မွန်ပြည်နယ်၊ ကျိုက်ထိုမြို့နယ်ရှိ ဆံတော်ရှင်ကျိုက်ထီးရိုးစေတီတော်မြတ်ကြီး၏ ဗုဒ္ဓပူဇနိယပွဲတော်အတွင်း လာရောက်ဖူးမြော်သူ (၈၀၀၀၀၀) ကျော်ရှိကြောင်း စေတီတော် ဘဏ္ဍာတော်ထိန်းဂေါပကအဖွဲ့ထံမှ သိရသည်။
ဆံတော်ရှင်ကျိုက်ထီးရိုးစေတီတော်မြတ်ကြီး၏ ဗုဒ္ဓပူဇနိယပွဲတော်ကို သီတင်းကျွတ်လပြည့်နေ့မှ ကဆုန်လပြည့်နေ့အထိ နှစ်စဉ်ကျင်းပလျက်ရှိပြီး အနယ်နယ်အရပ်ရပ်မှ ဘုရားဖူးပြည်သူများလာရောက်ဖူးမြော်ကြရာ ယခုနှစ်တွင် ယခင်နှစ်ကထက် လာရောက်ဖူးမြော်သူ ပိုမိုများပြားကြောင်း သိရသည်။
ယခင်နှစ်တွင် ပြည်တွင်းပြည်ပ ဘုရားဖူး စုစုပေါင်း (၇၂၆၆၆၄)ဦး ရှိခဲ့ပြီး ယခုနှစ်တွင် အောက်တိုဘာ (၁၇) ရက် (သီတင်းကျွတ်လပြည့်နေ့) မှ ဖေဖော်ဝါရီ (၁၂) ရက်အထိ ဘုရားဖူး (၈၀၀၀၀၀) ကျော်ရှိပြီး ပြည်တွင်းဘုရားဖူး (၇၈၁၂ ၈၆) ဦးနှင့် ပြည်ပဘုရားဖူးက (၂၃၀၆၆) ဦး ရှိကြောင်းသိရသည်။
ထို့ပြင် တောင်တက်မော်တော်ယာဉ် အစီးရေ (၁၅၀) ဖြင့် နေ့စဉ်ပြေးဆွဲပေးနေပြီး သတ်မှတ်လူဦးရေနှင့် ယာဉ်စီးနင်းခများကိုလည်း သတ်မှတ်နှုန်းထားဖြင့် အလွယ်တကူ လိုက်ပါစီးနင်းနိုင်ရန် စီမံထားကြောင်း သိရသည်။
ဘုရားဖူးပြည်သူများ စည်ကားများပြားသည့်အတွက် ကျိုက်ထီးရိုးတောင်တော်တလျှောက် အထင်ကရနေရာများဖြစ်သည့် မုဆိုးတောင်တော်၊ ကျီးကန်းပါးစပ် လိုဏ်ဂူတော်၊ ကျောက်ထပ်ကြီးစေတီတော်၊ ရေတံခွန်စသည့်နေရာများ၊ ရင်ပြင်တော် ဈေးဆိုင်တန်းတစ်လျှောက်ရှိ အမှတ်တရ အရောင်းဆိုင်များ၌ ဘုရားဖူးများဖြင့် စည်ကားနေသည့်အပြင် အခမဲ့နှင့် အခပေးတည်းခိုဆောင်များ၊ ရင်ပြင်တော်၌လည်း တည်းခိုနေထိုင်သူများပြားလျက်ရှိကြောင်း သိရသည်။