စစ်ပွဲအဆုံးသတ်တော့မည်ဟုထင်ကြောင်းနှင့်ဇလန်းစကီးနှင့်တွေ့ရန်ဆန္ဒရှိကြောင်းပူတင်ပြော

ယူကရိန်းစစ်ပွဲသည် အဆုံးသတ်တော့မည့်အနေအထား ဖြစ်နိုင်ကြောင်း ရုရှားသမ္မတ ဗလာဒီမာပူတင်က ပြောကြားခဲ့ပြီး အကယ်၍သာ ငြိမ်းချမ်းရေးသဘောတူညီချက်ကို အပြီးသတ် နိုင်လျှင် ယူကရိန်းသမ္မတ ဗိုလိုဒီမာ ဇလန်းစကီးနှင့် တတိယနိုင်ငံတစ်ခုတွင် တွေ့ဆုံသွားရန် ဆန္ဒရှိကြောင်း သူကထုတ်ဖော်ပြောဆိုခဲ့သည်။

ရုရှား၏ နှစ်များစွာအတွင်း အင်အားအနည်းဆုံးပမာဏဖြင့် ကျင်းပခဲ့သည့် စစ်အောင်ပွဲနေ့ စစ်ရေးပြအခမ်းအနားတွင် ပူတင်က ယူကရိန်းတွင် အောင်ပွဲခံမည်ဟု ကတိပြုခဲ့ပြီး နာရီပိုင်းအကြာ စနေနေ့က သတင်းထောက်များကို ထိုကဲ့သို့ ပြောကြားခဲ့ခြင်းဖြစ်သည်။

ရုရှားနှင့် ယူကရိန်းတို့ သည် သုံးရက်ကြာ အပစ်အခတ်ရပ်စဲမှု စတင်ခဲ့ကာ အကျဉ်းသား ၁,၀၀၀ ကို လဲလှယ်ရန် သဘောတူညီခဲ့ပြီး သံတမန်ရေးတိုးတက်မှု ပြန်လည်ရရှိလာမှုကို သတိဖြင့်မျှော်လင့်ချက်များကို မြင့်တက်စေသည့် ဖြစ်ပေါ် တိုးတက်ပြောင်းလဲမှုများတွင် ယင်းမှတ်ချက်များ ထွက်လာခြင်းဖြစ်သည်။

စစ်ရေးပြပွဲတွင် ပူတင်က ယူကရိန်းတွင် တိုက်ခိုက်နေသော ရုရှားတပ်ဖွဲ့ဝင်များကို ချီးကျူးခဲ့ပြီး ၎င်းတို့၏ တာဝန်သည် နေတိုးစစ်အုပ်စုတစ်ခုလုံးက လက်နက်တပ်ဆင်ပေးကာ ထောက်ပံ့ပေးထားသော ရန်လိုသော အင်အားစုကို ဆန့်ကျင်သည့် တရားမျှတသော အရေးကိစ္စအဖြစ် ပုံဖော်ခဲ့သည်။

“အောင်ပွဲသည် အမြဲတမ်းရှိခဲ့ပြီး နောင်လည်း ရှိဦးမည်”ဟု မော်စကို၏ ရင်ပြင်နီတွင် စစ်ကြောင်းများတန်းစီနေစဉ် ၎င်းက ဆက်လက် ပြောကြားခဲ့သည်။

နောက်ပိုင်းတွင် သတင်းထောက်များကို ပြောကြားရာ၌ ပူတင်က စစ်ပွဲသည် အနောက်တိုင်း ကမ္ဘာလုံးဆိုင်ရာဝါဒီ အထက်တန်းလွှာများကြောင့်ဖြစ်ပေါ်ခဲ့ရသည်ဟု အပြစ်တင်ခဲ့ကာ ၁၉၈၉ ခုနှစ် ဘာလင်တံတိုင်းပြိုကျပြီးနောက်တွင် နေတိုးသည် အရှေ့ဘက်သို့ မတိုးချဲ့ဟု ကတိပေးခဲ့သော်လည်း ယူကရိန်းကို ဥရောပသမဂ္ဂ၏ လမ်း ကြောင်းထဲသို့ ဆွဲသွင်းရန် ကြိုးစားခဲ့ကြောင်း ပြောကြားခဲ့သည်။

ထို့နောက် ၎င်းက “ဒီကိစ္စက ပြီးဆုံးတော့မယ်လို့ ကျွန်တော်ထင်ပါတယ်” ဟု ကြေညာခဲ့သည်။

ရုရှား၏ နှစ်စဉ်ကျင်းပသော အောင်ပွဲနေ့သည် ဒုတိယကမ္ဘာစစ်တွင် နာဇီဂျာမနီကို ဆိုဗီယက်ပြည်ထောင်စုက အနိုင်ရသည့်နေ့ဖြစ်ပြီး စစ်ပွဲတွင် ကျဆုံးခဲ့သော ဆိုဗီယက်နိုင်ငံသား ၂၇ သန်းကို အောက်မေ့ဂုဏ်ပြုသည်။

Ref: အယ်လ်ဂျာဇီးယား