ဇွန်လ ၅ ရက်
အမေရိကန်ပြည်ထောင်စုသည် အီရန်စစ်ပွဲအတွင်းသို့ အင်အားပြင်းလက်နက်သစ်တစ်ရပ် ဖြစ်သည့် ဂြိုဟ်တုဓာတ်ပုံများကို ဆန်းစစ်လေ့လာခြင်းမှသည် နောက်ဆုံးပစ်မှတ်ရွေးချယ်တိုက်ခိုက်ခြင်းအထိ ပစ်မှတ်ရှာဖွေမှုအဆင့်တိုင်းကို အလိုအလျောက်လုပ်ဆောင်ပေးနိုင်သော ဉာဏ်ရည်တု (AI) မိုဒယ်ကြီးများကို ယူဆောင်လာကြောင်း သတင်းများထွက်ပေါ်နေသည်။
သို့သော်လည်း ယင်းစနစ်များကို မည်သို့လည်ပတ်ပုံဖော်သည်ကိုမူ လျှို့ဝှက်ချက်အဖြစ် တင်းကျပ်စွာ ထိန်းသိမ်းထားဆဲဖြစ်ပြီး လွန်ခဲ့သည့် ဖေဖော်ဝါရီလက အီရန်တောင်ပိုင်းရှိ မူလတန်းကျောင်းတစ်ကျောင်းသည် ဗုံးကြဲတိုက်ခိုက်ခံရကာ ကလေးငယ် ၂၀၀ ကျော် သေဆုံးခဲ့ရသည့် ဖြစ်စဉ်ကဲ့သို့သော အခြေအနေများကြောင့် စစ်ရာဇဝတ်မှုများ ကျူးလွန်ရာတွင် AI ၏ အခန်းကဏ္ဍနှင့် ပတ်သက်၍ ပြည်သူလူထုအကြား စိုးရိမ်ပူပန်မှုများ မြင့်တက်လျက်ရှိသည်။
ယခုအခါ တရုတ်နိုင်ငံသည် ဤနည်းပညာနှင့် ပတ်သက်၍ ပွင့်လင်းမြင်သာမှုရှိစေရန် ပထမဆုံးခြေလှမ်းကို စတင်လှမ်းလိုက်ပြီဖြစ်သည်။
တရုတ်အာကာသသုတေသီများသည် ပြီးခဲ့သည့်လက “Air Target Agent System” ဟုခေါ်ဆိုသည့် စွမ်းဆောင်ရည်မြင့် LLM agent အခြေခံ ပူးပေါင်းဆောင်ရွက်ရေး AI ကိရိယာတစ်ခုကို မိတ်ဆက်ခဲ့ပြီး ၎င်းသည် ဂြိုဟ်တုမှတစ်ဆင့် စောင့်ကြည့်ထောက်လှမ်းခြင်းလုပ်ငန်းကို ရုပ်ပုံခွဲခြားရုံသာမက မြင်တွေ့ရသည့်အရာများကိုပါ ဆန်းစစ်လေ့လာခြင်း၊ ကောက်ချက်ချခြင်းနှင့် လူသားများမပါဘဲ ကိုယ်ပိုင်ဆုံးဖြတ်ချက်ဖြင့် လှုပ်ရှားဆောင်ရွက်ခြင်းများကို လုပ်ဆောင်နိုင်မည်ဖြစ်သည်။
အဆိုပါစနစ်သည် ကြီးမားသော ဘာသာစကားမိုဒယ်များ (LLMs) ကို ရှုပ်ထွေးသောလုပ်ငန်းစဉ်များကို အဆင့်ဆင့်ခွဲခြမ်းနိုင်ခြင်း၊ အယ်လ်ဂိုရီသမ်များကို အလိုအလျောက်ရွေးချယ်နိုင်ခြင်း၊ လုပ်ငန်းခွင်အဆင့်ဆင့်ကို ညှိနှိုင်းဆောင်ရွက်နိုင်ခြင်းနှင့် ချို့ယွင်းချက်များ ဖြစ်ပေါ်လာပါက လူသားတို့ကဝင်ပါ ရန်မလိုဘဲ မိမိဘာသာပြန်လည်ကောင်းမွန်အောင် လုပ်ဆောင်နိုင်ခြင်းစသည့် စွမ်းဆောင်ရည်ရှိသော AI အေးဂျင့်များနှင့် ပေါင်းစပ်ဖွဲ့စည်းထားခြင်း ဖြစ်သည်။
Ref: ဆော့သ်ချိုင်းနားမောနင်းပို့စ်