ဂါဇာအပစ်အခတ်ရပ်စဲပြီးနောက် နေတန်ယာဟုက ထရမ့်ကို ရွှေငြိမ်းချမ်းရေးချိုးငှက်လက်ဆောင်ပေး

အစ္စရေးဝန်ကြီးချုပ် ဘင်ဂျမင် နေတန်ယာဟုက တနင်္လာနေ့တွင် ၎င်း၏နိုင်ငံသို့ လာရောက်လည်ပတ်သည့် အမေရိကန်သမ္မတ ဒေါ်နယ်လ် ထရမ့်အား ရွှေငြိမ်းချမ်းရေးချိုးငှက်ရုပ်တုငယ်တစ်ခုကို လက်ဆောင်ပေးခဲ့သည်။ ထရမ့်သည် ဟားမတ်စ်တို့က ကျန်ရှိနေသေးသည့် အသက်ရှင်လျက်ရှိသော အစ္စရေးဓားစာခံများအားလုံးကို ပြန်လည်လွှဲပြောင်းပေးသည့်နေ့တွင် အစ္စရေးနိုင်ငံသို့ လာရောက်ခဲ့ခြင်းဖြစ်ပြီး ယင်းသည် ဂါဇာအပစ်အခတ်ရပ်စဲရေးကို အမှတ်အသားပြုလိုက်ခြင်းဖြစ်သည်။

အစ္စရေး-ဟားမတ်စ် အပစ်အခတ်ရပ်စဲရေး သဘောတူညီချက်ကို ကြားဝင်စေ့စပ်ပေးခဲ့သည့် ထရမ့်သည် ယနေ့တွင် အစ္စရေးလွှတ်တော်အမတ်များအား မိန့်ခွန်းပြောကြားမည်ဖြစ်ပြီး ဂါဇာငြိမ်းချမ်းရေးထိပ်သီးအစည်းအဝေး လက်မှတ်ရေးထိုးရန် အီဂျစ်နိုင်ငံသို့ ဆက်လက်ထွက်ခွာမည်ဖြစ်သည်။ “စစ်ပွဲပြီးသွားပြီ။ ဒါဟာ ကြီးမြတ်တဲ့နေ့ပါ။ ဒါက အစသစ်တစ်ခုပါပဲ” ဟု ထရမ့်က အပစ်အခတ်ရပ်စဲရေးကို ကြိုဆိုသည့်အနေဖြင့် အစ္စရေးသို့ ဆင်းသက်ချိန်တွင် ပြောကြားခဲ့သည်။ ဟားမတ်စ်သည် လက်နက်ဖြုတ်သိမ်းရေး အစီအစဉ်ကို လိုက်နာလိမ့်မည်ဟုလည်း ၎င်းက အခိုင်အမာ ပြောကြားခဲ့သည်။

ယင်းနေ့ အစောပိုင်းတွင် ဟားမတ်စ်တို့က အမေရိကန်ကြားဝင်စေ့စပ်ပေးသည့် ဂါဇာအပစ်အခတ်ရပ်စဲရေးအရ ဓားစာခံ-အကျဉ်းသား လဲလှယ်ရေး သဘောတူညီချက်၏ တစ်စိတ်တစ်ပိုင်းအဖြစ် အစ္စရေးဓားစာခံ ၂၀ ဦးလုံးကို ပြန်လည်လွှတ်ပေးခဲ့သည်။ ဓားစာခံများကို အဆင့်နှစ်ဆင့်ဖြင့် လွှတ်ပေးခဲ့ခြင်းဖြစ်သည်။ ပထမအဆင့်တွင် ဓားစာခံ ၇ ဦးကို ကြက်ခြေနီအသင်းထံ လွှဲပြောင်းပေးခဲ့ပြီး ဒုတိယအဆင့်တွင် ကျန်ရှိသော ၁၃ ဦးကို လွှဲပြောင်းပေးခဲ့သည်။ အစ္စရေးကလည်း ထိုလဲလှယ်မှုအတွက် ပါလက်စတိုင်းအကျဉ်းသား ၁,၉၀၀ ကျော်ကို ပြန်လွှတ်ပေးမည်ဖြစ်သည်။

ထရမ့်သည် ယခုအခါ အီဂျစ်သမ္မတ အာဘယ်ဖတ်တာ အယ်လ်-စီစီ နှင့်အတူ ဂါဇာငြိမ်းချမ်းရေးထိပ်သီးအစည်းအဝေးကို ပူးတွဲသဘာပတိအဖြစ် ဆောင်ရွက်ရန် ရှာမ်အယ်လ်ရှိုက်ခ်(Sharm El Sheikh) သို့ ဦးတည်သွားမည်ဖြစ်သည်။ ကုလသမဂ္ဂ အထွေထွေအတွင်းရေးမှူးချုပ် အန်တိုနီယို ဂူတာရက်စ်၊ ဗြိတိန်ဝန်ကြီးချုပ် ကီယာ စတာမာ၊ အီတလီဝန်ကြီးချုပ် ဂျော်ဂျီယာ မယ်လိုနီ၊ စပိန်ဝန်ကြီးချုပ် ပက်ဒရို ဆန်းချက်ဇ် နှင့် ပြင်သစ်သမ္မတ အီမန်နျူရယ် မက်ခရွန် အပါအဝင် နိုင်ငံပေါင်း ၂၀ ကျော်မှ ခေါင်းဆောင်များသည် အဆိုပါပွဲသို့ တက်ရောက်ကြမည်ဖြစ်သည်။ အဆိုပါထိပ်သီးအစည်းအဝေးသည် အရှေ့အလယ်ပိုင်းဒေသတွင် ငြိမ်းချမ်းရေးနှင့် တည်ငြိမ်ရေး ကြိုးပမ်းမှုများကို မြှင့်တင်ရန်နှင့် ဒေသဆိုင်ရာ လုံခြုံရေးခေတ်သစ်ကို စတင်ရန် ရည်ရွယ်သည်။