ချန်ပီယံဆုဖလား ကိုင်မြှောက်ပြီး အိမ်ပြန်နိုင်ရန် တစ်သင်းလုံး အကောင်းဆုံး ကြိုးစားသွားမည်ဟု မြန်မာအမျိုးသမီးအသင်း၏ အသင်းခေါင်းဆောင်အဖြစ် တာဝန်ယူမည့် ခင်မာလာထွန်းက ယနေ့ ဩဂုတ် (၁၈)ရက်တွင် ကျင်းပသည့် ပွဲကြိုသတင်းစာရှင်းလင်းပွဲတွင် ပြောကြားသည်။
ချန်ပီယံဆု ရခဲ့ပါက ပြည်သူများ၊ လူငယ်မျိုးဆက်သစ် ကစားသမားများအတွက် စိတ်ဓာတ်ခွန်အား ဖြစ်စေမည်ဖြစ်သဖြင့် အလေးအနက်ထား ယှဉ်ပြိုင်ကစားသွားမည်ဟုလည်း ၎င်းက ထပ်လောင်းပြောကြားထားသည်။
“ဒီဗိုလ်လုပွဲဟာ နိုင်ငံအတွက်၊ ပြည်သူ့အတွက်၊ ကစားသမားတွေအတွက် အလွန်အရေးပါတာမို့ ချန်ပီယံ ဆုဖလား ကိုင်မြှောက်ပြီး အိမ်ပြန်နိုင်ဖို့ တစ်သင်းလုံး အကောင်းဆုံးကြိုးစားသွားမှာ ဖြစ်ပါတယ်။ ချန်ပီယံဆု ရခဲ့ရင် ပြည်သူတွေ ၊ လူငယ်မျိုးဆက်သစ်ကစားသမားတွေအတွက် စိတ်ဓာတ်ခွန်အား ဖြစ်စေမှာမို့ အလေးအနက်ထား ယှဉ်ပြိုင်ကစားသွားမှာ ဖြစ်ပါတယ်” ဟု ၎င်းကဆိုသည်။
ဩဂုတ်လ (၁၉) ရက် ညပိုင်းတွင် ဩစတြေးလျအသင်းနှင့် ယှဉ်ပြိုင်ကစားရမည့် ဗိုလ်လုပွဲစဉ်အတွက် မြန်မာ့လက်ရွေးစင် အမျိုးသမီးဘောလုံးအသင်း၏ အသင်းခေါင်းဆောင်အဖြစ် ခင်မာလာထွန်းက ဆောင်ရွက်မည်ဟု အဖွဲ့ချုပ်၏ အသိပေးချက်အပေါ် နားလည်ရပြီး ယခင်ပွဲစဉ်များတွင် ဝင်သိင်္ဂီထွန်းက အသင်းခေါင်းဆောင်အဖြစ် တာဝန်ယူခဲ့ခြင်းဖြစ်သည်။
မြန်မာအသင်းသည် အာဆီယံအမျိုးသမီး ချန်ပီယံရှစ်ပြိုင် ပွဲ တွင် (၂) ကြိမ် ဗိုလ်စွဲခဲ့ဖူးပြီး ၂၀၁၅ ခုနှစ်က ထိုင်းအသင်းနှင့် ဗိုလ်လုပွဲ၌ ဆုံတွေ့ခဲ့စဉ် ရှုံးနိမ့်ခဲ့သည့်အတွက် နောက်ဆုံးဗိုလ်စွဲခဲ့သည့် ၂၀၀၇ ခုနှစ်မှတွက်လျင် (၁၈) နှစ်အကြာ၌ ချန်ပီယံဖြစ်ရန် အလားအလာကောင်းနေသည့် အသင်းတစ်သင်းလည်း ဖြစ်သည်။
ပြိုင်ပွဲအတွက် မြန်မာအသင်းနည်းပြချုပ် တက်ဆူရိုယူကီကလည်း “ကျွန်တော့်အသင်းက ကစားသမားတွေ ကြံ့ခိုင်မှု ပြန်လည်ပြည့်ဝလာဖို့နဲ့ ဗိုလ်လုပွဲအတွက် အသင့်ဖြစ်အောင် လုပ်ဆောင်နေပါတယ် ။ကစားသမားအားလုံး ဗိုလ်လုပွဲမှာ အကောင်းဆုံးလုပ်နိုင်မယ်လို့ ယုံကြည်ထားပါတယ် ”ဟုဆိုသည်။
ဗိုလ်လုပွဲတွင် ထိပ်တိုက်တွေ့ဆုံမည့် ဩစတြေးလျအသင်းသည် အသင်းကောင်းတစ်သင်းဖြစ်ပြီး အိမ်ရှင်ဗီယက်နမ်ကို အိမ်ကွင်းတွင် အနိုင်ကစားနိုင်ခဲ့သော်လည်း မြန်မာအသင်းကို အုပ်စုပွဲတွင် (၂) ဂိုး(၁) ဂိုးဖြင့် ရှုံးနိမ့်ထားသည့်အသင်း ဖြစ်သည်။
ပြီးခဲ့သည့်ပွဲစဉ်များ၌ အသင်းခေါင်းဆောင်အဖြစ် တာဝန်ယူခဲ့သည့် ဝင်းသိင်္ဂီထွန်းသည် မြန်မာအသင်းအတွက် အ လွန်အရေးပါသည့် ကစားသမားဖြစ်ပြီး ပြိုင်ပွဲတလျှောက် သွင်းဂိုး (၇)ဂိုးဖြင့် ဂိုးအများဆုံးသွင်းယူထားကာ ရွှေဖိနပ်ဆု ရမည့် အလားအလာအကောင်းဆုံး ကစားသမားလည်း ဖြစ်သည်။
မြန်မာ နှင့် ဩစတြေးလျ အသင်းတို့၏ ဗိုလ်လုပွဲ ပွဲစဉ်အား ဩဂုတ်လ (၁၉) ရက်၊ မြန်မာစံတော် ချိန် ည (၇)နာရီခွဲအ ချိန်တွင် Lach Tray Stadium တွင် ယှဉ်ပြိုင်သွားမည်ဖြစ်သည်။