လေးမျက်နှာ၊ ဇူလိုင်-၃၁
ဧရာဝတီတိုင်း၊ လေးမျက်နှာမြို့နယ်အတွင်း ငဝန်မြစ်ရေကာတာ ကျိုးပေါက်မှုဖြစ်ပွားခဲ့ပြီး ရေကြီးရေလျှံလာမှုကြောင့် ရပ်ကွက် ၅ ခုနှင့် ကျေးရွာ ၄ ရွာမှ ဒေသခံများကို ဘေးလွတ်ရာသို့ အရေးပေါ်ရွှေ့ပြောင်းထားရကြောင်းဧရာ၀တီတိုင်းဒေသကြီးအစိုးရအဖွဲ့မှ သိရသည်။
အရေးပေါ်ရွှေ့ပြောင်းနေရသည့် နေရာများမှာ အမှတ်(၁)ရပ်ကွက်၊ အမှတ်(၂)ရပ်ကွက်၊ အမှတ်(၃)ရပ်ကွက်၊ အမှတ်(၄)ရပ်ကွက်၊ အမှတ်(၅)ရပ်ကွက်၊ ဂျမ်းကုန်းကျေးရွာ၊ ကျွန်းတဲကျေးရွာနှင့် ကွမ်းခြံကုန်းကျေးရွာတို့ဖြစ်ပြီး အဆိုပါနေရာများရှိ အိမ်ထောင်စုများကို ဧရာဝတီတိုင်းဒေသကြီးမီးသတ်ဦးစီးမှူး ဦးဆောင်ကာ သက်ဆိုင်ရာအဖွဲ့အစည်းများနှင့် ပူးပေါင်း၍ ဘေးလွတ်ရာသို့ ကယ်ဆယ်ရွှေ့ပြောင်းရေးလုပ်ငန်းများ ဆောင်ရွက်လျက်ရှိကြောင်း သိရသည်။
မြန်မာနိုင်ငံမီးသတ်ဦးစီးဌာန၏ ထုတ်ပြန်ချက်အရ ငဝန်မြစ်ရေကာတာမှာ ဇူလိုင် ၃၀ ရက်ကတည်းက တာနိမ့်ကျလာသဖြင့် ဒေသခံများနှင့် မီးသတ်တပ်ဖွဲ့ဝင်များ ပူးပေါင်းကာ တုတ်ရိုက်ခြင်း၊ ကျောက်ချခြင်းနှင့် သဲအိတ်များဖြင့် အားဖြည့်ကာကွယ်ခြင်းတို့ကို ဆောင်ရွက်ခဲ့သော်လည်း ဇူလိုင် ၃၀ ရက် ည ၁၁ နာရီဝန်းကျင်တွင် အလျားပေ ၅၀ ခန့် ကျိုးပေါက်သွားခဲ့ကြောင်း ဖော်ပြထားသည်။
လက်ရှိတွင် ရေဘေးသင့်ဒေသများရှိ ပြည်သူများ၏ ဘေးကင်းလုံခြုံရေးအတွက် ကယ်ဆယ်ရေးနှင့် ရွှေ့ပြောင်းရေးလုပ်ငန်းများကို ဆက်လက်ဆောင်ရွက်လျက်ရှိပြီး ရေကြီးရေလျှံမှု အခြေအနေကိုလည်း သက်ဆိုင်ရာတာဝန်ရှိသူများက စောင့်ကြည့်နေကြောင်း သိရသည်။
ဓာတ်ပုံ-ဧရာဝတီတိုင်းဒေသကြီးအစိုးရအဖွဲ့