စားအုန်းဆီ စျေးကစားရန် မသမာသည့် ရည်ရွယ်ချက်ဖြင့် သိုလှောင်သူများအား အရေးကြီးကုန်စည်နှင့် ဝန် ဆောင်မှုဥပဒေဖြင့် အရေးယူမည်

စားအုန်းဆီ စျေးကစားရန် မသမာသည့် ရည်ရွယ်ချက်ဖြင့် သိုလှောင်သူများအား အရေးကြီးကုန်စည်နှင့် ဝန် ဆောင်မှုဥပဒေဖြင့် အရေးယူမည်

ပြည်တွင်းစျေးကွက်အတွင်း စာအုန်းဆီစျေးအား စျေးနှုန်းမြှင့်တင်ရောင်းချခြင်းအပါအဝင် စျေးကစားရန်ရည်ရွယ်ချက်ဖြင့် သိုလှောင်ခြင်း၊ မသမာသည့် လုပ် ဆောင်ချက်များပြုလုပ်ပါက အရေးကြီးကုန်စည်နှင့် ဝန်ဆောင်မှု ဥပဒေဖြင့် အရေးယူဆောင်ရွက်သွားမည်ဖြစ်ကြောင်း စီးပွားရေးနှင့်ကူးသန်းရောင်းဝယ်ရေး ဝန် ကြီးဌာန ၊ စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီထံမှ သိရသည်။

ယခု ရက်သတ္တပတ်အတွင်း ကမ္ဘာ့စားအုန်းဆီထုတ်လုပ်တင်ပို့သည့် နိုင်ငံများတွင်စျေးကွက်နှင့် စျေးနှုန်းဖြစ်ပေါ်မှုများအရ ယနေ့ သြဂုတ် ၁ ရက်မှ ၇ ရက်အထိ ရန်ကုန်အထိုင်စျေးနှုန်းမှာ တစ်ပိသာလျှင် ၃၅၂၅ ကျပ်အဖြစ် သတ်မှတ်ထားရှိသည်။

သို့သော်စျေးကွက်အတွင်းတွင် လက်လီစျေးစားအုန်းဆီတစ်ပိသာလျှင် ၈၈၀၀ကျပ်ဖြင့် ရောင်းချနေပြီး၊ တစ်ဆယ်သားလျှင် ကျပ် ၉၀၀ ဖြင့်ရောင်းချနေကြောင်း စုံစမ်းသိရှိရသည်။ “ကျွန်မတို့က အကြော်ရောင်းတာဆိုတော့ နေ့တိုင်းဆီဝယ်ရတယ်။ အခုစျေးတွေတက်နေတော့ တစ်နေ့စာ တစ်နေ့ပဲ ဝယ်ဖြစ်တယ်၊ ပိသာလိုက်ဝယ်ရင် ၈၈၀၀ပေးရပြီး တစ်ဆယ်သားချင်းဝယ်ရင် ၉၀၀ ပေးရတယ်” ဟု တွံတေးမြို့နယ်မှ အကြော်ရောင်းချသူတစ်ဦးမှ ပြောပါတယ်။

“ကျွန်မတို့က စားအုန်းဆီစျေးနှုန်းတွေကမောက်ကမဖြစ်လို့ တင်ကိုမထားဘူး။ ဆိုင်တော်တော်များများလည်းတင်မရောင်းကြဘူး။ အခုဆိုင်မှာတင်ရောင်းတာဆိုလို့ ဗူးဆီခေါ်တာပေါ့။ အမေထွားတို့ ၊ ရန်ကုန်ပဲဆီသန့်တို့ ဒါတွေဘဲရောင်းရတယ်။ ဘယ်လောက်လီတာဆိုဘယ်စျေးသတ်မှတ်ထားပြီးသားဖြစ်တဲ့အတွက် စကားလည်းပြောစရာမလိုဘူး။”ဟု ရပ်ကွက်စျေးအတွင်း ကုန်စုံဆိုင်ရောင်းချသူတစ်ဦးက ဆိုသည်။

အများပြည်သူများ သက်သာချောင်ချိရေးအတွက် လက် ရှိတွင် ရန်ကုန်တိုင်းဒေသကြီးအတွင်းရှိ မြို့နယ်များသို့ မြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် ၊ မြန်မာနိုင်ငံ ဆီကုန်သည်နှင့်ဆီလုပ် ငန်းရှင်များအသင်း(MEODA)နှင့် မြန်မာနိုင်ငံဆန်စပါးအသင်းတို့ ပူးပေါင်းစီစဥ်မှုဖြင့် စားဆီတစ်ပိသာလျှင် ၃၈၀၀ကျပ်ဖြင့် ဈေးနှုန်းသက်သာစွာ ရောင်းချပေးလျက်ရှိသည်။

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ၊ စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီအနေဖြင့် စားအုန်းဆီကမ္ဘာ့စျေးနှုန်းဖြစ်တည်ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့်စျေးနှုန်းများ ဖြစ်ပေါ်စေရေး ထိန်းကျောင်းဆောင် ရွက်လျက်ရှိကြောင်း သိရသည်။

စားအုန်းဆီ အဓိကထုတ်လုပ်တင်ပို့သည့် မလေးရှားနိုင်ငံနှင့်အင်ဒိုနီးရှာနိုင်ငံတို့တွင် ဖြစ်ပေါ်နေသည့်FOB စျေးနှုန်းများကို နေ့စဥ်စောင့်ကြည့်ကာ သယ်ယူပို့ဆောင်ခကုန်ကျ စရိတ်၊ ဘဏ်စရိတ်များ၊ အခွန်အခများထည့်သွင်းတွက် ချက်၍ ပြည်တွင်းစျေးကွက်အတွင်းရောင်း ဝယ် ဖောက် ကားရမည့် အခြေခံလက်ကားရည်ညွှန်းစျေးနှုန်းကို ထုတ် ပြန်ပေးလျက်ရှိကြောင်းသိရသည်။

Photo – မြန်မာနိုင်ငံ ဆီကုန်သည်နှင့်ဆီလုပ်ငန်းရှင်များအသင်း