စက်သုံးဆီချွေတာရေးကို အမျိုးသားရေးမူဝါဒအဖြစ် ဆောင်ရွက်မည်

ပြည်သူများ သွားလာမှုမြန်ဆန်ချောမွေ့ရေးနှင့် ကုန်စည်စီးဆင်းမှု အရှိန်မြှင့်တင်နိုင်ရေးအတွက် ကုန်းလမ်း၊ ရထားလမ်း၊ ရေကြောင်းနှင့် လေကြောင်းပို့ဆောင်ရေးကဏ္ဍများကို ဟန်ချက်ညီညီ အဆင့်မြှင့်တင်သွားမည်ဖြစ်ပြီး စက်သုံးဆီချွေတာရေးကိုလည်း အမျိုးသားရေးမူဝါဒတစ်ရပ်အဖြစ် ဆောင်ရွက်သွားမည်ဖြစ်ကြောင်း နိုင်ငံတော်သမ္မတ ဦးမင်းအောင်လှိုင်က ပြောကြားသည်။

နိုင်ငံတော်သမ္မတက ဇူလိုင် ၃၁ ရက်တွင် ပြည်ထောင်စုလွှတ်တော်၌ ပြောကြားသည့် အစိုးရရက်ပေါင်း ၁၀၀ ပြည့် နိုင်ငံတော်အခြေပြမိန့်ခွန်းတွင် “လမ်းပန်းဆက်သွယ်ရေးကောင်းမွန်မှ စီးပွားရေးဖွံ့ဖြိုးမည်” ဟူသည့် ဆောင်ပုဒ်နှင့်အညီ ပြည်ထောင်စုတစ်ဝန်းရှိ လမ်းတံတားကွန်ရက်များနှင့် ပို့ဆောင်ရေးအခြေခံအဆောက်အအုံများကို အဆင့်မြှင့်တင်နေကြောင်း ထည့်သွင်းပြောကြားခဲ့သည်။

ကျေးလက်ဒေသများတွင် ရာသီမရွေးသွားလာနိုင်သည့် ကုန်ထုတ်လမ်းနှင့် တံတားများ ကောင်းမွန်စေရေးကို အလေးထားဆောင်ရွက်နေသကဲ့သို့ သဘာဝဘေးအန္တရာယ်နှင့် ပဋိပက္ခများကြောင့် ပျက်စီးခဲ့သည့် လမ်းတံတားအခြေခံအဆောက်အအုံများကိုလည်း အမြန်ဆုံး ပြန်လည်ထူထောင်ပေးနေကြောင်း သိရသည်။

ကမ္ဘာ့နိုင်ငံရေးအခြေအနေများနှင့် အရှေ့အလယ်ပိုင်းပဋိပက္ခများကြောင့် စက်သုံးဆီဈေးနှုန်းမြင့်တက်မှုနှင့် ပြတ်လပ်မှုဆိုင်ရာ စိန်ခေါ်မှုများ ဖြစ်ပေါ်နေပြီး မြန်မာနိုင်ငံအနေဖြင့် နှစ်စဉ် အမေရိကန်ဒေါ်လာ ၅ ဘီလီယံခန့် တန်ဖိုးရှိသော စက်သုံးဆီများ တင်သွင်းနေရကြောင်း နိုင်ငံတော်သမ္မတက ပြောကြားသည်။

ယင်းအခြေအနေကို ကျော်လွှားနိုင်ရေးအတွက် မော်တော်ယာဉ်များကို စုံရက်၊ မရက်စနစ်ဖြင့် မောင်းနှင်စေခြင်းနှင့် ဗုဒ္ဓဟူးနေ့တိုင်း Work from Home စနစ် ကျင့်သုံးစေခြင်းတို့ကို ဆောင်ရွက်ခဲ့ရာ တစ်ရက်လျှင် စက်သုံးဆီဂါလန် ၁ ဒသမ ၂ သန်းနှင့် အမေရိကန်ဒေါ်လာ ၇ သန်းခန့် သက်သာခဲ့ကြောင်း မိန့်ခွန်းတွင် ဖော်ပြထားသည်။ ပြည်သူများအနေဖြင့်လည်း စက်သုံးဆီကို ခြိုးခြံချွေတာသုံးစွဲပြီး ပူးပေါင်းပါဝင်ကြရန် တိုက်တွန်းခဲ့သည်။

