ငလျင်ဘေးသင့်ဒေသများတွင် စက်သုံးဆီဖြန့်ဖြူးမှု ပုံမှန်အခြေအနေသို့ရောက်ရှိနေပြီဖြစ်ကာ နိုင်ငံတစ်ဝှမ်း၌ စက်သုံးဆီပြတ်လပ်မှုမရှိစေရန် အရန်ဆီများအား (၂)ပတ်စာခန့်သိုလှောင်ထားကြောင်း သိရသည်။
အလားတူ အရောင်းဆိုင်များတွင်လည်း စက်သုံးဆီပြတ်လပ်မှုမရှိစေရန်စီမံဆောင်ရွက်လျက်ရှိပြီး စက်သုံးဆီစျေးနှုန်းများမှာ ကျပ်(၂၀၀)မှ ကျပ်(၃၀၀)ခန့်အထိကျဆင်းလျက်ရှိကြောင်း သိရသည်။
မန္တလေးငလျင်ကြီးဖြစ်ပွါးပြီးနောက် ပျက်စီးချို့ယွင်းခဲ့သည့် စက်သုံးဆီအရောင်းဆိုင်အချို့အား အမြန်ပြန်လည်ပြင်ဆင်ပြီး စက်သုံးဆီများကိုဖြန့်ဖြူးရောင်းချနိုင်ရေးဆောင်ရွက်ခြင်း၊ ပြည်ပမှစက်သုံးဆီတင်သင်္ဘောများအဆက်မပြတ်ဝင်ရောက်ခြင်းတို့ကြောင့် စက်သုံးဆီပြတ်လပ်မှုမဖြစ်နိုင်ကြောင်း စွမ်းအင်ဝန်ကြီးဌာနက အသိပေးနှိုးဆော်ခဲ့သည်ဟုဆိုသည်။
ထို့ပြင် ငလျင်ဘေးသင့်ဒေသများတွင် ကူညီကယ်ဆယ်ရေးနှင့်ပြန်လည်ထူထောင်ရေးလုပ်ငန်းများအတွက် အရောင်းဆိုင်များမှ တိုက်ရိုက်နှင့်နေရာအရောက်လုံလောက်စွာဖြန့်ဖြူးရောင်းချပေးခြင်း၊ ပရဟိတအသင်းအဖွဲ့ များသို့ စက်သုံးဆီလှူဒါန်းခြင်းများကိုလည်းဆောင်ရွက်ခဲ့ကြောင်း သိရသည်။
ထို့ကြောင့် အများပြည်သူ၏ ပူးပေါင်းပါဝင်မှု၊ စက်သုံးဆီအသင်းနှင့် သိုလှောင်ကန်စခန်း၊ အရောင်းဆိုင်နှင့် ဆီဘောက်ဆာလုပ်ငန်းရှင်တို့၏ပူးပေါင်းကြိုးပမ်းဆောင်ရွက်ခဲ့မှုတို့ကြောင့် စက်သုံးဆီဖြန့်ဖြူးခြင်းလုပ်ငန်းများကို ပုံမှန်အခြေအနေအတိုင်းဖြန့်ဖြူးရောင်းချနေပြီဖြစ်ကြောင်း သိရသည်။