မကွေးတိုင်း၊ရေစကြိုမြို့နယ်၊ပခန်းငယ်ကျေးရွာရှိ အ.ထ.က(ပခန်းငယ်)၌ ဖေဖော်ဝါရီ ၂၂ ရက်နံနက်ပိုင်းက ကျောင်းသား၊ကျောင်းသူများစာမေးပွဲဖြေဆိုနေစဥ် လက်နက်ကိုင်အဖွဲ့ဝင်များက သေနတ်များဖြင့်ပစ်ခတ်ခဲ့ကြသည်ဟု နစက ၏သတင်းထုတ်ပြန်ရေးအဖွဲ့မှ သိရသည်။
စာမေးပွဲဖြေဆိုနေသည့် ကျောင်းသား၊ကျောင်းသူများအား လုံခြုံရေးအဖွဲ့ဝင်များကလုံခြုံရေးယူပေးနေကြစဥ် လက်နက်ကိုင်အဖွဲ့ဝင်များက နံနက် ၁၀ နာရီခွဲခန့်တွင် သေနတ်များဖြင့်ပစ်ခတ်တိုက်ခိုက်ခဲ့၍ အပြန်အလှန်ပစ်ခတ်မှုဖြစ်ပွားကာ လက်နက်ကိုင်အဖွဲ့ဝင်များသည် ကျေးရွာမြောက်ဘက်သို့ထွက်ပြေးသွားခဲ့ကြသည်ဟု နစက ၏သတင်းထုတ်ပြန်ရေးအဖွဲ့ကဆိုသည်။
“စာမေးပွဲဖြေနေတဲ့အချိန်မှာ ကျောင်းသား၊ကျောင်းသူတွေရဲ့စိတ်က အေးချမ်းနေဖို့လိုတယ် ကြောက်လန့်နေရတဲ့စိတ်နဲ့ဖြေရရင် သူတို့အတွက်အဆင်မပြေဘူးလေ သေနတ်သံတွေကြားရတော့ ကလေးတွေလန့်နေကြမှာ စာမေးပွဲဆက်မဖြေနိုင်ကြမှာကိုအရမ်းစိတ်ပူတယ်”ဟု ရေစကြိုမြို့နယ်အခြေစိုက် လူမှုကူညီရေးအသင်းဝင်တစ်ဦးကပြောသည်။
ရေစကြိုတွင်အခြေအနေကစိတ်မချရသဖြင့် အချို့ကတိမ်းရှောင်နေကြရသလို မွေးရပ်မြေရေစကြိုသို့ ကိုဗစ်ကတည်းက အလည်မပြန်ဖြစ်သေးကြောင်း ရန်ကုန်အခြေချရေစကြိုသားများကဆိုသည်။
အထက်ပါဖြစ်စဉ်ဖြစ်ပွားခဲ့သည့်နေ့တွင်ပင် နစကသည်လုံခြုံရေး၊တရားဥပဒေစိုးမိုးရေးနှင့်နယ်မြေအေးချမ်းသာယာရေးကို ပိုမိုထိရောက်စွာဆောင်ရွက်နိုင်ရန်အတွက် အနောက်မြောက်တိုင်းစစ်ဌာနချုပ်နယ်မြေဖြစ်သည့် ရွှေဘို၊ဝက်လက်နှင့်အရာတော်မြို့နယ်တို့အား စစ်အုပ်ချုပ်ရေးနယ်မြေများအဖြစ် ထုတ်ပြန်ခဲ့သည်။