ဂျေရုဆလင်မြို့ အရှေ့ဂျေရုဆလင်မြို့ရှိ ရဟူဒီဘုရားကျောင်းတစ်ခုတွင် သောကြာနေ့က လူအသေအပျောက်များသော ပစ်ခတ်မှုတစ်ခုနှင့် ပတ်သက်၍ လူ ၄၂ ဦးကို အစ္စရေးရဲတပ်ဖွဲ့က ယနေ့တွင် ဖမ်းဆီးလိုက်ကြောင်း သိရသည်။
နှစ်များအတွင်း အဆိုးရွားဆုံးဖြစ်သည့် ယင်းတိုက်ခိုက်မှုတွင် လူ ၇ ဦး သေဆုံးခဲ့ပြီး ၃ ဦးထက်မနည်း ဒဏ်ရာရရှိခဲ့သည်။
မြို့ဟောင်းအပြင်ဘက်၌လည်း သီးခြားတိုက်ခိုက်မှုတစ်ခု ယနေ့စနေနေ့တွင် ထပ်မံဖြစ်ပွားခဲ့ကာ လူနှစ်ဦး ဒဏ်ရာရရှိခဲ့သေးသည်။
စနေနေ့က တိုက်ခိုက်မှု၏ သေနတ်သမားမှာ ၁၃ နှစ်အရွယ် အမျိုးသားကလေးငယ်တစ်ဦးဖြစ်ပြီး အသေဖမ်းမိခဲ့ကြောင်း အစ္စရေးရဲတပ်ဖွဲ့က ပြောကြားခဲ့သည်။
အသေးစိတ်အချက်အလက်များကိုမူ ပြောကြားခြင်းမရှိပေ။
အဆိုပါ တိုက်ခိုက်မှုနှစ်ခုကို တုံ့ပြန်သည့်အနေဖြင့် အစ္စရေးအာဏာပိုင်များသည် လိုအပ်သည့်အခါတိုင်း ထူးခြားသည့်ဖြစ်ရပ်များကို ချက်ချင်းတုံ့ပြန်ရန် အကြမ်းဖက်မှုနှိမ်နင်းရေးတပ်ဖွဲ့ဝင်များကို ဂျေရုဆလင်ဧရိယာတွင်“အမြဲတမ်း” အသင့်အနေအထားဖြင့် နေရာချထားခဲ့သည်။
၎င်းပစ်ခတ်တိုက်ခိုက်မှုသည် မကြာသေးမီနှစ်များအတွင်း ကျွန်ုပ်တို့ကြုံတွေ့ခဲ့ရသည့် အဆိုးရွားဆုံးတိုက်ခိုက်မှုတစ်ခုဟု အစ္စရေးရဲမင်းကြီး Kobi Shabtai က သောကြာနေ့က အခင်းဖြစ်ပွားရာနေရာ၌ ပြောကြားခဲ့သည်။
အဆိုပါတိုက်ခိုက်မှုကို ပါလက်စတိုင်း စစ်သွေးကြွအဖွဲ့များက ချီးကျူးခဲ့ကြသော်လည်း ၎င်းတို့၏အဖွဲ့ဝင်များအနေဖြင့် တာဝန်ရှိကြောင်း ပြောကြားခြင်းမရှိပေ။
ကြာသပတေးနေ့က ပါလက်စတိုင်း အနောက်ဘက်ကမ်းရှိ ဂျန်နင်မြို့တွင် အစ္စရေးစစ်တပ်က ဝင်ရောက်စီးနင်းမှုအတွင်း စစ်သွေးကြွများနှင့် အရပ်သားများအပါအဝင် စုစုပေါင်း ပါလက်စတိုင်း ၉ ဦး သေဆုံးခဲ့ပြီးနောက်ပိုင်း တင်းမာမှုများ မြင့်တက်လာခဲ့သည်။ ယင်းနောက် ဂါဇာမှ အစ္စရေးသို့ ဒုံးကျည်ဖြင့် ပစ်ခတ်ခဲ့ပြီး အစ္စရေးကလည်း လေကြောင်းမှ တုံ့ပြန်တိုက်ခိုက်ခဲ့သည်။
(BBC)