ခုနစ်နှစ်အတွင်း ပထမဆုံးအကြိမ် အပတ်စဉ်ပျံသန်းခွင့် တိုးမြှင့်
တောင်ကိုရီးယားနှင့် တရုတ်နိုင်ငံတို့သည် နှစ်နိုင်ငံအကြား လေကြောင်းဆက်သွယ်မှု ပိုမိုမြှင့်တင်နိုင်ရန် ခုနစ်နှစ်အတွင်း ပထမဆုံးအကြိမ်အဖြစ် အပတ်စဉ် လေယာဉ်ပျံသန်းခွင့်များ တိုးချဲ့ရန် သဘောတူညီခဲ့ကြောင်း တောင်ကိုရီးယား ပို့ဆောင်ရေးဝန်ကြီးဌာနက ဇွန် ၄ ရက်တွင် ထုတ်ပြန်ခဲ့သည်။
မေလ ၂၇ ရက်မှ ၂၈ ရက်အထိ ဆိုးလ်မြို့၌ ကျင်းပခဲ့သည့် နှစ်နိုင်ငံ လေကြောင်းဆွေးနွေးပွဲများအတွင်း ရရှိခဲ့သည့် သဘောတူညီချက်အရ ခရီးသည်တင် လေယာဉ်ပျံသန်းခွင့်ကို အပတ်စဉ် ၆၀၈ ကြိမ်မှ ၆၆၄ ကြိမ်အထိ တိုးမြှင့်မည်ဖြစ်ပြီး ကုန်တင်လေယာဉ် ပျံသန်းခွင့်ကိုလည်း ၅၄ ကြိမ်မှ ၆၈ ကြိမ်အထိ တိုးချဲ့သွားမည်ဖြစ်ကြောင်း တောင်ကိုရီးယား မြေယာ၊ အခြေခံအဆောက်အအုံနှင့် သယ်ယူပို့ဆောင်ရေးဝန်ကြီးဌာနက ပြောကြားသည်။
ယင်းသဘောတူညီချက်ကြောင့် အင်ချွန်း–ရှန်ဟိုင်းနှင့် အင်ချွန်း–ကွမ်ကျိုးကဲ့သို့ ခရီးသည်အများဆုံး အသုံးပြုသည့် လေကြောင်းလမ်းကြောင်းများတွင် ပျံသန်းမှုများ ပိုမိုတိုးချဲ့နိုင်မည်ဖြစ်ကြောင်း သိရသည်။ အဆိုပါ လမ်းကြောင်းများတွင် လက်ရှိပျံသန်းခွင့် အရေအတွက်ကို နှစ်နိုင်ငံစလုံးက အပြည့်အဝ အသုံးပြုနေခဲ့ကြသည်။
ထို့ပြင် ဘူဆန်နှင့် ချောင်ဂျူးအပါအဝင် တောင်ကိုရီးယား ဒေသတွင်းလေဆိပ်များမှ တရုတ်နိုင်ငံရှိ ကွမ်ကျိုး၊ ချန်ဒူး၊ ရှန်ကျန်း၊ ချုံကင်းနှင့် ရှီအန်း အပါအဝင် မြို့ကြီး ၁၀ မြို့သို့ လေကြောင်းခရီးစဉ်များ တိုးချဲ့ပြေးဆွဲနိုင်ရန်လည်း သဘောတူညီခဲ့ကြောင်း ဝန်ကြီးဌာနက ထုတ်ပြန်သည်။
တောင်ကိုရီးယားနှင့် တရုတ်နိုင်ငံအကြား ခရီးသွားလာမှုသည် ဆက်လက်မြင့်တက်လျက်ရှိပြီး ၂၀၂၆ ခုနှစ် ပထမသုံးလပတ်အတွင်း နှစ်နိုင်ငံအကြား ခရီးသည်အပြန်အလှန် သွားလာမှု ၄ ဒသမ ၃၉ သန်းအထိ ရှိခဲ့ကာ ကိုဗစ်-၁၉ ကပ်ရောဂါမတိုင်မီကာလ၏ ၄ ဒသမ ၁၄ သန်းထက် ကျော်လွန်ခဲ့ကြောင်း သိရသည်။
“နှစ်နိုင်ငံအကြား လူမှုရေးနှင့် စီးပွားရေး ဖလှယ်မှုများ တိုးမြင့်လာနေချိန်မှာ လေကြောင်းဆွေးနွေးပွဲများမှတစ်ဆင့် ပျံသန်းခွင့်အရေအတွက်ကို အချိန်မီ တိုးချဲ့နိုင်ခဲ့ခြင်းဟာ အားတက်ဖွယ်ကောင်းတဲ့ ဖွံ့ဖြိုးတိုးတက်မှုတစ်ရပ် ဖြစ်ပါတယ်” ဟု တောင်ကိုရီးယား လေကြောင်းမူဝါဒဌာန အကြီးအကဲ လီဆိုးယောင်းက ပြောကြားခဲ့သည်။
Ref: The Straits Times