှင့် အာမခံချက်များဆိုင်ရာ ကိစ္စရပ်များအတွက် အီရန်ကိုအာမခံပေးမည်ဆိုပါက ဥရောပ သမဂ္ဂ ၏ အဆိုပြုချက်များကို လက်ခံနိုင်ဖွယ်ရှိကြောင်း ပြောကြားခဲ့သည်ကို ကိုးကား၍ IRNA က ဖော်ပြထားသည်။

အီရန်နိုင်ငံသည် အဆိုပါ နျူကလီးယား သဘောတူညီချက်ကို ပြန်လည်အသက်သွင်းမည်ဆိုပါက အနာဂတ်တွင် မည်သည့် အမေရိကန်သမ္မတကမှ နုတ်ထွက် ဖျက်သိမ်းခွင့် မရနိုင်မည့် အာမခံချက်မျိုးရရှိရန် ကြိုးပမ်းလျက်ရှိသည်။ 

သမ္မတ ဒေါ်နယ်ထရမ့်သည် ၂၀၁၈ ခုနှစ်၌ အီရန်၏ နျူကလီးယား သဘောတူညီချက်မှ နုတ်ထွက်ကာ အီရန်အပေါ် ပြင်းထန်သည့် ဒဏ်ခတ်ပိတ်ဆို့မှုများ ပြန်လည် ပြုလုပ်ခဲ့ဖူးသည်။

သို့ရာတွင် အဆိုပါ သဘောတူညီချက်သည်ဥပဒေကြောင်းအရအရေးယူဆောင်ရွက်နိုင်သောစာချုပ်မဟုတ်ဘဲ နိုင်ငံရေးအရ နားလည်မှုသဘောမျိုးသာဖြစ်သောကြောင့် သမ္မတ ဂျိုးဘိုင်ဒင်ကယင်းကဲ့သို့သော အာမခံချက်မျိုး ပေးစွမ်းနိုင်ခြင်း မရှိပေ။

ဥရောပသမဂ္ဂ၏ အဆိုပြုချက်များအပေါ် အခြေခံ၍ အထက်ပါ သဘောတူညီချက်၌ လက်မှတ်ရေးထိုးရန် အဆင်သင့် ဖြစ်နေပြီဟု ဝါရှင်တန်က ဆိုသည်။

အီရန်အရာရှိများက ၎င်းတို့၏ နောက်ထပ်အမြင်များနှင့် ထည့်သွင်းစဉ်းစားမှုများ ကို ဥရောပသမဂ္ဂထံ တင်ပြမည်ဟု ပြောကြားခဲ့သည်။

Source: Reuters