တရုတ်နိုင်ငံရှိ လုပ်ငန်းရှင်များက မြန်မာနိုင်ငံမှ ထွက်ရှိသည့် ပြောင်းဖူးများကို B2B (Business to Business) စနစ်ဖြင့် ကာလရှည် ဝယ်ယူတင်သွင်းရန် စိတ်ဝင်စားမှုရှိနေကြောင်း ကူမင်းမြို့ရှိ မြန်မာကောင်စစ်ဝန်ချုပ်ရုံး၏ ထုတ်ပြန်ချက်အရ သိရသည်။
China Kunming ASEAN Association က မြန်မာနိုင်ငံမှ ပြောင်းဖူးများကို တရုတ်နိုင်ငံသို့ လစဉ် ကာလရှည်တင်သွင်းလိုကြောင်း ကူမင်းမြို့ရှိ မြန်မာကောင်စစ်ဝန်ချုပ်ရုံးထံ ဆက်သွယ်အကြောင်းကြားခဲ့ခြင်းဖြစ်သည်။
ယင်းအသင်းအနေဖြင့် မြန်မာ့ပို့ကုန်လုပ်ငန်းရှင်များနှင့် B2B စာချုပ်များ ချုပ်ဆိုကာ လစဉ်ပုံမှန် ဝယ်ယူတင်သွင်းလိုကြောင်းနှင့် လက်ရှိဈေးနှုန်းများကို သိရှိလိုကြောင်းလည်း အသိပေးထားသည်။
ထို့ကြောင့် မြန်မာနိုင်ငံရှိ ပြောင်းစိုက်ပျိုးထုတ်လုပ်သူများနှင့် တင်ပို့သူများအနေဖြင့် အရည်အသွေးနှင့် စံချိန်စံညွှန်းများနှင့် ကိုက်ညီသည့် ပြောင်းဖူးများကို တင်ပို့ရောင်းချလိုပါက သက်ဆိုင်ရာ တာဝန်ရှိသူများထံ ဆက်သွယ်နိုင်ကြောင်း ကောင်စစ်ဝန်ချုပ်ရုံးက အသိပေးထားသည်။
မြန်မာနိုင်ငံပြောင်းလုပ်ငန်းအသင်း၏ ခန့်မှန်းချက်အရ ၂၀၂၆-၂၀၂၇ ဘဏ္ဍာရေးနှစ်အတွင်း ပြည်ပဈေးကွက်များသို့ မြန်မာ့ပြောင်း တန်ချိန် ၁.၃ သန်းကျော် တင်ပို့နိုင်ရန် မျှော်မှန်းထားကြောင်း သိရသည်။
လက်ရှိတွင် မြန်မာ့ပြောင်းဖူးများကို ထိုင်း၊ ဖိလစ်ပိုင်နှင့် အိန္ဒိယနိုင်ငံများသို့ အဓိကတင်ပို့လျက်ရှိပြီး တရုတ်ဈေးကွက်မှ ကာလရှည် ဝယ်လိုအား တိုးလာခြင်းသည် ပြောင်းစိုက်တောင်သူများနှင့် တင်ပို့ရောင်းချသူများအတွက် ဈေးကွက်အခွင့်အလမ်းသစ်တစ်ရပ် ဖြစ်လာနိုင်ကြောင်း သိရသည်။