ဆွေးနွေးလိုပါက တုကီယေးသို့လာခဲ့ရန် ပူတင်ကို ဇလန်းစကီးဖိတ်ခေါ်

ခရမ္မလင်ခေါင်းဆောင်၏ တို-က်ရိုက်ဆွေးနွေးရေး အဆိုပြုချက်ကို ချက်ချင်းလက်ခံပေးရန် အမေရိကန်သမ္မတ ဒေါ်နယ်ထရမ့်ပ်က လူသိရှင်ကြား တို-က်တွန်းခဲ့ပြီးနောက် ကြာသပတေးနေ့တွင် တုကီယေးနိုင်ငံ၌ ဗလာဒီမာပူတင်နှင့် တွေ့ဆုံရန် သူ့ဘက်က အသင့်ရှိသည်ဟု ယူကရိန်းသမ္မတ ဗိုလိုဒီမာ ဇလန်းစကီးက ပြောကြားလိုက်သည်။
           
သို့ရာတွင် ပူတင်က လူကိုယ်တိုင် တက်ရောက်မည်လားဆိုသည်မှာမူ ရှင်းရှင်းလင်းလင်းသိရရန် ခက်ခဲသည်။ ပူတင်နှင့် ဇလန်းစကီးတို့သည် ၂၀၁၉ ခုနှစ် ဒီဇင်ဘာလကတည်းက တွေ့ဆုံကြခြင်း မရှိတော့ဘဲ တစ်ဦးနှင့်တစ်ဦး အပြန်အလှန်ရှုတ်ချမှုများ ပေါ်ပေါ်တင်တင်လုပ်ခဲ့ကြသည်။
           
“ကြာသပတေးနေ့ တုကီယေးမှာ ပူတင်ကို စောင့်နေပါမယ်” ဟု ဇလန်းစကီးက X ပေါ်တွင် ရေးသားခဲ့ကာ ဒီတစ်ကြိမ်တွင်မူ ရုရှားတို့ဘက်က အကြောင်းပြချက်များ မရှာလောက်ဟု သူမျှော်လင့်ကြောင်း ဆိုခဲ့သည်။
         
ထို့အပြင် သူ၏ရုံးအဖွဲ့အကြီးအကဲ Andriy Yermak က “ပူတင်ဘက်ကရော ဘယ်လိုလဲ၊ သူကြောက်နေပြီလား၊ ငါတို့ တွေ့ကြမယ်လေ” ဟု တယ်လီဂရမ်တွင် ဆက်လက်ပြောဆိုခဲ့သည်။
          
ရုရှားခေါင်းဆောင်သည် အမေရိကန်ပြည်ထောင်စု၏ စံတော်ချိန်နှင့် တိုက်ဆိုင်သော ညအချိန် ရုပ်သံထုတ်ပြန်ချက်တစ်ခုဖြင့် လာမည့်ကြာသပတေးနေ့(မေလ ၁၅ရက်နေ့) တွင် တိုက်ရိုက်ဆွေးနွေးရန် အဆိုပြုခဲ့ပြီးနောက် တနင်္ဂနွေနေ့အစောပိုင်းတွင် ယူကရိန်းခေါင်းဆောင်က ယင်းကဲ့သို့ တုန့်ပြန်ပြောဆိုခဲ့ခြင်းဖြစ်သည်။
           
မစ္စတာ ပူတင်အနေဖြင့် ခြွင်းချက်မရှိ ရက် ၃၀ အပစ်အခတ်ရပ်စဲရေးကို သဘောတူရန်နှင့် သို့မဟုတ်ပါက ကြီးမားသော ဒဏ်ခတ်ပိတ်ဆို့မှုအသစ်များကို ရင်ဆိုင်ရမည်ဟု ကိဗ်သို့ ရောက်ရှိနေသည့် ဥရောပအင်အားကြီးနိုင်ငံများက စနေနေ့တွင် တို-က်တွန်းခဲ့ကြပြီးနောက် ပူတင်၏ အဆိုပြုချက်ထွက်လာခြင်းဖြစ်သည်။ အပစ်ရပ်ရေးဆိုင်ရာ ဥရောပအင်အားကြီးများ၏ ရပ်တည်ချက်ကို ထရမ့်ပ်၏ ယူကရိန်းဆိုင်ရာ သံတမန် Keith Kellogg က ထောက်ခံထားသည်။

Ref: တီဘီအက်စ်နူးစ်