နေပြည်တော်၌ မနက်ဖြန် မတ် ၂၇ ရက်တွင်ကျင်းပမည့် နှစ်(၈ဝ)ပြည့် တပ်မတော်နေ့အခမ်းအနားသို့ တက်ရောက်မည့် ဗိုလ်ချုပ်ကြီးသိန်းစိန်အပါအဝင် အငြိမ်းစားတပ်မတော်အရာရှိကြီးများအား နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်နှင့် ဇနီးတို့ဦးဆောင်၍ ဂါရဝပြုကန်တော့ခဲ့ကြသည်။
အဆိုပါ အငြိမ်းစားတပ်မတော်အရာရှိကြီးများအား ဂါရဝပြုကန်တော့ပွဲအခမ်းအနားအား ယနေ့ မတ် ၂၆ ရက်မွန်းလွဲပိုင်းက နေပြည်တော်ရှိ ဇေယျာသီရိဗိမာန်ခန်းမဆောင်၌ကျင်းပရာ အငြိမ်းစားတပ်မတော်အရာရှိကြီး(၁၅)ဦးနှင့် ဇနီး(၆)ဦးတို့ကန်တော့ခံတက်ရောက်ခဲ့ကြသည်။
အခမ်းအနားတွင် ဗိုလ်ချုပ်မှူးကြီးမင်းအောင်လှိုင်မှ လွတ်လပ်ရေးရရှိပြီးသည့်အချိန်မှစတင်၍ တပ်မတော်သည်တိုင်းပြည်အတွက်ဖြစ်ရမည်ဆိုသည့်စိတ်ဖြင့် အစဉ်အလာများကို ဆက်လက်ထိန်းသိမ်းဆောင်ရွက်လျက်ရှိကာ တပ်မတော်သည် နိုင်ငံ၏ အစိတ်အပိုင်းတစ်ခု ဖြစ်သကဲ့သို့ တပ်မတော်သားများသည်လည်း ပြည်သူလူထု၏အစိတ်အပိုင်းများဖြစ်ရာ ပြည်သူလူထု၏အကျိုး၊ နိုင်ငံတော်၏အကျိုးကိုတာဝန်ယူဆောင်ရွက်ရမည်ဟု ပြောသည်။
ထို့ပြင် တပ်မတော်သည် ပြည်ပကျူးကျော်မှုကို ကာကွယ်ရေး၊ ပြည်တွင်းဆူပူသောင်းကျန်းမှုကို တားဆီးရေးတို့သာမက အမျိုး၊ ဘာသာ၊ သာသနာနှင့် ယဉ်ကျေးမှုတို့မပျောက်ပျက်ရေးတို့ကိုပါ ထိန်းသိမ်းကာကွယ်စောင့်ရှောက်ပေးလျက်ရှိ၍ တွေ့ကြုံခဲ့ရသည့်အတွေ့အကြုံများကိုသင်ခန်းစာယူပြီး ဆက်လက်ဆောင်ရွက်ရမည့်ကိစ္စများကို အကောင်းဆုံးဆောင်ရွက်သွားမည်ဟု ပြောသည်။
ထို့အတူ တပ်မတော်အနေဖြင့် ဖွဲ့စည်းပုံအခြေခံဥပဒေ(၂၀၀၈ ခုနှစ်)နှင့်အညီ နိုင်ငံတော်တာဝန်များကို ထမ်းဆောင်နေရခြင်းဖြစ်၍ ယခုနှစ်ကုန်ကာလတွင် လွတ်လပ်၍တရားမျှတသည့် ပါတီစုံဒီမိုကရေစီအထွေထွေရွေးကောက်ပွဲတစ်ရပ်ကိုကျင်းပပြီး အနိုင်ရရှိသည့်ပါတီအား နိုင်ငံတော်၏တာဝန်များကို စနစ်တကျပြန်လည်လွှဲပြောင်းပေးသွားမည်ဟုလည်း ဗိုလ်ချုပ်မှူးကြီးမင်းအောင်လှိုင်က ပြောကြားခဲ့သည်။
ထို့နောက် ဗိုလ်ချုပ်မှူးကြီးမင်းအောင်လှိုင်နှင့် ဇနီး၊ တပ်မတော်အရာရှိကြီးများနှင့် ဇနီးများက တပ်မတော်(ကြည်း၊ ရေ၊ လေ)မိသားစုများကိုယ်စား အငြိမ်းစားတပ်မတော်အရာရှိကြီးများကို ဂါရဝပြုကန်တော့ခဲ့ကြပြီး ကန်တော့ခံအငြိမ်းစားတပ်မတော်အရာရှိကြီးများ(ကိုယ်စား) ဗိုလ်ချုပ်ကြီးသိန်းစိန်နှင့် ဒု-ဗိုလ်ချုပ်ကြီးအောင်ထွေးတို့က သြဝါဒစကားများပြောကြားခဲ့ကြသည်။
ထိုသို့ သြဝါဒစကားများပြောကြားပြီးနောက် ဗိုလ် ချုပ်မှူးကြီးမင်းအောင်လှိုင်နှင့် ဇနီး၊ ဒု-ဗိုလ်ချုပ်မှူးကြီးစိုးဝင်းနှင့် ဇနီး၊ တပ်မတော်အရာရှိကြီးများနှင့် ဇနီးများက အငြိမ်းစားတပ်မတော်အရာရှိကြီးများနှင့် ဇနီးများထံ ဂါရဝပြုလက်ဆောင်ပစ္စည်းများကို ကိုယ်တိုင်ကိုယ်ကျဂါရဝပြုပေးအပ်ခဲ့ကြသည်။