ဂါဇာကမ်းမြှောင်ဒေသအနီးရှိ နယ်နိမိတ်များကို အစ္စရေးနိုင်ငံဆိုင်ရာ မြန်မာသံရုံး ယာယီတာဝန်ခံ/ သံအမတ်ကြီး သွားရောက်လေ့လာ

ဂါဇာကမ်းမြှောင်ဒေသအနီးရှိ နယ်နိမိတ်များကို သဘာဝပတ်ဝန်းကျင် စူးစမ်းလေ့လာရန် အထူးပြုခရီးစဉ်အဖြစ် အစ္စရေးနိုင်ငံဆိုင်ရာ မြန်မာသံရုံးယာယီတာဝန်ခံ/ သံအမတ်ကြီး ဦးကျော်ကျော်မင်းက အစ္စရေးအခြေစိုက် သံအမတ်ကြီးများ၊ သံရုံးအကြီးအကဲများနှင့် အတူ သွားရောက်ခဲ့ကြောင်း နိုင်ငံခြားရေးဝန်ကြီးဌာန၏ ထုတ်ပြန်ချက်အရ သိရသည်။

အစ္စရေးနိုင်ငံဆိုင်ရာ မြန်မာသံရုံးယာယီတာဝန်ခံ/ သံအမတ်ကြီး ဦးကျော်ကျော်မင်းက Keren Kayemeth Lelsrael – ဂျူး အမျိုးသားရန်ပုံငွေ (KKL-JNF)၊ အစ္စရေး နိုင်ငံခြားရေးဝန်ကြီးဌာနနှင့် အစ္စရေး သံအမတ်ကြီးများအသင်း (The Ambassadors’ Club of Israel) တို့ ပူးပေါင်းစီစဉ်သောခရီးစဉ်ကို သွားရောက်ခဲ့ခြင်းဖြစ်သည်။

ခရီးစဉ်အတွင်း အစ္စရေးနိုင်ငံ Negev သဲကန္တာရဒေသ၌ စိုက်ခင်းများ လုပ်ဆောင်ထားမှု၊ စီးပွားရေး အခွင့်အလမ်းများရရှိရေး ထုတ်ကုန်များ ဖန်တီးထုတ်လုပ်မှု၊ ထိရောက်စွာ လုပ်ကိုင်နေသည့် စီမံကိန်းများကို လိုက်လံကြည့်ရှု့ခဲ့ကြောင်း သိရသည်။

ထို့ပြင် အစ္စရေး- ဟားမတ်စ်စစ်ပွဲ (၁၈) လတာ ကာလအတွင်း ဘေးဒုက္ခခံစားခဲ့ရသည့် Kibbutz Kfar Aza ဒေသခံ အသိုင်းအဝိုင်းများကို ရပ်ရွာပြန်လည်ထူထောင်ရေး စီမံကိန်းများ ဆောင်ရွက်ထားမှု၊ ၂၀၂၃ ခုနှစ် အောက်တိုဘာ(၇) ရက်မှ စတင်၍ ၎င်းတို့၏ စိတ်လှုပ်ရှားဖွယ်ခရီးများနှင့် ခံနိုင်ရည်အား မျှဝေပေးသည့် အနေဖြင့် ဂါဇာကမ်းမြှောင်အနီး အစ္စရေး ဒေသခံများထံမှ ထူးထူးခြားခြား တစ်ဦးချင်းစီနှင့် ထိတွေ့ဆက်ဆံခဲ့ပြီး ခံစားခဲ့ရမှုများ ရင်ဖွင့်ပြောကြားမှုများကို မျှဝေနားထောင်ခဲ့ကြကြောင်း သိရသည်။

ထို့နောက် KKL-JNF၊ အစ္စရေး၏ သစ်တောဝန်ဆောင်မှုများနှင့် Gilat အပင်ပျိုးခင်းကို လေ့လာရေးခရီးစဉ် အပါအဝင် စစ်ပွဲကြောင့် ထိခိုက်ခံစားရသော ပြန်လည် တည်ဆောက်ရေးဆိုင်ရာ အဓိကလုပ်ဆောင်မှုများသို့ သွားရောက် ကြည့်ရှု့ခဲ့ကြောင်း အဓိပ္ပါယ်ရှိသော အခိုက်အတန့်များအနေဖြင့် Nova ဂီတပွဲတော်လုပ်ခဲ့သည့် နေရာကို သွားရောက်လေ့လာခဲ့ပြီး Iron Swords Forest ၌ သံတမန်အကြီးအကဲများအမှတ်တရ သစ်ပင်စိုက်ပျိုးခြင်း အခမ်းအနားတွင် မြန်မာနိုင်ငံ ကိုယ်စားပြု သစ်ပင်စိုက်ပျိုးပေးခဲ့ကြောင်း သိရသည်။

ခရီးစဉ်နောက်ဆုံး အနေဖြင့် ဂါဇာကမ်းမြှောင် မြောက်ပိုင်းနှင့် အနီးစပ်ဆုံး ရှိနေသည့် Kibbutz Zikim စုပေါင်းရွာသို့ သွားရောက်ကာ စုပေါင်းစနစ်ဖြင့် လုပ်ကိုင်ဆောင်ရွက်မှု အခြေအနေ ရှင်းလင်း တင်ပြမှုကို နားထောင်ခဲ့ပြီး၊ ရေဆိုးစံနစ်မှ ပြန်လည်သန့်စင်မှု၊ စွမ်းအင်ရယူမှုများ၊ လုံခြုံရေး ဆောင်ရွက်ထားရှိမှု ရှင်းလင်းမှုများ နားထောင်လေ့လာခဲ့ကြပြီး ခရီးစဉ် အောင်မြင်စွာ ပြီးဆုံးခဲ့ကြောင်း သိရသည်။