လန်ဒန်/စတော့ဟုမ်း၊ ဧပြီ ၁၈
ဥရောပသမဂ္ဂ (အီးယူ) လွှတ်တော်အမတ်များက ChatGPT ကဲ့သို့သော ဉာဏ်ရည်မြင့် အေအိုင် စနစ်များသည် မျှော်မှန်းထားသည်ထက် ပိုမိုလျင်မြန်စွာ တိုးတက်နေသောကြောင့် ထိပ်သီးအစည်းအဝေးတစ်ခု ကျင်းပ၍ ထိန်းချုပ်နိုင်မည့် နည်းလမ်းများကို ရှာဖွေကြရန် ကမ္ဘာ့ခေါင်းဆောင်ကြီးများအား ဧပြီလ ၁၇ ရက် တနင်္လာနေ့တွင် တိုက်တွန်းခဲ့ကြောင်း သိရသည်။
အီးယူ ၏ နည်းပညာပိုင်းဆိုင်ရာ ဥပေဒရေးဆွဲနေသော လွှတ်တော်အမတ် ၁၂ ဦးသည် အမေရိကန်သမ္မတ ဂျိုးဘိုင်ဒင်နှင့် ဥရောပကော်မရှင် ဥက္ကဌ အာဆူလာ ဗန် ဒါ လိုင်ယန် တို့အား အေအိုင်နှင့် ပတ်သက်၍ အစည်းအဝေး ခေါ်ယူရန် တောင်းဆိုခဲ့ပြီး အေအိုင် ကုမ္ပဏီများကိုလည်း ပိုမိုတာဝန်ယူသင့်သည်ဟု ထုတ်ပြန်ချက်တွင် ပြောကြားခဲ့သည်။
ထို့ပြင် ၎င်းတို့သည် ဒီမိုကရေစီ နိုင်ငံနှင့် ဒီမိုကရေစီ မကျင့်သုံးသော နိုင်ငံများအား အလွန်အစွမ်းထက်သော အေအိုင်နည်းပညာကို လိုက်စားရာတွင် ထိန်းထိန်းသိမ်းသိမ်း လုပ်ဆောင်ကြရန် တိုက်တွန်းထားသည်။
အဆိုပါ တောင်းဆိုမှုသည် အီလွန်မတ်စ် အပါအဝင် နည်းပညာဆိုင်ရာ ကျွမ်းကျင်ပညာရှင် အယောက် ၁၀၀ က ကုမ္ပဏီများအား OpenAI ထုတ် ChatGPT ၏ နောက်ဆုံးထွက် အေအိုင်စနစ်ထက် ပိုမိုတိုးတက်အောင် လုပ်နေခြင်းကို ခြောက်လကြာ ရပ်ဆိုင်းပေးရန် တောင်းဆိုခဲ့ပြီးနောက် ပေါ်ပေါက်လာခြင်းဖြစ်သည်။
အီလွန်မတ်စ်တို့၏ တောင်းဆိုစာတွင် အေအိုင်နည်းပညာကို စနစ်တကျ မထိန်းချုပ်ပါက လူတွေထံ သို့ တစ်ခါမှ မကြုံဖူးသော နှုန်းထားဖြင့် သတင်းအမှားများ ပို့လွှတ်လာနိုင်ပြီး လူသားများထက် တစ်ကွက်ကြိုမြင်သည်အထိ ဉာဏ်ရည်ပိုမြင့်လာနိုင်ကြောင်း သတိပေးထားသည်။
Source: Straitstimes