Yangon Galacticos E Sports အားကစားအသင်းသည် မြန်မာနိုင်ငံကိုယ်စားပြု၍ ဆော်ဒီအာရေဗျနိုင်ငံ၊ ရီးယာဒ့်မြို့၌ ဇူလိုင် ၂၅ ရက်မှ ဩဂုတ် ၃ ရက်အထိ ကမ္ဘာ့အဆင့် E Sports World Cup ပြိုင်ပွဲ၏ PUBG Mobile ကစားနည်းတွင်ဝင်ရောက်ယှဉ်ပြိုင်ခဲ့ပြီး ကမ္ဘာ့ချန်ပီယံရွှေတံဆိပ်ဆုကို ဆွတ်ခူးရရှိခဲ့သည်။
ထို့ကြောင့် ဂုဏ်ပြုပွဲအခမ်းအနားအား သြဂုတ် ၂၈ ရက်နံနက် ၁၀ နာရီက ရန်ကုန်မြို့၌ကျင်းပရာ မြန်မာနိုင်ငံ အိုလံပစ်ကော်မတီဥက္ကဋ္ဌ၊ အားကစားနှင့်လူငယ်ရေးရာဝန်ကြီးဌာနနှင့် ဟိုတယ်နှင့်ခရီးသွားလာရေးဝန်ကြီးဌာန ပြည်ထောင်စုဝန်ကြီး Jeng Phang နော်တောင်တက်ရောက်ခဲ့သည်။
ထိုသို့ တက်ရောက်ပြီးနောက် E Sport အားကစားနည်းအောင်မြင်မှုအရှိန်အဟုန်ကို ဆက်လက်ထိန်းသိမ်းနိုင်ရေး Sustainable Development အတွက် မြန်မာပြည်တစ်ဝန်းမှ E Sports ဝါသနာရှင်ရွက်ပုန်းသီးအားကစားသမားများကို ဖော်ထုတ်နိုင်ရန် တိုင်းနှင့် ပြည်နယ်အားကစားနှင့် ကာယပညာဦးစီးဌာနများနှင့် ပေါင်းစပ်ညှိနှိုင်းဆောင်ရွက်ရန် တိုက်တွန်းပြောကြားခဲ့သည်။
ထို့ပြင် ဒီဇင်ဘာလအတွင်းကျင်းပမည့် (၃၃)ကြိမ်မြောက် အရှေ့တောင်အာရှအားကစားပြိုင်ပွဲတွင်လည်း E Sports အဖွဲ့ချုပ်၏ စီမံဆောင်ရွက်နိုင်မှု၊ E Sports လက်ရွေးစင်အားကစားသမားများ၏ ကြိုးစားလေ့ကျင့်ယှဉ်ပြိုင်မှုများ၏ အကျိုးရလဒ်အဖြစ် မြန်မာနိုင်ငံတော်အလံကို နိုင်ငံတော်သီချင်းနှင့်အတူ ထိုင်းနိုင်ငံ၌ အလံတိုင်ထိပ်အရောက်လွှင့် ထူနိုင်မည်ကို ယုံကြည်သည်ဟုလည်းပြောကြားခဲ့သည်။
ထို့နောက် ပြည်ထောင်စုဝန်ကြီးမှ အားကစားအဖွဲ့အား ဂုဏ်ပြုဆုငွေကျပ်သိန်း(၄၀၀)နှင့် အုပ်ချုပ်နည်းပြများအား ဂုဏ်ပြုဆုငွေကျပ်သိန်း(၂၀၀)၊ ရန်ကုန်တိုင်းဝန်ကြီးချုပ်မှ အုပ်ချုပ်/နည်းပြများအား ဂုဏ်ပြုဆုငွေကျပ်သိန်း(၁၀၀)၊ KBZ Group မှ ဂုဏ်ပြုချီးမြှင့်ငွေကျပ်သိန်း(၈)ထောင်တို့အပါအဝင် အလှူရှင်များ၏ ဂုဏ်ပြုချီးမြှင့်ငွေကျပ်သိန်း (၁၃,၁၀၀)ကို ပြည်ထောင်စုဝန်ကြီးက ပေးအပ်ချီးမြှင့်ခဲ့သည်။