နေပြည်တော်၊ တပ်ကုန်းမြို့နယ်တွင် မိုးသည်းထန်စွာ ရွာသွန်းမှုကြောင့် နဝင်းချောင်းရေ မြင့်တက်ပြီး တောင်ကျ ချောင်းရေများလည်း ကျဆင်းလာရာ အနီးနားဝန်းကျင်ရှိ ကျေးရွာအများအပြား ရေကြီးနစ်မြုပ်မှုနှင့် ရင်ဆိုင်နေရပြီးအရေးပေါ် ကူညီကယ်ဆယ်ရေးလုပ်ဆောင်ပေးရန် လိုအပ်နေကြောင်း ဒေသခံများက အကူညီတောင်းခံနေကြသည်။
တပ်ကုန်းမြို့ပေါ် ရပ်ကွက်များ အပြင် နဝင်းချောင်းဘေးရှိ ရွေးစုရွာ၊ ရှောက်ကုန်းရွာ၊ လက်ပံကုန်းရွာ၊ ကင်းသာရွာ၊ မန်ကျည်းပင်ရွာ၊ ချောင်းခွရွာ၊ အပါအဝင် ကျေးရွာအများအ ပြား ရေကြီးနစ်မြုပ်မှုနှင့် ရင်ဆိုင်နေရခြင်းဖြစ်သည်။
“ရေကြီးနေပါပြီဗျာ။ အကုန်မြုပ်ကုန်ပါပြီ။ အိမ်ကနွားတွေဆိုလည်း အကုန်လွှတ်ပေးလိုက်ရတာ ဘယ်ရောက်ကုန်မှန်း မသိတော့ဘူး။ နဝင်းချောင်းရဲ့ နဘေးမှာရှိတဲ့ ရွာတွေအကုန် လုံးနီးပါး ရေကြီးနေတာ။အမြန်ဆုံးကူညီကယ်ဆယ်ပေးကြ ပါဦးခင်ဗျာ”ဟု တပ်ကုန်းမြို့နယ် ညောင်ကိုင်းအုပ်စု ရွေးစုကျေးရွာမှ ဒေသခံ တစ်ဦးက ပြောသည်။
နေပြည်တော် တပ်ကုန်းမြို့တွင် ရေကြီးမှု အဆိုးရွားဆုံး အခြေအနေနှင့် ရင်ဆိုင်နေရပြီး ရေမှာ ဆက်လက် မြင့်တက်လျက်ရှိရာ ဒေသခံများ နယ်မြေခံ ကယ်ဆယ်ရေးအဖွဲ့များလည်း ပိတ်မိနေကြကြောင်း သိရသည်။
“ပိတ်မိနေတဲ့ သူတွေရဲ့ အကူအညီတောင်းမှုတွေက အများကြီးပဲ။ အသက်အန္တရာယ်တွေ ဖြစ်နိုင်တဲ့ထိ ရေကြီးနေတာ နယ်မြေခံ ကယ်ဆယ်ရေးအဖွဲ့တွေပါ ပိတ်မိနေတာ။ အဆင်ပြေတဲ့အဖွဲ့တွေ အရေးပေါ်ကယ်ဆယ်ရေးတွေ ထွက်ပေးကြပါလားဗျာ”ဟု လူမှုကူညီရေး အဖွဲ့ဝင် တစ်ဦးက အကူညီတောင်းခံထားသည်ကို တွေ့ရသည်။
ထို့ပြင် ရမည်းသင်း၊ တပ်ကုန်း ဆည်ကျိုးသည်ဟု သတင်း ထွက်ပေါ်နေပြီး နေရာတော်တော်များ ရေမြုပ်နေကာ မြေပြိုကျပြီး ရန်ကုန် – မန္တလေး လမ်းဟောင်း နေရာတော်တော်များများ ရေမြုပ်နေရာ ကားလေးများ လမ်းဟောင်းမှ ခရီးမသွားသင့်ကြောင်း ဒေသခံ တစ်ဦးက ဆိုသည်။
ယင်းအပြင် တပ်ကုန်းမြို့၊ ဘုရင့်နောင်ရပ်ကွက်၊ စန္ဒိမာရာမ ပရိယတ္တိကျောင်းတိုက် အပါအဝင် အခြားဘုန်းတော်ကြီးကျောင်းများတွင်လည်း ရေကြီး၊ ရေလျှံမှုနှင့် ရင်ဆိုင်နေရကြောင်း သိရသည်။
“ကျောင်းထဲ ရေတွေနစ်မြုပ်နေပါတယ်။ ကျောင်းရှိ သံဃာတွေကတော့ ဆွမ်းခံသွားရင်း ပြန်မလာနိုင်တော့ပါဘူး။ ကျောင်းမှာ ကျန်နေခဲ့တဲ့ ဦးဇင်းကြီး တစ်ပါးရယ် ကျောင်းသား တစ်ယောက်ရယ် အပြင်လွတ်တဲ့ နေရာကို ထွက်သွားပါပြီ။ ကျောင်းကတော့ လောလောဆယ် အောက်ထပ်တွေ အကုန်မြုပ်သွားပါပြီ။ ရေက မျက်နှာကျက်ကို ခိုက်နေပါပြီ။ မနက် (၆) နာရီက စပြီး ကျောင်းဝန်းထဲကို ရေတွေဝင်လာတာ မိုးကအဆက်မပြတ်ရွာနေဆဲပဲ။ သောက်သုံးရေရဖို့အတွက် ရေခံထားရပါတယ်။ဆွမ်းစားကျောင်းလည်း မြုပ်သွားပါပြီ။ လောလောဆယ်တော့ ဘယ်မှာနေကြတယ်မသိပါဘူး။ အမိုးပေါ်ပဲ တက်နေကြမယ်နဲ့ တူပါတယ်”ဟု စန္ဒိမာရာမပရိယတ္တိကျောင်းတိုက်မှ ဦးဇင်း တစ်ပါးမှ မိန့်ကြားထားသည်။
ထို့အပြင် တပ်ကုန်းမြို့ရှိ ကုတင် (၁၀၀)နှင့် မကျည်းပင်ရွာတို့တွင် ရေနစ်မြုပ်နေ၍ ပိတ်မိနေသူများရှိနေရာ ကူညီကယ်ဆယ်ရေးလုပ်ဆောင်ရန် လှေလိုအပ်နေကြောင်းလည်း မိုးစေတနာပရဟိတအသင်း ပျဉ်းမနားရုံးနှင့် ကရုဏာရှင်လူမှုကူညီရေးအသင်းတို့က ဆိုထားသည်။
ထိုသို့ ရေကြီးနစ်မြုပ်မှု အဆိုရွားဆုံး ရင်ဆိုင်ကြုံတွေ့နေရသည့် တပ်ကုန်းမြို့ အနီးတဝိုက် ကျေးရွာများသို့ ကူညီကယ်ဆယ်ရေး လုပ်ဆောင်ရန် မန္တလေးမြို့မှ လူမှုကူညီက ယ်ဆယ်ရေးအဖွဲ့များမှလည်း သွားရောက်လျက်ရှိကြောင်း သိရသည်။
ဓာတ်ပုံ – အင်တာနက်