အစိုးရရက်ပေါင်း ၁၀၀ စီမံချက်အတွင်း ရန်ကုန်–မန္တလေး၊ ရန်ကုန်–မော်လမြိုင်နှင့် ရန်ကုန်–ပြည် ရထားလမ်းများကို အဆင့်မြှင့်တင်နေပြီး ပြည်သူများ သွားလာရေးအဆင်ပြေစေရန် တစ်ရက်လျှင် လူစီးရထား ၇၆ စင်း ပြေးဆွဲပေးလျက်ရှိကြောင်း သိရသည်။

ရထားပို့ဆောင်ရေးကဏ္ဍတွင် စက်သုံးဆီအစားထိုး ဘက်ထရီစနစ်သုံး လျှပ်စစ်ရထားစက်ခေါင်းများ (Battery Electric Locomotives–BEL) ကို ပြည်တွင်း၌ ပြောင်းလဲပြင်ဆင်ထုတ်လုပ်၍ အချို့ရထားလမ်းပိုင်းများတွင် စတင်ပြေးဆွဲနေသည်။ BEL စက်ခေါင်းများသည် စက်သုံးဆီသုံးစွဲမှုနှင့် ကုန်ကျစရိတ်ကို လျှော့ချနိုင်သည့်အပြင် သဘာဝပတ်ဝန်းကျင်ထိခိုက်မှု နည်းပါးသဖြင့် လျှပ်စစ်ရထားစနစ် အပြည့်အဝအသုံးမပြုနိုင်မီ ဆက်လက်တိုးချဲ့အသုံးပြုသွားမည်ဖြစ်သည်။ မော်တော်ယာဉ်ကဏ္ဍတွင်လည်း လျှပ်စစ်စွမ်းအင်သုံးယာဉ်များ (EV) အစားထိုးအသုံးပြုရေးကို အားပေးဆောင်ရွက်သွားမည်ဖြစ်သည်။

ကုန်ကျစရိတ်သက်သာသည့် ရေကြောင်းသယ်ယူပို့ဆောင်ရေး တိုးတက်စေရန် ဧရာဝတီမြစ်နှင့် ချင်းတွင်းမြစ်တို့ကို ရာသီမရွေး ထိရောက်စွာအသုံးပြုနိုင်ရေး ရေလမ်းကြောင်းပြုပြင်ခြင်းလုပ်ငန်းများ ဆောင်ရွက်သွားမည်ဖြစ်ကြောင်းလည်း မိန့်ခွန်းတွင် ပါရှိသည်။

လေကြောင်းပို့ဆောင်ရေး၌ လေကြောင်းလိုင်းငါးလိုင်းမှ လေယာဉ် ၃၂ စင်းဖြင့် ပြေးဆွဲပေးနေပြီး အနီးစခန်း၊ ကော့သောင်း၊ မြိတ်၊ ထားဝယ်၊ ပုသိမ်၊ ပုဂံညောင်ဦး၊ ကျိုင်းတုံနှင့် တာချီလိတ်လေဆိပ်များတွင် ခရီးသည်တင်ဂျက်လေယာဉ်များ ဆင်းသက်နိုင်ရေး လေယာဉ်ပြေးလမ်းအဆင့်မြှင့်တင်ခြင်းအပါအဝင် စီမံချက် ၁၀ ခုကို ရက်ပေါင်း ၁၀၀ အတွင်း အကောင်အထည်ဖော်နိုင်ခဲ့ကြောင်း သိရသည်။

နိုင်ငံတော်အစိုးရအနေဖြင့် ပို့ဆောင်ရေးကဏ္ဍအားလုံး၌ အခြေခံအဆောက်အအုံများ ပိုမိုခေတ်မီကောင်းမွန်လာစေရေးနှင့် ပြည်သူများ သွားလာရာတွင် “လုံခြုံစိတ်ချရမှု၊ အချိန်မှန်ကန်မှုနှင့် စိတ်ချမ်းမြေ့မှု” အပြည့်အဝရရှိစေရေး ဆက်လက်ကြိုးပမ်းသွားမည်ဖြစ်ကြောင်း နိုင်ငံတော်သမ္မတက ပြောကြားခဲ့သည်။