တရုတ်နှင့်အိန္ဒိယပို၍လက်တွေ့ကျကျပူးပေါင်းဆောင်ရွက်သင့်–ဟန်ကျန်း

            
တရုတ်နှင့် အိန္ဒိယနိုင်ငံတို့သည် လက်တွေ့ကျသော ပူးပေါင်းဆောင်ရွက်မှုကို တဖြည်းဖြည်းချင်းမြှင့်တင်သင့်သည်ဟု တနင်္လာနေ့တွင် တရုတ် ဒုတိယသမ္မတ ဟန်ကျန်းက အိန္ဒိယနိုင်ငံခြားရေးဝန်ကြီး အက်စ် ဂျေးရှန်ကာကို ပြောကြားခဲ့သည်ဟု တရုတ်အစိုးရပိုင် သတင်းဌာနက ဖော်ပြခဲ့သည်။ 
          
ပေကျင်းတွင် တွေ့ဆုံဆွေးနွေးခဲ့ရာတွင် နှစ်နိုင်ငံစလုံး၏ စိုးရိမ်မကင်းမှုများကို အပြန်အလှန်အလေးထားသင့်ကြောင်းနှင့် နှစ်နိုင်ငံဆက်ဆံရေးက တဖြည်းဖြည်းချင်း ဖွံ့ဖြိုးတိုးတက်ရေးကို မြှင့်တင်ဆောင်ရွက်သင့်ကြောင်း ဟန်က ပြောကြားခဲ့သည်ဟုလည်း ရှင်းဟွာက ဖော်ပြခဲ့သည်။
         
အိန္ဒိယနိုင်ငံခြားရေးဝန်ကြီးသည် ဇူလိုင်လ ၁၅ ရက်နေ့တွင် တရုတ်နိုင်ငံမြောက်ပိုင်း တီယန်ကျင်းတွင် ပြုလုပ်သည့် ရှန်ဟိုင်း ပူးပေါင်းဆောင်ရွက်ရေးအဖွဲ့(SCO) အောက်ရှိ ဒေသတွင်း လုံခြုံရေးအစည်းအဝေးကို တက်ရောက်နေခြင်းဖြစ်ကာ အစည်းအဝေးပြင်ပ၌ နှစ်ဖက် ဆွေးနွေးပွဲများ ကို ကျင်းပလျက်ရှိသည်။
         
ဒုတိယသမ္မတ ဟန်နှင့် အစည်းအဝေးအဖွင့်အမှာစကား ပြောကြားရာတွင် ဂျေးရှန်ကာက အိန္ဒိယနှင့် တရုတ်နိုင်ငံအကြား သံတမန်ဆက်ဆံရေး ၇၅ နှစ်ပြည့် နှစ်ပတ်လည်ကို ချီးကျူးဂုဏ်ပြုခဲ့ပြီး မိမိတို့နှစ်နိုင်ငံ ဆက်ဆံရေးကို ပုံမှန်ထိန်းသိမ်းထားရှိခြင်းသည် နှစ်ဦးနှစ်ဖက် အကျိုးရှိသော ရလဒ်များထွက်ပေါ်နိုင်သည်ဟု ပြောကြားခဲ့သည်။
        
ပိုမိုရှုပ်ထွေးလားနေသော နိုင်ငံတကာ အခြေအနေတွင် အိန္ဒိယနှင့် တရုတ်နိုင်ငံတို့အကြား အတွေးအကြံနှင့် အမြင်များကို ပွင့်လင်းမြင်သာစွာ ဖလှယ်ရန် ၎င်းက တောင်းဆိုခဲ့သည်။
         
တရုတ်နိုင်ငံ၏ SCO ခေါင်းဆောင်မှုကို အိန္ဒိယက ထောက်ခံကြောင်း X တွင်တင်ခဲ့သော ပို့စ်တွင် ဂျေးရှန်ကာက ထုတ်ဖော်ခဲ့ပြီး နှစ်နိုင်ငံဆက်ဆံရေး တိုးတက်မှုများကို မှတ်ချက်ပြု
‌ပြောကြားခဲ့သည်။
          
၎င်း၏ ခရီးစဉ်အတွင်း ဆွေးနွေးမှုများတွင် အပြုသဘောဆောင်သောလမ်းကြောင်းကို ထိန်းသိမ်းထားနိုင်မည်ဟု ယုံကြည်ကြောင်းလည်း နိုင်ငံခြားရေးဝန်ကြီးက ထုတ်ဖော်ပြောကြားခဲ့သည်။ Ref: ယူအက်စ်နူးစ်, ဒီဒဗလျူ