စစ်ပွဲကာလအတွင်း ယူကရိန်းကာကွယ်ရေးဝန်ကြီးအပြောင်းအလဲလုပ်

ကိဗ်၊ဖေဖော်ဝါရီ ၆

လက်ရှိယူကရိန်းကာကွယ်ရေးဝန်ကြီး အလက်စီရယ်ဇ်နီကော့ဗ်၏နေရာ၌ စစ်ထောက်လှမ်းရေးအကြီးအကဲနှင့် အစားထိုးရန်စီစဉ်နေကြောင်း သမ္မတဇလန်းစကီးနှင့်နီးစပ်သူတစ်ဦးကပြောကြားခဲ့သည်။

မစ္စတာရယ်ဇ်နီကော့ဗ်အား အခြားဝန်ကြီးဌာနသို့ရွှေ့ပြောင်းတာဝန်ထမ်းဆောင်စေမည်ဖြစ်ပြီး GUR စစ်ထောက်လှမ်းရေးအကြီးအကဲ ကီရီလိုဘူဒါနို နှင့်အစားထိုးမည်ဖြစ်ကြောင်း ပြည့်သူ့ပါလီမန်အဖွဲ့၏ အကြီးတန်းလွှတ်တော်အမတ်နှင့်အမှုဆောင်အဖွဲ့အကြီးအကဲ ဒေးဗစ်အရက်ခ်ခမီးယားကပြောကြားခဲ့သည်။

ယင်းနောက်၎င်းက ယခုလိုစစ်ပွဲကာလအတွင်း၌ ကာကွယ်ရေးဝန်ကြီးဌာနအား ရိုးရိုးနိုင်ငံရေးသမားတစ်ဦးကဦးဆောင်ခြင်းထက် ကာကွယ်ရေးနှင့်လုံခြုံရေးနယ်ပယ်၌ အတွေ့အကြုံရှိသူကသာဦးဆောင်သင့်သဖြင့် ယခုလိုပြောင်းလဲလိုက်ရခြင်းဖြစ်သည်ဟုဆိုခဲ့သည်။

မစ္စတာရယ်ဇ်နီကော့ဗ်သည် ဗျူဟာမြောက်စက်မှုလုပ်ငန်းများကဏ္ဍကိုဦးဆောင်မည်ဖြစ်သည်ဟုလည်း ပြောကြားခဲ့သည်။သို့သော်မစ္စတာရယ်ဇ်နီကော့ဗ်ကမူ သမ္မတနှင့်ဝန်ကြီးချုပ်ထံမှ ယခုနယ်ပယ်အတွက် ရုတ်တရက်ကမ်းလှမ်းလာလျှင်တောင် ကျွမ်းကျင်မှုမရှိသည့်အတွက် ၎င်းအနေဖြင့်ငြင်းဆန်မည်ဟုသာဆိုခဲ့သည်။

ယူကရိန်း၏ရာထူးအချိန်းအပြောင်းပြုလုပ်မှုသည် ယခုလအတွင်းရုရှားဘက်မှ အကြီးစားထိုးစစ်ဆင်ရန်စီစဉ်နေသဖြင့် ယူကရိန်းဘက်မှစိုးရိမ်မှုများမြင့်တက်လာချိန်တွင် ပြုလုပ်ခဲ့ခြင်းဖြစ်သည်။

ယူကရိန်းဘက်မှ တန်ပြန်ထိုးစစ်ဆင်ရန်စီစဉ်နေသော်လည်း အနောက်နိုင်ငံများမှပေးပို့မည့် တိုက်ခိုက်ရေးတင့်ကားများနှင့် ခြေလျင်တပ်သုံးတိုက်ခိုက်ရေးယာဉ်များကိုစောင့်ဆိုင်းနေခြင်းဖြစ်သည်ဟုသိရှိရသည်။

Source : Reuters