ပြည်တွင်း၌ ဆန်စပါးဖူလုံရုံမကဘဲ ပိုလျှံမှုရှိနေသည့်အတွက် ပြည်ပသို့ နှစ်စဉ်ဆန်တန်ချိန် (၂) သန်းခန့် တင်ပို့နိုင်ကြောင်း ရန်ကုန်တိုင်းဒေသကြီး ဝန်ကြီးချုပ်ဦးစိုးသိန်းက ပြောကြားသည်။
ရန်ကုန်တိုင်းဒေသကြီး အစိုးရအဖွဲ့ရုံး၊ မင်္ဂလာခန်းမတွင် ပြုလုပ်သည့် ဆန်ဈေးနှုန်းနှင့် ဆန်ဈေးကွက် တည်ငြိမ်မှန်ကန်စေရေး လုပ်ငန်းညှိနှိုင်းအစည်းအဝေးတွင် ထည့်သွင်းပြောကြားခဲ့ခြင်းဖြစ်သည်။
ယင်းဆွေးနွေးပွဲတွင် ဝန်ကြီးချုပ်က ဆန်ဈေးနှုန်းသည် ဖြစ်သင့်ဖြစ်ထိုက်သည့် ပမာဏထက်ကျော်လွန်၍ ဈေးနှုန်းမြင့်တက်သည့် အနေအထားတစ်ရပ်ကိုတွေ့ရပြီး အမြတ်ကြီးရလိုမှုဖြင့် ဝယ်ယူသိုလှောင်ထားကြကာ တဖြည်းဖြည်း ဈေးဆွဲတင်ဆောင်ရွက်နေသည်ကိုတွေ့ရကြောင်းလည်း ပြောကြားခဲ့သည်။
လက်ရှိဆန်ဈေးနှုန်း ဈေးကွက်တည်ငြိမ်ရေးအတွက် အစိုးရပိုင်းက ဦးဆောင်မှုပြုပေးရမည့် အခန်းကဏ္ဍ၊ မြန်မာနိုင်ငံကုန်သည်များနှင့် စက်မှုလက်မှု လုပ်ငန်းရှင်များအသင်းချုပ် (UMFCCI)၊ မြန်မာနိုင်ငံ ဆန်စပါးအသင်းချုပ်နှင့် ညီနောင်အသင်းအဖွဲ့များ၊ ပုဂ္ဂလိကအသင်းအဖွဲ့များက ပူးပေါင်းဆောင်ရွက်ပေးရမည့် အခန်းကဏ္ဍ၊ ဆန်ဈေး နှုန်းကြီးမြင့်မှုကို အဖြေရှာဖြေရှင်းပေးရမည့် ကိစ္စရပ်များ၊ ကုမ္ပဏီများ၊ ဆန်ကုန်စည်ဒိုင်များ၊ ဆန်လက်လီဆိုင်များက ပူးပေါင်းရောင်းချပေးနေမှုကို ပိုမိုကောင်းမွန်အောင် ဆောင်ရွက်ကြမည့် ကိစ္စရပ်များအပေါ် ပွင့်လင်းမြင်သာစွာ ဆွေးနွေးပေးကြရန်လည်း ပြောကြားခဲ့သည်။
ထို့ပြင် ရန်ကုန်တိုင်းဒေသကြီး၌ပင် ဆန်ကို နေ့စဉ်စားသုံးသည့်လူဦးရေ ၈ ဒဿမ ၆ သန်းကျော်ရှိသည့် အတွက်ကြောင့် သင့်တင့်သော ဈေးနှုန်းဖြစ်ရေးအတွက် ဆန်ဈေးနှုန်း ဈေးကွက်တည်ငြိမ်မှန်ကန်စေရေး လုပ်ငန်းညှိနှိုင်း အစည်းအဝေးကို ဆောင်ရွက်ရခြင်းဖြစ်ကြောင်း ၎င်းကဆိုသည်။
ထို့နောက် ရန်ကုန်တိုင်းဒေသကြီ စီးပွားရေးရာဝန်ကြီး ဦးမျိုးမြင့်အောင်က ဆန်ဈေးနှုန်းနှင့် ဆန်ဈေးကွက် တည်ငြိမ်မှန်ကန်စေရေး အကြံပြုဆွေးနွေး ပြောကြားခဲ့ပြီး မြန်မာနိုင်ငံ ဆန်စပါးအသင်းချုပ်၊ အထွေထွေအတွင်းရေးမှူးချုပ် ဦးလူမော်မြင့်မောင်က ရန်ကုန်တိုင်းဒေသကြီး အစိုးရအဖွဲ့၏ လမ်းညွှန်မှုဖြင့် မြို့နယ်များသို့ ဆန်များကို သင့်တင့်မျှတသော ဈေးနှုန်းဖြင့် လိုက်လံရောင်းချပေးနေမှုများကိုလည်း ရှင်းလင်းတင်ပြခဲ့ကြကြောင်း သိရသည်။
ထို့နောက် ဆန်ဈေးနှုန်းနှင့် ဆန်ဈေးကွက် တည်ငြိမ်မှန်ကန်စေရေး တက်ရောက်ကြသူများက ကဏ္ဍအလိုက် အထွေထွေဆွေးနွေးတင်ပြခဲ့ကြကြောင်းလည်း သိရသည်။
