ယမန်နေ့ ဩဂုတ်လ (၂၆)ရက်မှ စတင်ကာ ယနေ့ နေ့လယ်ပိုင်းအထိ မိုးရွာသွန်းမှုများသောကြောင့် နေပြည်တော်ကောင်စီနယ်မြေ၊ တပ်ကုန်းမြို့နယ်ထဲရှိ ကျေးရွာအချို့၌ ရေကြီးရေလျှံမှု ဖြစ်ပွားနေသည့် မြင်ကွင်းများ ဖြစ်သည်။
“လောလောဆယ်တော့ ရွာထဲကလူတွေကို ခေါ်ထားပြီးပြီ၊ သယ်လို့ရမယ့်ဟာတွေ ဆိုင်ကယ်ကအစ ထုတ်ထားတယ်” ဟု ကူညီကယ်ဆယ်ရေး ဆောင်ရွက်နေသူတစ်ဦးကလည်း ပြောသည်။
နေပြည်တော်၊ ဥတ္တရခရိုင်၊ တပ်ကုန်းမြို့နယ်ရှိ ညောင်ပင်သာကျေးရွာနှင့် ဗျိုင်းအင်းကျေးရွာ၊ အောင်ဇေယျဘုရားအနီးရှိ နေအိမ်များအတွင်း ရေတက်လာခြင်းဖြစ်ကာ ကူညီကယ်ဆယ်ရေးလုပ်ငန်းများ ဆောင်ရွက်ပေးနေရသည်။
ထိုရေဝင်ရောက်သည့် နေရာများကို ဥတ္တရခရိုင်မီးသ-တ်စခန်းနှင့် တပ်ကုန်းမြို့နယ် မီးသ-တ်စခန်းမှ ရှာဖွေကယ်ဆယ်ရေးတပ်ဖွဲ့ဝင်များသည် စက်လှေ(၄)စီးတို့ဖြင့် ကူညီကယ်ဆ ယ်ပေးခြင်းနှင့် ရွှေ့ပြောင်းပေးခြင်းလုပ်ငန်းများ ဆောင်ရွက်လျက်ရှိနေသလို ပရဟိတအသင်းအဖွဲ့များကလည်း ကူညီဆောင်ရွက်ပေးနေကြသည်ဟုလည်း သိရသည်။
“လူမှုကယ်ဆယ်ရေးအသင်းတွေလည်း ထပ်ရောက်လာတာရှိပါတယ်၊ အသင့်အနေအထားနဲ့ စောင့်ကြည့်ကူညီနေပါတယ်”ဟုလည်း လူမှုကူညီရေးအဖွဲ့ဝင်တစ်ဦးက ပြောသည်။
ဗီယက်နမ်နိုင်ငံ ကုန်းတွင်းပိုင်းကို ဝင်ရောက်ခဲ့သည့် တိုင်ဖွန်းမုန်တိုင်း “ကာဂျီကီ” ၏ အရှိန်ကြောင့် နေပြည်တော်နှင့် ပြည်နယ်၊ တိုင်း (၁၄) ခု၌ မိုးထစ်ချုန်းရွာနိုင်ပြီး မိုးသည်းခြင်း၊ လေပြင်းတိုက်ခြင်း၊ ရုတ်တရက် ရေကြီးမြေပြိုနိုင်သည့် သဘာဝဘေးအန္တရာယ်များကို ကြိုတင်သတိရှိကြရန်လည်း တိုက် တွန်းထားသည်။