ဆောက်လုပ်ရေးလုပ်ငန်းသုံးပစ္စည်းများအား ပြည်တွင်းလုပ်ငန်းရှင်များနှင့်တိုင်းရင်းသားလုပ်ငန်းရှင်များ ဆောင်ရွက်ပါက အစိုးရမှကူညီဆောင်ရွက်ပေးသွားမည်

ဆောက်လုပ်ရေးလုပ်ငန်းသုံးပစ္စည်းများအား ပြည်တွင်းလုပ်ငန်းရှင်များနှင့်တိုင်းရင်းသားလုပ်ငန်းရှင်များ ဆောင်ရွက်ပါက အစိုးရမှကူညီဆောင်ရွက်ပေးသွားမည်

နစက ဥက္ကဋ္ဌမှ ဇူလိုင် ၂၁ ရက်ကပြုလုပ်သည့် နစက အစည်းအဝေး(၆/၂၀၂၂)သို့တက်ရောက်၍ အမှာစကားပြောကြားရာ၌ ကျေးလက်နေပြည်သူများ၏ လူမှုနေမှုစနစ်များ မြှင့်တင်ပေးရန်လိုအပ်မှုနှင့်ပတ်သက်၍ ထည့်သွင်းပြောကြားခဲ့ခြင်းဖြစ်သည်။

မြန်မာနိုင်ငံ၏ တိုင်းနှင့်ပြည်နယ်အသီးသီးရှိ ကျေးလက်နေပြည်သူများ၏ လူနေမှုစနစ်များမှာ အခြားနိုင်ငံများထက်နိမ့်ကျလျက်ရှိသည်ကို တွေ့ရှိရကာ ကျေးလက်နေပြည်သူများ၏ လူမှုစီးပွားဘဝတွင် အားနည်းချက်များရှိခြင်းကြောင့်သာ လူနေမှုစနစ်များနိမ့်ကျနေခြင်းဖြစ်သည်ဟု ပြောသည်။

ထို့ကြောင့် စိုက်ပျိုးမွေးမြူရေးလုပ်ငန်းများအား မြှင့်တင်ဆောင်ရွက်၍ အောင်မြင်အောင် ဆောင် ရွက်နိုင်ပါက ကျေးလက်နေတိုင်းရင်းသား ပြည်သူများ၏ လူမှုစီးပွားများပြောင်းလဲတိုးတက်လာမည်ဖြစ်သည်ဟုပြောသည်။

“အဲလို လူမှုစီးပွားတွေ တိုးတက်ပြောင်းလဲလာချိန်မှာ နေထိုင်တဲ့အိမ်ရာတွေ အဆင့်မြှင့်တင်တည် ဆောက်ဖို့ ဆောက်လုပ်ရေးလုပ်ငန်းတွေမှာလို အပ်တဲ့ ဘိလပ်မြေတွေကို ပြည်တွင်းမှာ လုံ လောက်အောင် ထုတ်လုပ်နိုင်ဖို့လိုအပ်ပါတယ်”ဟု နစက ဥက္ကဋ္ဌကပြောသည်။

ထို့ပြင် ဆောက်လုပ်ရေးလုပ်ငန်းသုံး သံမဏိများ ထုတ်လုပ်ရာတွင်လည်း အဆောက်အဦးများ ဆောက်လုပ်နိုင်သည့် သံမဏိထုတ်လုပ်ရေး လုပ်ငန်းများအား ပြည်တွင်း၌ပင် ထုတ်လုပ်နိုင်ရန် ပြည်တွင်းလုပ်ငန်းရှင်များနှင့်တိုင်းရင်းသားလုပ်ငန်းရှင်များ ဆောင်ရွက်မည်ဆိုပါက အစိုးရအနေဖြင့် ကူညီဆောင်ရွက်ပေးသွားမည်ဟုပြောသည်။

အဆိုပါ ဆောက်လုပ်ရေးလုပ်ငန်းသုံး ဘိလပ်မြေနှင့် သံ၊ သံမဏိတို့သည် နိုင်ငံ၏ လူနေမှုအဆင့် အတန်းမြင့်မားရန် မဖြစ်မနေလိုအပ်၍ အားပေးဆောင်ရွက်ပါက များစွာပြောင်းလဲတိုးတက်သွားမည်ဟု နစက ဥက္ကဋ္ဌကပြောသည်။

“လူနေမှုအဆင့်အတန်းမြင့်မားဖို့အတွက် လျှပ် စစ်ဓာတ်အား လုံလောက်အောင် ရရှိဖို့ကလည်းအရေးကြီးပါတယ် ဒါ့အပြင် မြစ်ကြီးတွေပေါ်မှာ ရေအားလျှပ်စစ်ဓာတ်အား ထုတ်လုပ်မှုလုပ်ငန်းတွေကို ဆောင်ရွက်လို့ရပါတယ်”ဟု နစက ဥက္ကဋ္ဌကပြောသည်။

မေခ၊ မလိခ၊ ဧရာဝတီ၊ ရွှေလီ၊ ချင်းတွင်း၊ တာပိန်၊ သံလွင် စသည့် မြစ်ကြီးများပေါ်၌ ရေအားလျှပ်စစ်ထုတ်လုပ်နိုင်သည့်နေရာများ၌ ပြန်လည်ပြည့်ဖြိုးမြဲစွမ်းအင်ဖြစ်သည့် ရေအားလျှပ်စစ် ဓာတ်အားထုတ်လုပ်ခြင်း စီမံကိန်းများအား အောင်မြင်အောင် အကောင်အထည်ဖော်ဆောင် ရွက်ရန်လိုအပ်သည်ဟု ပြောသည်။

အလားတူ မြန်မာနိုင်ငံအလယ်ပိုင်းရှိ နေရာဒေသအများစု၌ နေရောင်ခြည်စွမ်းအင်သုံး လျှပ်စစ် ဓာတ်အားထုတ်လုပ်ခြင်းလုပ်ငန်းများအား ဆောင်ရွက်ပါက နွေရာသီတွင် လျှပ်စစ်ဓာတ်အား ပိုမိုထုတ်လုပ်နိုင်မည်ဖြစ်သည်ဟု ပြော သည်။

“ကမ်းရိုးတန်းဒေသတွေမှာလည်း လေအားလျှပ်စစ်ဓာတ်အားထုတ်လုပ်မှုလုပ်ငန်းတွေကို ဆောင်ရွက်လို့ရပါတယ်”ဟု နစက ဥက္ကဋ္ဌကပြောသည်။

လျှပ်စစ်ဓာတ်အား ထုတ်လုပ်ခြင်းလုပ်ငန်းများအား နိုင်ငံတော်အဆင့် ဆောင်ရွက်ရန်လိုကာ ပုဂ္ဂလိကလုပ်ငန်းများအနေဖြင့်လည်း အသေးစားနှင့်အလတ်စားထုတ်လုပ်မှုများကို ဆောင်ရွက်မည်ဆိုပါက နိုင်ငံတော်မှအားပေးကူညီပေးသွားမည်ဖြစ်ဟု နစက ဥက္ကဋ္ဌကပြောသည်။