သက်ကြီးရွယ်အို စင်ကာပူအိမ်ရှင်များထံမှ တစ်လအတွင်း စုစုပေါင်း ဒေါ်လာ ၁၂,၀၀၀ ခိုးယူခဲ့မှုဖြင့် အသက် ၃၁ အရွယ် မြန်မာအိမ်အကူတစ်ဦးကို ဇွန် ၂၄ ရက်တွင် ထောင်ဒဏ် ၉ လ ချမှတ်ခဲ့ကြောင်း သိရသည်။
မအိဇင်ဖြူသည် အသက် ၈၁ နှစ်နှင့် ၈၂ နှစ်အသီးသီးရှိကြသည့် သက်ကြီးရွယ်အို ဇနီးမောင်နှံနှင့် Hougang ရိပ်သာလမ်းရှိ ၎င်းတို့၏ နေအိမ်တွင် အတူတူနေထိုင်ကာ အလုပ်လုပ်ကိုင်ခဲ့သူဖြစ်သည်။
သူသည် အိမ်ရှင်အမျိုးသားကြီး အေတီအမ်စက်သို့ ငွေထုတ်သွားရာတွင် မကြာခဏ လိုက်ပါသွားရလေ့ရှိကာ ငွေထုတ်မှုများကို ကူညီပေးရသည်။
ယင်းသို့ငွေထုတ်သွားမှုများအတွင်း သူသည် ၎င်း၏ အေတီအမ်ကတ် ပင်နံပါတ်ကို အလွတ်မှတ်ထားကာ ဧည့်ခန်းရှိ အံ့ဆွဲတစ်ခုအတွင်း ပိုက်ဆံအိတ်ကို သိမ်းဆည်းလေ့ရှိသည်ကိုလည်း သတိပြုမိထားသည်။
မဖြူသည် ၂၀၂၃ ခုနှစ် ဒီဇင်ဘာ ၅ ရက်မှ ၂၀၂၄ ခုနှစ် ဇန်နဝါရီ ၁၃ ရက်အတွင်း အေတီအမ်ကတ်ကို ၁၁ ကြိမ်တိုင် ခိုးယူခဲ့ကာ တစ်ကြိမ်လျှင် ဒေါ်လာ ၅၀၀ မှ ၁၅၀၀ အထိ ငွေထုတ်ယူခဲ့သည်။ သူသည် စုစုပေါင်း ဒေါ်လာ ၁၂,၀၀၀ ထုတ်ယူခဲ့ပြီး အချို့ရက်များတွင် ငွေနှစ်ကြိမ် ထုတ်ယူခဲ့သည်။
ထို့နောက် စတိုင်းဆိုင်များရှိ Singtel Dash e-wallet ဝန်ဆောင်မှုကိုသုံး၍ ထုတ်ယူခဲ့သောငွေများကို မြန်မာနိုင်ငံရှိ မိသားစုထံ ပြန်လွှဲပေးခဲ့သည်။ ကွယ်လွန်သူဖခင်၏ ဆေးဖိုးဝါးခ အကြွေးများကို ပေးဆပ်ရန်အတွက် အိမ်ကို ပို့ပေးခဲ့သည်ဟု သူကဆိုသော်လည်း အချို့သောငွေများကို မြန်မာနိုင်ငံတွင် ရွှေဝယ်ယူရန်အတွက် အသုံးပြုခဲ့သည်ဟု သိရသည်။
အလုပ်ရှင်အမျိုးသမီးကြီးက ၎င်းတို့ဘဏ်အကောင့်တွင် ကွဲလွဲမှုများဖြစ်နေသည်ကို သတိပြုမိခဲ့ကာ မဖြူကို မေးမြန်းခဲ့ရာမှ ဇန်နဝါရီ ၁၉ ရက်တွင် ခိုးယူမှု ပေါ်ပေါက်ခဲ့သည်။ အိမ်ရှင်ဇနီးမောင်နှံသည် ချွေးမဖြစ်သူကို အကြောင်းကြား၍ ရဲစခန်းကို တိုင်ကြားခဲ့ကြသည်။
သူ့မိခင်သည် ဖခင်၏ ဆေးကုသမှုများအတွက် အကြွေးများစွာ ပေးဆပ်ခဲ့ရကြောင်းနှင့် အိမ်မှ အကြိမ်ကြိမ် ဖုန်းခေါ်ပြောဆိုမှုများကြောင့် စိတ်ပျက်လက်ပျက်ဖြစ်ခဲ့ရကြောင်း တရားရုံးသို့ ပြောကြားခဲ့သည်ဟု Shin Min နေ့စဉ်သတင်းက ဖော်ပြသည်။
သူ၏ လုပ်ရပ်အတွက် နောင်တရမိကြောင်းနှင့် အမှုကို သက်သက်ညှာညှာစဉ်းစားပေးပါရန် သူက တောင်းပန်လျှောက်လဲခဲ့ကြောင်းလည်း သိရသည်။
သို့သော်လည်း မဖြူသည် ထုတ်ယူခဲ့သောငွေများအတွက် ပြန်ပေးလျော်ခြင်းမရှိကြောင်း တရားရုံးက မှတ်ချက်ပြုခဲ့သည်။
လက်ရှိတွင် အိမ်ရှင်ဇနီးမောင်နှံသည် အိမ်အကူအသစ် ရရှိသွားခဲ့ပြီဟု သိရသည်။
Ref:STOMP