နိုင်ငံနှင့်ဒေသပေါင်း ၅၀ ကျော်မှ သတင်းမီဒီယာကိုယ်စားလှယ်များ တရုတ်နိုင်ငံ၌ ကျင်းပသည့် Global Journalists Salon သို့ တက်ရောက်
တရုတ်နိုင်ငံ၌ ကျင်းပလျက်ရှိသော China International Press Communication Center (CIPCC) 2026 အစီအစဉ်တွင် ပါဝင်နေသည့် နိုင်ငံနှင့်ဒေသပေါင်း (၅၀) ကျော်မှ သတင်းမီဒီယာကိုယ်စားလှယ်များသည် “ယဉ်ကျေးမှုများအကြား ဆွေးနွေးဖလှယ်ရေး အပြည်ပြည်ဆိုင်ရာနေ့” အထိမ်းအမှတ်အဖြစ် တရုတ်ဆက်သွယ်ရေးတက္ကသိုလ် (CUC) ၌ ကျင်းပသည့် Global Journalists Salon ဆွေးနွေးပွဲတွင် မီဒီယာ၏ နိုင်ငံတကာဆက်သွယ်ရေးတာဝန်နှင့် ယဉ်ကျေးမှုများအကြား အပြန်အလှန်နားလည်မှု မြှင့်တင်ရေးဆိုင်ရာ အခန်းကဏ္ဍများကို ဆွေးနွေးခဲ့ကြကြောင်း သိရသည်။
“ယဉ်ကျေးမှုများအကြား အပြန်အလှန်နားလည်မှု တိုးမြှင့်နိုင်ရေး ဆက်သွယ်ရေးတံတားများ တည်ဆောက်ခြင်း – ကမ္ဘာလုံးဆိုင်ရာ ယဉ်ကျေးမှုဖော်ဆောင်ရေး အစီအစဉ်အောက်ရှိ မီဒီယာ၏တာဝန်” ခေါင်းစဉ်ဖြင့် ကျင်းပသည့် အဆိုပါဆွေးနွေးပွဲတွင် နိုင်ငံတကာမီဒီယာ ပူးပေါင်းဆောင်ရွက်မှု၊ AI ခေတ်အတွင်း ဆက်သွယ်ရေးစနစ်များ၏ ပြောင်းလဲမှုနှင့် လူငယ်သတင်းမီဒီယာပညာရှင်များ၏ အခန်းကဏ္ဍများကို အဓိကထား ဆွေးနွေးခဲ့ကြသည်။
ဆွေးနွေးပွဲ၌ အဓိကမိန့်ခွန်း ပြောကြားရာတွင် တရုတ်ဆက်သွယ်ရေးတက္ကသိုလ် ဒုတိယဥက္ကဋ္ဌ Mengshan က ယနေ့ကမ္ဘာကြီးသည် နည်းပညာတော်လှန်ရေး၊ ဉာဏ်ရည်တုနည်းပညာ ဖွံ့ဖြိုးတိုးတက်မှုနှင့် ပထဝီနိုင်ငံရေး စိန်ခေါ်မှုများကြောင့် အပြောင်းအလဲကြီးများ ကြုံတွေ့နေရကြောင်း ပြောကြားခဲ့သည်။
ထိုသို့သော အခြေအနေများအောက်တွင် ဖလှယ်မှု၊ နားလည်မှုနှင့် ပူးပေါင်းဆောင်ရွက်မှုများသည် ယခင်ကထက် ပိုမိုအရေးပါလာပြီး မီဒီယာများသည် သတင်းအချက်အလက် ဖြန့်ဝေသူများသာမက ယဉ်ကျေးမှုမှတ်တမ်းတင်သူများ၊ တန်ဖိုးထားမှုများကို ပို့ဆောင်သူများနှင့် အများပြည်သူဆိုင်ရာ ဆွေးနွေးမှုများကို ဖော်ဆောင်ပေးသူများလည်း ဖြစ်ကြောင်း ၎င်းက ဆိုသည်။
“မီဒီယာတွေဟာ ယဉ်ကျေးမှုတွေကြား ဆွေးနွေးဖလှယ်ရေးရဲ့ တံတားတည်ဆောက်သူတွေ ဖြစ်ရမှာပါ။ ကမ္ဘာလုံးဆိုင်ရာ စိန်ခေါ်မှုတွေကို ရင်ဆိုင်ရာမှာ သဘောတူညီမှုတွေ ဖော်ဆောင်ပေးနိုင်ရမယ်။ သတင်းအချက်အလက်တွေ လျင်မြန်စွာ စီးဆင်းနေတဲ့ ခေတ်မှာလည်း အမှန်တရားရဲ့ စောင့်ရှောက်သူတွေ ဖြစ်ရပါမယ်” ဟု Mengshan က ပြောကြားခဲ့သည်။
ဆွေးနွေးပွဲတွင် မတူကွဲပြားသော ယဉ်ကျေးမှုများအကြား တန်းတူညီမျှ ဆွေးနွေးဖလှယ်မှု၊ ခေတ်သစ် နိုင်ငံတကာဆက်သွယ်ရေး၊ AI ခေတ်အတွင်း နည်းပညာအခြေပြု ဆက်သွယ်ရေးနှင့် လူငယ်များ၏ မီဒီယာအင်အား စသည့် ခေါင်းစဉ် (၄) ရပ်ကို အဓိကထား ဆွေးနွေးခဲ့ကြောင်း သိရသည်။
အဆိုပါ ဆွေးနွေးပွဲသည် မီဒီယာများ၏ ပရော်ဖက်ရှင်နယ်တာဝန်၊ နိုင်ငံတကာ နားလည်မှုမြှင့်တင်ရေးနှင့် ယဉ်ကျေးမှုများအကြား ပူးပေါင်းဆောင်ရွက်မှု မြှင့်တင်ရေးအတွက် အမြင်ချင်းဖလှယ်သည့် နိုင်ငံတကာ မီဒီယာဆိုင်ရာ ဆွေးနွေးပွဲတစ်ရပ်အဖြစ် ကျင်းပခဲ့ခြင်းဖြစ်ကြောင်း သိရသည်။