စစ်ကိုင်းမြို့မှ တက္ကသိုလ်ဝင်စာမေးပွဲ ပြန်လည်ဖြေဆိုကြမည့် ကျောင်းသား၊ ကျောင်းသူများကို အောင်ချက် မြင့်မားရေး သင်ကြားပို့ချပေးမည့် ရန်ကုန်တက္ကသိုလ်မှ ဆရာ၊ ဆရာမ (၅၃)ဦးသည် မေလ (၁)ရက်၊ ညနေပိုင်းတွင် စစ်ကိုင်းမြို့သို့ ရောက်ရှိလာကြောင်း သိရသည်။
ငလျင်ကြီးကြောင့် အဖြေလွှာများ ပျက်စီးခဲ့ရသည့် စစ်ကိုင်းတိုင်းဒေသကြီး၊ စစ်ကိုင်းမြို့မှ တက္ကသိုလ်ဝင်စာမေးပွဲ ပြန်လည်ဖြေဆိုကြမည့် ကျောင်းသား၊ ကျောင်းသူများကို သင်ကြားကြမည့် ရန်ကုန်တက္ကသိုလ်မှ ဆရာ၊ ဆရာမ (၅၃)ဦးအား စစ်ကိုင်းတိုင်းဒေသကြီး ပညာရေးမှူး ဦးသက်လေးဦး၊ ခရိုင်စီမံအုပ်ချုပ်ရေးအဖွဲ့ဥက္ကဋ္ဌ ဦးမျိုးအောင်နှင့် တာဝန်ရှိသူများ၊ ကျောင်းသား၊ ကျောင်းသူများက ကြိုဆိုခဲ့ကြသည်။
စစ်ကိုင်းပညာရေးတက္ကသိုလ်တွင် လေ့ကျင့်သင်ကြားရေးစခန်း ဖွင့်လှစ်၍ စစ်ကိုင်းမြို့မှ တက္ကသိုလ်ဝင်စာမေးပွဲ ပြန်လည်ဖြေဆိုကြမည့် ကျောင်းသား၊ ကျောင်း သူများကို ရန်ကုန်တက္ကသိုလ်မှ (၅၃)ဦး၊ ဒဂုံတက္ကသိုလ်မှ (၁)ဦး၊ စစ်ကိုင်းပညာရေးတက္ကသိုလ်မှ (၁၃)ဦး၊ စစ်ကိုင်းတက္ကသိုလ်မှ (၁၆)ဦး၊ စစ်ကိုင်းပညာရေးဒီဂရီကောလိပ်မှ (၇)ဦး၊ စုစုပေါင်း ဆရာ၊ ဆရာမ (၉၀)ဦးတို့က သင်ခန်းစာများကို အနီးကပ်သင်ကြားပို့ချပေးမည် ဖြစ်ကြောင်း သိရသည်။