ခါးအရိုးဒဏ်ရာကုသရမည်ဖြစ်၍ IBEC ဆရာတော်နှင့်တွေ့ဆုံမှုအစီအစဥ်အားလုံးကို ယာယီဆိုင်းငံ့

စစ်ကိုင်းတိုင်း၊ စစ်ကိုင်းတောင်ရိုးပေါ်ရှိ အပြည်ပြည်ဆိုင်ရာဗုဒ္ဓဘာသာပညာရေးစင်တာ၏ ဦးစီးဦးဆောင်ဆရာတော်ဖြစ်တော်မူသည့် IBEC ဆရာတော်သည် ပြီးခဲ့သည့်နှစ်ကရရှိခဲ့သော ခါးအရိုးဒဏ်ရာအားကုသရမည်ဖြစ်၍ တွေ့ဆုံမှုအစီအစဥ်အားလုံးကို ယာယီဆိုင်းငံ့ထားကြောင်း သိရသည်။

IBEC ဆရာတော်သည် ပြီးခဲ့သည့်နှစ်က ပညာရေးလုပ်ငန်းများဆောင်ရွက်စဥ် လှေကားပေါ်မှ မတော်တဆခြေချော်လှဲကျ၍ ခါးတွင်ဒဏ်ရာပြင်းထန်စွာရရှိခဲ့ရာမှ လက်ရှိအချိန်တွင် ဒဏ်ရာပြန်ပေါ်လာသဖြင့် အရေးပေါ်ဆေးကုသမှုခံယူရန် လိုအပ်လျက်ရှိကြောင်း သိရသည်။

ထို့ကြောင့် လက်ရှိအချိန်၌ IBEC ဆရာတော်သည် လူသားအကျိုးပြုလုပ်ငန်းများ၊ ပညာရေးလုပ်ငန်းများအား ဆောင်ရွက်တော်မူနေသည့် ကာလဖြစ်သော်လည်း ခါးဒဏ်ရာအားဆေးကုသမှုခံယူနိုင်ရန် ဆရာတော်နှင့်တွေ့ဆုံလိုသူများ၊ ပညာရေး၊ လူသားအကျိုးပြုလုပ်ငန်းများကို ယာယီဆိုင်းငံ့ထားမည်ဖြစ်ကာ မည်သည့်တွေ့ဆုံမှုမျိုးကိုမှလည်း လက်ခံဆောင်ရွက်တော်မူမည်မဟုတ်ကြောင်း သိရသည်။

ခါးအရိုးဒဏ်ရာအားကုသမှုခံယူပြီး ပြန်လည်သက်သာလာကာ လုပ်ငန်းများပြန်လည်ဆောင်ရွက်တော်မူမည့်အချိန်နှင့် တွေ့ဆုံမှုများပြန်လည်စတင်မည့်အချိန်တို့အား ပြန်လည်အသိပေးသွားမည်ဖြစ်ကြောင်း သိရသည်။